Árbók VFÍ/TFÍ - 01.01.1996, Síða 151

Mislæg gatnamót 149
Annað erfitt vandamál voru stoðveggirnir sem standa nokkuð nálægt Vesturlandsveginum og
eru eðlilega mjög háir því hæð undir brúna er um 5 metrar. Arkitektar leystu stoðveggina ekki
eins að norðan og sunnan og undirstrika þannig mishæðir landsins í kring. Stoðveggirnir
snúast upp og yfir brúna og mannvirkið fær því sérstakt yfirbragð í grunnmynd og er allt ein
samfella. Mikil áhersla var lögð á að leysa tengingu brúarplötu við stoðveggina sem oft er
mjög vandræðalegur punktur í hefðbundnum brúm. Brúin svífur aftur fyrir stoðveggina og þar
sem hún þynnist til hliðar gat auðveldlega myndast skot eða dautt rými í kverkinni. Þetta var
leyst með því að láta efsta kantinn á stoðveggnum sveigja út á brúna og fylgja henni síðan.
Hvergi er nein þenslurauf í öllu mannvirkinu, hvorki í brúnni stoðveggjum né þar á milli. Allt
er ein órofa heild. Handrið brúarinnar sem er framhald stoðveggjanna er steypt og kemur í stað
hefðbundins vegriðs. Neðst í handriðinu eru göt en efst er þykkur „handlisti" úr azobe sem er
harðviðartegund sem ræktuð er í Afríku.
Eftir var síðan að leysa það verkefni að gera stoðveggina mildari. Mjög mikil vinna var
lögð í fortilraunir og umræður innan hönnunarhópsins sem ekki er hægt að rekja allar hér. Að
lokum stefndi málið í einhvers konar húðun með lituðu efni. Arkitektar höfðu áhuga á múr
með íblönduðu miklu magni af stáltrefjum sem síðan ryðga og gefa yfirborðinu stöðugt breyti-
legt yfirbragð og voru gerðar tilraunir með það. Verkfræðingarnir, sem áður höfðu unnið að
steiningartilraunum, óskuðu sér gjarnan áferðar sem sjá má úti í nátturunni í hrauni, sem runn-
ið hefur yfir gjall og kolsvartir og rauðir jarðlitir blandast óreglulega saman. Gerðar voru fjöldi
tilrauna með ýmis konar blöndum en að lokum gáfust hönnuðir upp á báðum grunnhugmynd-
unum. Að lokum var lögð sú lausn fyrir verkkaupa að steina yfirborðið með glampandi,
kolsvartri hrafntinnu. En hér var ekki notuð hrafntinna úr friðuðum námum heldur malað
úrgangsefni sem fellur til við steinullarframleiðslu. Og nú eiga svartir steinarnir að glitra í
myrkinu eins og gimsteinar þegar bílljósin falla á þá.
Mynd 4 Steining á stoðveggjum og endafrágangur handriðs.