Dagblaðið Vísir - DV - 21.05.2010, Page 30

30 FÖSTUDAGUR 21. maí 2010 VIÐTAL
Við erum að fá alveg æðislegar við-tökur og það er mikill áhugi fyrir ís-lenska hópnum,“ segir Hera Björk Þórhallsdóttir söngkona sem syngur
framlag Íslendinga í Eurovision í ár. DV náði í
Heru þegar hún átti stund milli stríða og sat aft-
ast í rútu íslenska hópsins að hvíla lúin bein.
Íslenski hópurinn fór utan í lok síðustu viku og
hefur nú verið ríflega viku í Eurovision-landi
en í ár fer keppnin fram í Ósló í Noregi. Hera
syngur lagið Je Ne Sais Qoui sem hún samdi
ásamt Örlygi Smára. Það lag hafði sigur í und-
ankeppninni hér heima. Með Heru verða á
sviðinu bakraddasöngvararnir Kristjana Stef-
ánsdóttir, Erna Ólafsdóttir, Heiða Ólafsdótt-
ir, Kristján Gíslason og Pétur Örn Guðmunds-
son.  Nóg er að gera hjá íslenska hópnum en
Hera þekkir keppnina vel þar sem þetta er
þriðja árið í röð sem hún er hluti af framlagi Ís-
lands, þó í fyrsta skiptið sem hún keppir sjálf.
Í viðtali við DV daginn eftir sigurinn í undan-
keppninni hér heima sagðist hún hafa ætla að
vinna Eurovision síðan hún var sex ára gömul.
VÆRI EKKI TIL AÐ GERA
ÞETTA ALLT ÁRIÐ
„Við erum alveg á fullu og allir dagar eru upp-
bókaðir,“ svarar Hera spurð um dvölina úti
hingað til. „Ég vissi samt alveg hvað ég væri að
fara út í enda hef ég fylgst mjög vel með síðustu
tvö ár. Það er engin draumaaðstaða þannig að
vera í forgrunni. Þetta er samt alveg hræðilega
skemmtilegt og auðvitað er þetta bara í tvær
vikur. Þess vegna tekur maður þetta á fullu en
ég væri ekkert til í að vera í þessu 365 daga á ári.
Ég myndi ekki nenna að vera í rósóttum kjól
alla daga,“ segir Hera og skellir upp úr.
Hera segir hópinn í ár alveg sérstaklega
skemmtilegan en hann er mikið saman og mik-
ið er hlegið og grínast. „Við sitjum mikið í rútu
þannig það er mikilvægt að hafa hópinn sam-
stilltan. Skemmtistuðullinn í þessum hópi er
alveg gríðarlegur. Þetta er samt alltaf skemmti-
legt og í hverri ferð koma nýir brandarar enda
nýtt land og nýtt tungumál í hvert skipti,“ segir
hún.
ÆFINGAR GANGA OF VEL
Íslenski hópurinn æfði í fyrsta skiptið á sviðinu
á mánudaginn og segir Hera það hafa geng-
ið mjög vel. Norðmennirnir eru mjög liðtæk-
ir að taka við ábendingum og ætti atriðið að
verða orðið glæsilegt fyrir undanúrslitakvöld-
ið á þriðjudaginn. „Æfingin gekk alveg rosa-
lega vel, eiginlega of vel. Við gerðum samt al-
veg fullt af athugasemdum við myndvinnslu og
lýsingu og fleira þannig lagað. Við erum alveg
rosalega ánægð með þetta og Norðmennirn-
ir eru algjörir fagmenn í þessu enda unnið við
sjónvarp í hundrað ár.“
Gífurleg vinna er lögð í hvert atriði þar sem
öll smáatriði skipta máli. Því geta æfingarnar
skipt miklu máli því sé einn lítill hlutur í ólagi
verður atriðið ekki jafngott og það ætti að vera.
„Þetta er svo miklu meira batterí en fólk held-
ur. Bara það að lyfta einni myndavél tíu sentí-
metra hingað eða þangað skiptir ótrúlegu máli.
Ef hún er færð kannski aðeins of langt er kom-
inn skuggi á andlitið á mér til dæmis,“ segir
Hera.
