Gerðir kirkjuþings - 01.01.2014, Qupperneq 38

3938
Nefndarálit allsherjarnefndar um skýrslu kirkjuráðs.
Á fund nefndarinnar komu Agnes M. Sigurðardóttir, biskup Íslands, Magnús E. Kristjáns-
son, forseti kirkjuþings og Guðmundur Þór Guðmundsson, lögfræðingur á biskupsstofu.
Allsherjarnefndin hefur fjallað um skýrslu kirkjuráðs og fylgigögn með henni ásamt ávörpum
og ræðum við upphaf kirkjuþings. Nefndin tekur undir orð Magnúsar Kristjánssonar
forseta kirkjuþings þegar hann segir: „Þjóðkirkjan þarf eins og aðrir að takast á við breytt
samfélag.“ Forseti talaði einnig um að kirkjan ætti í harðri samkeppni um tíma og athygli
fólks. Þrír fjórðu hlutar þjóðarinnar eru meðlimir í þjóðkirkjunni og það er mikilvægt að
virkja þann stóra hóp. Hann kom einnig inn á að mikilvægt væri að samræma alla vinnu við
stefnumótun þjóðkirkjunnar á ólíkum sviðum, kynnast betur væntingum og viðhorfi þeirra
sem þiggja þjónustu kirkjunnar. Þá ræddi hann um samskiptin við ríkisvaldið og um fjármál
kirkjunnar. Í því samhengi minnti Magnús á að sóknargjöldin eru elstu félagsgjöld á Íslandi.
Allsherjarnefndin tekur undir orð Hönnu Birnu Kristjánsdóttur, innanríkisráðherra um
að við eigum sjálf að vera breytingin sem við boðum. Hún gat þess að sjálfstæði kirkjunnar
hafi aukist mikið undanfarin ár og svo yrði áfram. Þá kom innanríkisráðherra inn á óvægna
umræðu í samfélaginu og um mikilvægi þess að hlúa að trausti.
Einnig tekur nefndin heilshugar undir orð biskups þegar hún segir: „Kirkjan á að vera í
sókn.“ Biskupinn sagði að ljóst væri að almenningur vildi að erindi kirkjunnar heyrðist
og tók dæmi af umræðunni um morgun- og kvöldbænir á Rás 1. Það sýnir að fólki er alls
ekki sama. Biskup sagði einnig frá Landsmóti æskulýðsfélaga kirkjunnar sem haldið var á
Hvammstanga sl. helgi. Þar komu saman rúmlega 600 unglingar sem eru virkir þátttakendur
í kirkjulegu starfi um allt land. Þau eru vísbending um góða framtíð kirkjunnar.
Skálholt
Allsherjarnefnd hefur kynnt sér leigusamning um gisti- og veitingarekstur í Skálholti.
Samningurinn hefur verið tekinn til umfjöllunar en með tilliti til lagamarka virðir nefndin
ákvörðun kirkjuráðs. Nefndin væntir þess að samningurinn verði Skálholtsstað til eflingar.
Stefnumótun þjóðkirkjunnar
Allsherjarnefndin telur mikilvægt að unnið sé að heildarstefnumótun þjóðkirkjunnar.
Allsherjarnefndin hefur þegar hafið vinnu við sameiningu þeirra mála er tekin voru fyrir
á kirkjuþingi 2014 og varða stefnumótun og samstarf.
Skýrsla um fjármál og rekstur þjóðkirkjunnar
Allsherjarnefnd þakkar vinnuhópi um fjármál og rekstur þjóðkirkjunnar fyrir
yfirgripsmikla vinnu og hreinskiptar tillögur. Hvetur nefndin til þess að kirkjuráð hafi
tillögurnar til hliðsjónar við í þeirri viðleitni að ná jafnvægi í rekstri kirkjunnar.
Allsherjarnefnd þakkar fráfarandi kirkjuráði og kirkjuþingsmönnum fyrir vel unnin störf
þágu þjóðkirkjunnar.
Nefndin leggur til að skýrsla kirkjuráðs verði samþykkt með ályktun á þskj. 61.