Tímarit Máls og menningar - 01.05.1944, Page 97

TIMARIT MALS OG MENNINGAR
87
Charcot við SuSurpól
CHARCOT VIÐ SUÐURPÓL.
Sigurður Thorlacius endursamdi og íslenzkaði.
Utgefandi: Mál og menning. Reykjavík 1943.
Bókin um Charcot við Suðurpcl er ekki ýkja stór, að minnsta kosti þolir
blaðsíðutalið engan samanburð við hin blaðauðgu ritverk, sem eru upp á
móðinn. Bókin er einar 166 blaðsíður, það er allt og sumt. Samt fer ekki hjá
því, að bún fylli vel sinn sess í hópi þýðinga úr erlendum málum, sem upp
á síðkastið hafa verið leiddar til sætis í bókmenntum vorum. Henni er ætlað
það hlutverk fyrst og fremst að gleðja og fræða íslenzk ungmenni og ég held,
að sá búningur, sem Sigurður Thorlacius skólastjóri hefur valið þýðingu sinni,
nái ágætlega þeim tilgangi. í eftirmála segir, að „Le Frangais au Pole Sud“
sé talin með allra beztu barna- og unglingabókum Frakklands. Hana hefur
Sigurður Thorlacius frekar endursagt en þýtt, stytt talsvert og breytt úr dag-
bókarformi í frásöguform, allt af stakri vandvirkni og samvizkusemi, eftir því
sem bezt verður séð. Þó hefði ég kosið, að hann hefði gætt meira samræmis
um nafnagiftir á mönnum og löndurn en hann gerir, þar sem hann þýðir sum
nöfn alveg, hljóðritar önnur, en heldur sumurn alveg óbreyttum. Þetta hefði
farið betur, ef hann hefði haft eina aðferðina, en ekki allar þrjár undir í einu.
Annars á bók þessi, sem sagt, erindi við íslenzk börn og unglinga. Fyrir
þann lesendahóp er hún fortakslaust góð lesning, einkanlega hvað snertir við-
horf höfundarins, dr. Charcots, til dýranna. Bollaleggingar höfundarins um
goðsagnamyndun í þjóðfélagi mörgæsa og guðfræði þeirra, fer þó vafalaust, og
að skaðlausu, fyrir ofan garð og neðan hjá þessum lesendum, og verða teknar
sem góðlátlegt gaman.
Minningin um dr. Charcot er rík í hugum Islendinga. Mikill landkönnuður
var hann og þó meiri mannkostamaður, prúðmaður í sínum hóp. Hér átti hann
vini, langtum fleiri en þá, sem hann hafði mælt máli, og síðasta athöfn hans
á skipsflaki í löðrandi brimgarði, er hann leysti fanginn fugl úr búri, er verð-
ug þess að geymast um ókomin ár. Ferðir hans um suðurhvel jarðar er inn-
gangur að því ferðalagi, er lauk á Straumfjarðarskerjum 16.. sept. 1936, og á
því visst erindi til íslenzkra lesenda.
Lárus Sigurbjörnsson.