BETRI SÖNGVARI EN
VIÐSKIPTAFRÆÐINGUR
Hera vinnur við söng allan ársins hring, bæði
kennir hún og syngur sjálf. Hún segir það hafa
legið mjög snemma fyrir hvað hún ætti að
verða þegar hún myndi eldast en þrátt fyrir
það reyndi hún að streitast á móti. „Þjóðsagan
í fjölskyldunni segir að ég hafi byrjað að syngja
tveggja ára gömul á koppnum. Þá kunni ég eitt
lag, Guttavísur, og söng það fyrir alla sem vildu
heyra og líka þá sem vildu ekki heyra. Ég hef
alltaf vitað að þarna væri ég sterk. Samt reyndi
ég að flýja það um tíma þegar ég hélt að ég yrði
betri viðskiptafræðingur en söngvari. Á end-
anum komst ég að því að ég myndi skila mun
meiri tekjum inn í ríkissjóð sem söngvari,“ seg-
ir Hera og hlær dátt.
„Í dag er ég bæði að syngja og kenna söng.
Ég er líka mjög einföld manneskja. Ef mér finnst
eitthvað leiðinlegt geri ég það ekki og ef mér
finnst leiðinlegt einhverstaðar fer ég. Lífið á bara
að vera gaman,“ segir Hera. Henni var alltaf ýtt í
átt að söngnum og hann átti svo hug hennar all-
an og hjarta að búslóðaflutningar hennar norð-
ur í land heppnuðust ekki sem skyldi.
„Ég reyndi að flýja norður á Dalvík og fór í
háskóla. En ég var svo mikið fyrir sunnan að
syngja að þessi flutningur var bara orðið auka
flækjustig fyrir mig. Á endanum hætti ég bara
að streitast á móti söngnum,“ segir hún.
DREGUR INN MAGANN Í KREPPUNNI
Hrunið hefur haft mikil áhrif á fjárframlag Rík-
issjónvarpsins til Eurovision en í ár var til dæm-
is ekki hægt að gera myndband. Á endanum gaf
Kvikmyndaskóli Íslands hópnum myndband
að gjöf sem hefur vakið stormandi lukku ytra.
„Sumir segja að þetta sé besta myndband sem
sést hefur en margir eru reyndar mjög háfleyg-
ir,“ segi Hera. Hópurinn finnur mikið fyrir sparn-
aðinum, sérstaklega í Noregi þar sem verðlag er
mjög hátt.
„Við upplifðum mikinn sparnað í fyrra og
sjokk líka yfir því hvað allt var dýrt,“ segir Hera
en í fyrra var hún með Jóhönnu Guðrúnu í Mos-
vku. „Við þurftum þá að ferðast svo langar vega-
lengdir til að kaupa eitthvað sem við könnuð-
umst við. Hérna fáum við allt bara í næstu búð
en það er rosalega dýrt. Við sníðum okkur bara
stakk eftir vexti, þannig er staðan í dag. Við
erum búin að fá allt sem við vildum út úr þess-
um verkefnum. Við
tókum góða greiningu
á hvað við þyrftum að
fá og hvað ekki. Þetta
hefur bara verið rek-
ið eins og gott íslenskt
heimili,“ segir hún en
kreppan hefur líka
haft áhrif á Heru sem
persónu.
„Auðvitað
minnka störfin og
maður hefur kannski
ekki jafnmikið á milli
handanna. En þá
dregur maður bara
inn magann og tek-
ur jákvæða pólinn
á þetta. Maður getur ráðið því hvort
þetta hafi áhrif á mann eða ekki. Mað-
ur reynir bara að sýna ábyrgð í öllum
kaupum,“ segir Hera Björk.
LANGVINSÆLASTA LAGIÐ
Aftur að máli málanna, keppninni í ár.
Hera segir ávallt mikinn spenning fyr-
ir íslenska laginu og hópnum. Íslensku
keppendurnir eru rómaðir fyrir gleði og
skemmtilegheit og eru mjög vinsælir
á blaðamannafundum. „Núna vita all-
ir hvar Ísland er vegna þessara atburða
sem hafa verið að gerast undanfarna
mánuði. Þetta gos er besta kynning-
arherferð sem hefur verið haldin fyr-
ir nokkurn keppanda. Við erum bara að
fara setja mikla pressu á íslensku þjóðina þegar
við vinnum keppnina,“ segir Hera og hlær.
