Gerðir kirkjuþings - 01.01.2014, Qupperneq 71

71
Skýrsla um rekstur og fjármál
Þjóðkirkjunnar Unnið dagana 16.01-05.02.2014
1

Skýrsla vinnuhóps um fjármál Þjóðkirkjunnar

Á fimmtugasta. kirkjuþingi 2013 var lögð fram tillaga til þingsályktunar um skipun nefndar til að
vinna tillögur um rekstur og fjármál. Tillagan var svohljóðandi: „Kirkjuþing 2013 ályktar að
skipa þriggja manna nefnd sem fari yfir rekstur og fjármál kirkjunnar með það að markmiði að
ná jafnvægi í rekstri sem allra fyrst. Nefndin skal hefjast handa nú þegar og skila tillögum fyrir
lok janúar 2014 þannig að hægt sé að leggja hagræðingartillögur fyrir kirkjuþing í mars til
afgreiðslu. Kirkjumálasjóður greiði laun starfsmanns í fullu starfi fyrir nefndina í þrjá mánuði.“
Tillagan var lögð fyrir fjárhagsnefnd þingsins sem flutti ályktun sem samþykkt var, svohljóðandi:
„Kirkjuráð og starfsfólk Biskupsstofu hafa sinnt vel hlutverki sínu að mæta fordæmislausum
aðstæðum í rekstri þjóðkirkjunnar á tímum mikils samdráttar í tekjum. Fjárhagsnefnd telur rétt
að kirkjuþing skipi þriggja manna vinnuhóp er meti árangur og leiti nýrra leiða til þess að ná
jafnvægi í fjármálum þjóðkirkjunnar. Niðurstöður hópsins verða lagðar fyrir kirkjuráð sem
leggur á það endanlegt mat hvort þeim verði fylgt að fengnu samþykki kirkjuþings á vorþingi
2014. Kirkjuráð veitir nefndinni alla þjónustu og fjármuni til þess að sinna starfi sínu.“
Kirkjuþing kaus í vinnuhóp sem skipaður er eftirfarandi einstaklingum. Birna G. Konráðsdóttir
kirkjuþingsmaður, formaður. Guðmundur Einarsson formaður sóknarnefndar
Seltjarnarneskirkju, ritari, Þráinn Þorvaldsson sóknarnefndarmaður í Bústaðasókn
meðstjórnandi.
Þessi drög eru niðurstaða vinnuhópsins sem skipaður var samkvæmt ofanrituðum tillögum og
ályktunum. Hópurinn réði starfsmann, Andrés Kr. Konráðsson, er vann þær tölulegu upplýsingar
sem eru í skýrslunni. Vinnuhópurinn hefur talið það meginmarkmið sitt, eins og tillagan ber með
sér, að meta núverandi stöðu og koma með tillögur að leiðum þess að ná jafnvægi í fjármálum
þjóðkirkjunnar.

Meginvinnan fólst í því að afla tölulegra gagna um embættið ásamt viðtölum við lykilstarfsmenn
þess. Ákveðið var að miða við ársreikninga og tölur fyrir árið 2012 þar sem ekki þótti við hæfi að
íþyngja starfsmönnum meira á lokametrunum í uppgjöri fyrir árið 2013. Verður því að taka
öllum þeim tölum sem hér eru birtar með þeim fyrirvara um áorðnar breytingar frá þessum
tíma. Hinsvegar eru þær breytingar óverulegar að sögn starfsmanna embættisins

1. mál Fskj. F