Frjáls verslun - 01.10.2007, Qupperneq 16

16 F R J Á L S V E R S L U N • 1 0 . T B L . 2 0 0 7
Telurðu að húmor sé nauðsynlegur í auglýsingum
eða getur slík skemmtun skyggt á sjálf skilaboðin?
„Síma-auglýsingin með síðustu kvöldmáltíðinni er þess eðlis að hún
hefði hæglega getað verið atriði í Fóstbræðrum en með því að útfæra
hugmyndina í auglýsingu eru mun meiri möguleikar á fjármagni til
verksins auk þess sem það fær meira áhorf. Framleiðslu á sjónvarpsefni
hér á landi hefur verið sniðinn afar þröngur stakkur.
Ég hef margoft séð fyndnar auglýsingar og man vel eftir þeim
en ekki hvað var verið að auglýsa. Þannig geta þær orðið of absúrd
og hætt að þjóna þeim tilgangi að fræða og upplýsa um ákveðna
þjónustu eða vöru. Sem hugmyndasmiður verður maður að reyna að
forðast slíkt til hins ýtrasta og búa þannig um hnútana að fólk hafi
skýra tengingu við það sem er verið að auglýsa.
Einnig verður að gæta þess að auglýsingar séu ekki of almennar,
t.d. ef verið er að auglýsa sérstakan leðurjakka, mega skilaboðin ekki
verða þannig að það sé bara almennt töff að ganga í leðurjakka,
heldur þessari umræddu, ákveðnu tegund. Sumar auglýsingar verða
alltof almennar sem er mikil synd því oft er miklu kostað til þeirra.
Ég lít á sjálfan mig sem grínista, listamann, og hef því ákveðnar
og miklar skoðanir á gríni. Það er ákveðin tegund leiklistar að nota
kómedíu til að koma skilaboðum á framfæri líkt og aðrir listamenn
gera.
Mér finnst auglýsingaheimurinn mjög áhugaverður og
skemmtilegur vettvangur fyrir mig sem grínista. Fólk hefur oft
skringilegar og neikvæðar hugmyndir um auglýsingar, eins og að
hjá auglýsingastofum starfi illgjarnt fólk sem hafi að leiðarljósi að
afvegaleiða samborgara sína. Það er að sjálfsögðu alls ekki málið.
Auglýsingar eru einfaldlega leið til að kynna vörur eða þjónustu
auk þess sem þetta er bara tími á milli dagskrárliða í sjónvarpi
sem getur verið mjög skemmtilegur. Gagnvart auglýsingum ríkja
ranghugmyndir og fordómar rétt eins og verið hefur gagnvart gríni
hér á landi. Það sjónarmið hefur tíðkast í okkar menningu að gleði
og grín sé einhvers konar merki um greindarskort. Kímnigáfa er
hins vegar einmitt gáfa, hæfileiki sem á fullan rétt á sér. Ég myndi
gjarnan vilja sjá grín hafið til vegs og virðingar í samfélaginu og lífinu
almennt.“
Hvers konar auglýsingar hitta í mark?
„Þær þurfa fyrst og fremst að byggjast á metnaði. Það er mjög mikil
kúnst að gera góða auglýsingu þannig úr garði að hún skili sem
mestu fyrir auglýsendurna. Það er mikið komið undir metnaði þeirra
sem að gerð hennar koma, metnaði til að veita toppþjónustu. Málið
snýst alls ekki um að skjóta bara viðkomandi hugmyndasmiði eða
auglýsingastofu upp á stjörnuhimininn í eitt augnablik – heldur gera
eitthvað fyrir viðkomandi vöru. Það er lykilmálið.
Á stofunni okkar hjá ENNEMM er einmitt mikil áhersla lögð
á metnað til þess að skila árangri fyrir kúnnann. Hún hefur verið
grínstofan í bransanum ef svo má segja og verið á léttum nótum. Hún
framleiddi t.d. Lottóherferðina með Lýð Oddsson í fararbroddi, en
þar var ég innanborðs.
HiN ýMSu ANDLiT JóNS GNARR:
Lýður Oddsson í Lottóinu. Georg Bjarnfreðarson í Næturvaktinni.