Tímarit lögfræðinga - 01.10.1983, Blaðsíða 5
t
GUÐMUNDUR ÓLAFS
Hinn 1. júlí s.l. andaðist Guðmundur Ólafs
bankastjóri á Borgarspítalanum í Reykjavík.
Hann hafði lengi kennt þess sjúkdóms, er að
lokum leiddi hann til dauða. Var honum í blóð
borin karlmennska og æðruleysi, sem mjög
reyndi á í samskiptum við hinn banvæna sjúk-
dóm.
Guðmundur var fæddur í Mýrarhúsum á Sel-
tjarnarnesi hinn 6. september 1906 og var því
tæplega 77 ára, er hann andaðist.
Faðir hans var Björn Ólafsson, er tók upp
ættarnafnið Ólafs. Var hann alkunnur dugnað-
arforkur, skipstjóri og útvegsmaður. Móðir hans
var Valgerður Guðmundsdóttir frá Nesi á Sel-
tjarnarnesi.
Guðmundur gekk menntaveginn eins og það
er kallað, tók stúdentspróf árið 1925 og embættispróf ( lögfræði árið 1930,
hvort tveggja með góðri 1. einkunn.
Hann réðst sem lögfræðingur til Útvegsbanka islands h.f. í maí 1930, ný-
kominn frá prófborðinu. Mæddi strax mikið á honum. Kom sér þá vel góð
greind hans og dugnaður, sem var honum í blóð borin. Hann var fljótur að
átta sig á hlutunum og afgreiddi hvert mál án tafar ,en lét þau ekki hrannast
upp óafgreidd.
Guðmundur var hár og spengilegur, kvikur í hreyfingum, broshýr og hinn
höfðinglegasti í útliti.
Vegna alúðlegrar framkomu og hjálpsemi varð hann brátt mjög vinsæll hjá
viðskiptavinum bankans og samstarfsfólki sínu í bankanum.
Eftir að bankastjórarnir Jón Ólafsson og Jón Baldvinsson önduðust í ágúst
1937 og í mars 1938, var Helgi Guðmundsson einn bankastjóri í Útvegsbanka
íslands h.f. til 4. nóvember 1938.
Mæddi þá sérstaklega mikið á Guðmundi sem aðallögfræðingi bankans
við stjórn hans, og var hann þá önnur hönd aðalbankastjórans. Fórust hon-
um þau störf hið besta. Töldu þvf flestir, að Guðmundur yrði fyrir valinu, er
bankastjórar, einn eða fleiri, yrðu valdir við hlið Helga, enda naut hann sér-
staks trausts hans. En eins og oft áður réðu stjórnmálamennirnir þar lögum og
lofum. Naut Guðmundur ekki náðar þeirra og voru aðrir menn ráðnir.
Guðmundur starfaði sem aðallögfræðingur bankans til 1. janúar 1956, er
hann tók við bankastjórn í Iðnaðarbanka íslands h.f. og gegndi því starfi til
ársloka 1964.
59