Tímarit hjúkrunarfræðinga - 01.04.2009, Síða 35

Tímarit hjúkrunarfræ›inga – 2. tbl. 85. árg. 2009 31
Þeim samningum verður ekki breytt nema
með samningum við félagið eða fulltrúa þess í
samstarfsnefndum. Hjúkrunarfræðingar eru hvattir
til að leita til trúnaðarmanna um upplýsingar og
ráðgjöf, og að koma upplýsingum um boðaðar
breytingar til félagsins og leita aðstoðar starfsmanna
þess þegar þörf er á.
Hvað er fram undan?
Því miður er ljóst að hagræðingarkrafa sú sem
nú er sett á heilbrigðisstofnanir er líklega aðeins
forsmekkur þess sem koma skal. Fullyrða má
að næstu tvö árin að minnsta kosti þurfi að
hagræða annað eins og krafist er á þessu ári.
Slík hagræðing næst ekki fram nema með því að
sameina stofnanir, loka stofnunum eða leggja af
ákveðna starfsemi. Því ríður á að stjórnvöld marki
skýra stefnu um hvaða þjónustu á að veita, hvar
á að veita þjónustuna og hver greiði fyrir hana.
Hagræðingarkrafan, sem nú er sett fram, leiðir til
þess að hverfa verður frá þeirri stefnu að reyna að
gera allt fyrir alla alltaf.
Í opinberri umræðu er því miður oft talað um
heilbrigðiskerfið eingöngu sem útgjöld. Kostnaður
af kerfinu er metinn og tölum slegið fram um aukinn
hlut „heilbrigðisútgjalda“ af vergri landsframleiðslu.
Sjaldnar er rætt um ávinninginn og arðinn af
heilbrigðiskerfinu. Ávinninginn fyrir samfélagið
af því að bjarga mannslífum, af því að koma
fólki aftur til vinnu og til þess að hugsa um
börn sín og fjölskyldur, af því að skila aftur
sköttum til þjóðarbúsins, af því að hafa innan
heilbrigðiskerfisins mikinn mannauð, fjölda vel
menntaðra starfsmanna og svo framvegis. Arðsemi
heilbrigðisþjónustu er ómæld og því er vandasamt
og viðkvæmt að skera niður í heilbrigðiskerfinu.
Miklar framfarir hafa orðið í heilbrigðiskerfinu á
síðustu árum og áratugum. Fjöldi nýrra og dýrra
meðferðarúrræða eru nú veitt hér á landi. Þekkingu
og færni heilbrigðisstarfsmanna eru fá takmörk
sett. Það er því skylda stjórnvalda að taka sem fyrst
ákvarðanir um hversu miklu af okkar sameiginlega
sjóði skuli verja til heilbrigðismála á næstu árum,
á þessum tímum þegar herðir að. Nauðsynlegt
er að ræða af yfirvegun um forgangsröðun
verkefna í heilbrigðiskerfinu. Nú eru liðin 12 ár
frá því að skýrsla nefndar um forgangsröðun
í íslenskum heilbrigðismálum var gefin út af
heilbrigðisráðuneytinu. Þegar hagræðingarkrafa
stjórnvalda á heilbrigðisstofnanir er svo mikil
sem nú er, ber hinum sömu stjórnvöldum að
hafa skýra stefnu í forgangsröðun verkefna í
heilbrigðisþjónustu sem og öðrum þjónustuþáttum
í íslensku samfélagi.
Í nærmynd
HJÚKRUNARFRÆÐINGAR Í NÆRMYND
Hefur þú gaman af því að taka myndir? Tímarit hjúkrunar­
fræðinga auglýsir hér með eftir áhugaljósmyndurum sem vilja
leggja tímaritinu og félaginu lið. Okkur vantar myndir sem lífga
upp á greinar í tímaritinu og á vefsíðum félagsins. Sérstaklega
vantar okkur myndir úr starfi hjúkrunarfræðinga en einnig
myndir úr frítíma hjúkrunarfræðinga.
Myndir úr starfi mega gjarnan sýna hjúkrunarfræðinga sem
virka þátttakendur í meðferð og hjúkrun. Sérfræðingar í
ímyndarsköpun halda því fram að hjúkrunarfræðingar komi fyrir
sjónir almennings sem óvirkir aðilar og því viljum við breyta.
Taktu myndavélina með þér í vinnuna en gættu sérstaklega
að því að fá birtingarleyfi þeirra sem fram koma á myndunum.
Myndir af tækjum og tólum hjúkrunarfræðinga eru einnig vel
þegnar.
Sendu okkur myndir á netfangið christer@hjukrun.is. Tímarit
hjúkrunarfræðinga og Félag íslenskra hjúkrunarfræðinga áskilja
sér rétt til að nota allar myndir í tímaritinu og á vefsíðum
félagsins.