Gerðir kirkjuþings - 01.01.2014, Page 8

8 9
væntingar sem það gerir til hennar. Skilgreina hverjar þær væntingar eru og meta hvernig
til takist með að mæta þeim.
Það skiptir jú máli að skilgreina hvernig árangur skal metinn.
Það þykir eðlilegt að setja skýrt fram hver markmið eru með starfsemi stofnana og hvaða
árangri starfsmenn þar hyggjast ná. Ég tel það tímabært að slíkt sé skoðað á vettvangi
kirkjunnar.
Kjörtímabil síðasta kirkjuþings einkenndist mjög af erfiðum samskiptum við ríkisvaldið
um fjármál. Bæði á það við um greiðslur sem byggja á kirkjujarðarsamkomulaginu og
sóknargjöld. Það þekkja allir hér inni hve erfiður tími þetta hefur verið og hve sorgleg
niðurstaða hefur orðið af viðræðum við ríkisvaldið hvert einasta ár. Stundum hafa jafnvel
verið gefin fyrirheit um að þessi mál verði löguð en jafnan hefur verið minna um að þau
fyrirheit rættust. Með nýrri ríkisstjórn vonuðum við að málstað kirkjunnar væri sýndur
meiri skilningur.
En jafnvel þegar ráðherra kirkjumála hefur tekið vel í að þessi mál verði sett í sanngjarnan
farveg þá fréttist af tæknimönnum í fjármálaráðuneytinu sem nota furðulegar æfingar
með vísitölu til að draga úr þeirri leiðréttingu sem ráðherra hefur gefið vilyrði um. Þessar
aðferðir eru ekki geðfeldar og samskipti eru ekki hrein og bein þegar svona trix eru brúkuð.
Mér persónulega finnst það ekki ríkisvaldinu sæmandi að fara fram með þessum hætti.
Þá er það með algjörum ólíkindum að ár eftir ár lendi fulltrúar þjóðkirkjunnar sem eru í
þessum samskiptum í rökræðum um það hvort sóknargjöld trúfélaga séu félagsgjöld eða
ekki. Sóknargjöldin eru elstu félagsgjöld á Íslandi. Þótt innheimta þeirra færi í þann farveg
sem nú er var það ekki hugmynd löggjafans að leggja sóknargjöld niður eða að hætta að
tengja þau við aðild félagsmanna að trúfélögum.
Við getum ekki og viljum ekki trúa því að ekki verði ærlega staðið að fjárhagslegum
samskiptum þjóðkirkjunnar og ríkisvaldsins og þau mál verði a.m.k. höfð í þeim farvegi
sem ágæt samstarfsnefnd hefur lagt til.
Góðir kirkjuþingsfulltrúar.
Á dagskrá 51. kirkjuþings eru 29 mál.
Þar eru hefðbundin mál svo sem skýrsla kirkjuráðs og fjárhagur þjóðkirkjunnar. Svo eru
misstór mál sum ný en önnur hafa verið á vettvangi kirkjuþings í nokkur ár. Í því sambandi
má nefna tillögu að nýjum þjóðkirkjulögum.
Ég vil nota þetta tækifæri til að þakka starfsfólki biskupsstofu fyrir undirbúning þingsins.
Við undirbúning þessa þings var haft að leiðarljósi að tíminn væri nýttur sem best, svo
dagskráin er nokkuð þétt.
Það er von mín að niðurstaða starfa okkar hér verði góð og þjóðkirkjunni til heilla.