Lagið hefur verið langmest skoðað af öllum
hingað til, bæði á myndbandavefsíðunni You-
tube og inni á heimasíðu keppninnar. „Þetta
segja spekingarnir mér. Við erum komin með
yfir 50.000 heimsóknir á Youtube og svo hafa
20.000 skoðað okkur og lagið inn á heimasíðu
Eurovision. Á sama tíma eru aðrar þjóðir með
300-400 heimsóknir. Við finnum fyrir miklum
áhuga en tökum þessu þó öllu með ró,“ segir
Hera en veit hún hvort lag á borð við Je Ne Sais
Quai er vinsælt í Evrópu í dag?
„Við erum ekkert að pæla í því hvað er vin-
sælt. Það er allt vinsælt. Það fer bara eftir því í
hvað geira þú ert. Það er alveg sama með hvaða
lag þú mætir í keppnina, það er alltaf einhver
sem fílar það. Hvort þetta lag sé heitasta heitt í
dag veit ég ekki,“ segir hún.
ÚR 14. SÆTI Í ÞAÐ 1.
Eurovision hefst formlega á þriðjudaginn þegar
fyrra undanúrslitakvöldið fer fram. Ísland er þá
seinast á svið sautján landa en óþægilega mikið
af löndum frá austurblokkinni eru með Íslandi
í riðli en ekkert Norðurlandanna. Hera spáir þó
ekkert í svoleiðis pólitík. „Þegar allt kemur til
alls snýst þetta um að heilla fólk. Þá fær maður
stig. Það er það sem gerðist í fyrra. Við vinnum
aldrei þessa keppni nema vera með sterkt fram-
lag, sungið af einlægni og gleði. Ég hef enga trú á
því að fólk gefi okkur ekki stig vegna þess að það
er frá Austur-Evrópu eða vegna öskufalls. Við
erum einföld. Annaðhvort líkar fólki við okkur
eða ekki,“ segir Hera.
Spárnar fyrir keppnina voru Íslandi alls ekki
í hag og vorum við í mörgum hverjum neðst á
blaði. Annað er að frétta úr Eurovision-land-
inu sjálfu. „Þessar spár eru allavegana. Það fer
bara eftir því inn á hvaða síðu þú ferð. Fjöl-
miðlar hérna eru með sérstakan lista sem þeir
uppfæra saman og eftir fyrstu æfinguna ruk-
um við úr fjórtánda sæti á þeim lista upp í það
fyrsta. Þetta fer samt allt eftir því hvernig gengur
á kvöldinu sjálfu og hvernig fólk nær að tengja
við lagið. Svo snýst þetta líka um dagsformið á
Evrópu. Ef allir flugvellir í heimi lokast kvöldið
fyrir úrslitin vegna öskufalls getur enginn spáð
um úrslitin. Við trúum því samt að við séum að
fara áfram. Það er bara þannig titringur í loftinu
og því ætlum við að koma til skila til áhorfenda,“
segir Hera Björk Þórhallsdóttir.
tomas@dv.is
Hera Björk Þórhallsdóttir stígur á
svið í Eurovision á þriðjudaginn með
laginu Je Ne Sais Quai sem er framlag
Íslendinga í ár. Hera segir allt hafa
gengið mjög vel og íslenska hópinn
vera mjög vinsælan. Hvað gerist þeg-
ar á sviðið er komið verður að ráðast
en best færi að flugvöllum Evrópu
yrði ekki lokað daginn fyrir keppni.
Gosið langbesta
kynningarherferðin
Syngur framlag Íslands Hera
hefur ætlað að vinna Eurovision
síðan hún var sex ára.
Vinsæl Hera hefur í nógu að snúast að mynda sig með æstum Eurovision-aðdáendum.
Barngóð Hera á sjálf tvö börn, 6 og 12 ára, þannig að
hún kann á ungviðið.