Tímarit Máls og menningar - 22.10.2002, Side 25

Fyrsti dansinn
II.
hann var ekkert faðir vor
en ég hélt það
hann kenndi mér pardans
polka ræl og mazúrka
kunni bæði opinn ræl og skiptiræl
þau rúlluðu upp mottunum mamma og hann
á fjalalögðu ganggólfi eftir fjóstíma og fréttir
hann dansaði fyrst við mömmu
svo við mig
sagði ég væri léttfætt og lét mig dansa þétt í sínum ræl
með endurteknu hiki inni í skiptisporinu
drottinn setti ekki „vörð fyrir munn minn ...“
en ég hélt það
polkinn var kátína auðveld og hiklaus
en rælinn þoldi ég illa
fegin þegar tjúttið kom og tvistið og sjeikið
hægt að hrista af sér eitt og annað
tvista burtu faðir vor og heljargreipar pardansins
er ég þoldi illa barn á gangi
undir útsaumaða skiltinu drottinnblessiheimilið
gyllt á svörtum grunni
Kristín Bjarnadóttir (f.1948) er ljóðskáld, ættuð að norðan og
vestan en býr í Svíþjóð. Hún er höfundur ljóðsögunnar Því að þitt
er landslagið (1999). Kristín hlaut viðurkenningu í ljóðasam-
keppninni „Ljóðstafur Jóns úr Vör“ árið 2002 fyrir ljóðið Fyrsti
dansinn I - II.
24 Ljóð Kristín Bjarna 17.10.2002 11:02 Page 25