Morgunblaðið - 27.08.2011, Blaðsíða 18

18 FRÉTTIRInnlent
MORGUNBLAÐIÐ LAUGARDAGUR 27. ÁGÚST 2011
Steinþór Guðbjartsson
steinthor@mbl.is
„Það er allt á fullu,“ segir Björn Ey-
steinsson, fyrirliði og þjálfari brids-
landsliðsins sem undirbýr sig nú fyr-
ir baráttuna um Bermúdaskálina,
sjálfa úrslitakeppni heimsmeistara-
mótsins, sem verður í Hollandi
seinni hlutann í október.
Undirbúningurinn felst annars
vegar í líkamsrækt og hins vegar í
æfingum og keppni við spilaborðið
og er hvergi slegið slöku við.
Mikilvæg æfingamót
Í gær hófst æfingamót á Grand
hótel og lýkur því á morgun. Keppni
stendur yfir frá klukkan 10 til 22 í
dag og frá kl. 10 til 18 á morgun. 10
landsliðsmenn frá Noregi og Dan-
mörku taka þátt í mótinu, en Björn
segir mikilvægt að landsliðsmenn-
irnir fái tækifæri til að spila við
svona sterka spilara á undirbúnings-
tímanum því ekki sé nóg að spila ein-
göngu við Íslendinga sem séu næstir
landsliðinu í getu. Vissulega hefðu
menn vilja spila oftar við erlenda
landsliðsmenn en ekki verði á allt
kosið. „En þetta er góð og mikil við-
bót og á þessu móti er líkt eftir spila-
fjöldanum sem verður spilaður í
Hollandi,“ segir Björn.
Um miðjan september verður síð-
an samskonar mót og um þessa helgi
en með öðrum erlendum spilurum.
Samhliða því verður sérstakt mót til
að minnast árangursins fyrir 20 ár-
um. Á meðal keppenda verður
sænskt par sem var í sænsku sveit-
inni sem Ísland vann í undan-
úrslitum á HM 1991 og hugsanlega
einhverjir úr pólsku silfursveitinni
frá sama tíma.
Áður en farið verður til Hollands
verður síðan mót á sunnudegi með
íslenskum sveitum. Fjórir af sex
spilurum landsliðsins spila auk þess
í bikarkeppninni sem lýkur um aðra
helgi í september.
Heimsmeistaramótið verður sett
15. október og daginn eftir hefst
barátta 22 þjóða um Bermúdaskál-
ina. Fyrri vikuna spila allar sveitir
innbyrðis og síðan halda átta efstu
sveitirnar áfram í útsláttarkeppni,
þar sem hver leikur tekur tvo daga.
Setja markið hátt
Fyrir 20 árum varð Ísland heims-
meistari í brids í Yokohama í Japan.
Það var fyrsti heimsmeistaratitill Ís-
lands í hópíþrótt og vakti hann að
vonum athygli. Íslenska liðið tryggði
sér Bermúdaskálina eftir úrslitaleik
við Pólverja sem stóð yfir í þrjá daga
og lauk 11. október 1991. Fjórir í
hópnum núna voru á efsta stalli fyrir
tveimur áratugum og reynslunni
ríkari setja menn stefnuna á topp-
inn. „Menn fara náttúrlega í þetta til
þess að ná hámarks árangri,“ segir
Björn. „Það er líka gaman að við
skulum vera komnir aftur á þennan
stað, að spila til úrslita í heimsmeist-
aramótinu.“
Björn minnir á að brids sé hátt
skrifað í Evrópu og þaðan komi iðu-
lega fimm til sex sveitir í úrslita-
keppni heimsmeistaramótsins en 10
til 12 sveitir af um 40 geri tilkall til
þessara úrslitasæta. Keppnin sé því
hörð og nú hafi sex Evrópuþjóðir
tryggt sér þátttöku auk gestgjafa
Hollands. Tvær sterkar sveitir komi
frá Bandaríkjunum, sveitirnar verði
stöðugt sterkari í Asíu og Ástralía,
Nýja Sjáland og Brasilía, sem hafi
meðal annars orðið ólympíumeistari,
tefli fram mjög sterkum landsliðum.
„Þetta eru allt sterkar þjóðir og það
verður gaman að takast á við þessa
bestu,“ segir Björn. „Fyrsta mark-
miðið hjá okkur er að komast í átta
liða úrslitin og við hugsum ekki
lengra að svo stöddu.“
Undirbúningurinn og þátttakan
kostar sitt en Björn segir að lands-
liðið njóti velvildar margra og vonir
standi til þess að niðurskurður ríkis-
ins verði ekki meiri en til annarra.
Baráttan um Bermúdaskálina
 Landsliðið í brids undirbýr sig af kappi fyrir úrslitakeppni heimsmeistaramótsins sem verður í
Hollandi í október  20 ár síðan íslenska sveitin varð heimsmeistari í brids og tryggði sér skálina
Morgunblaðið/Eggert
Landsliðið í brids Frá vinstri: Björn, Aðalsteinn, Þorlákur, Magnús, Jón, Sigurbjörn og Bjarni.
HM í 40. sinn
» Heimsmeistarakeppnin í
sveitakeppni í brids, keppnin
um Bemúdaskálina, fer nú
fram í 40. sinn og verður
haldin í Veldhoven í Hollandi
15. til 29. október 2011.
Keppnin fór fyrst fram 1950
og hefur fyrirkomulagið breyst
mikið síðan.
» Frá Evrópu koma sveitir frá
Ítalíu, Póllandi, Ísrael, Íslandi,
Svíþjóð, Hollandi og Búlgaríu.
» Aðrar sveitir koma frá
Bandaríkjunum (2), Kanada,
Brasilíu, Síle, Indlandi, Pak-
istan, Guadeloupe, Kína, Jap-
an, Singapore, Ástralíu, Nýja-
Sjálandi, Egyptalandi og Suð-
ur-Afríku.
» Bandaríkin eiga titil að
verja frá keppninni í Sao Paolo
í Brasilíu fyrir tveimur árum.
Heimsmeistarar Íslenska sveitin fagnar sigrinum í Japan 1991.
Morgunblaðið/Guðmundur Sv. Hermannsson