Gripla - 20.12.2015, Side 165

165
akker an em wroek. vnde bath den byschop dat he got vor em bede dat he
ghesunt worde so wolde he em den akker wedder gheuen. dat dede he. do
waert he ghesunt. men he gaff em den akker nicht wedder. Dat was deme
byscoppe leed. vnde ghink in de kerke. vnde tobrack alle de lampen de in
der kerken weren vnde sprack. Jk wil nene lampen entfengen laten beth
syk god an syneme vyende ghewraken heft. Do vorhengede god dorch
sunte Andreas wyllen. dat de here kranker waert wen to vorne Do sande
he echtes to deme byscoppe. vnde bath dat he god vor em bede. so wolde he
em den akker wedder gheuen. edder eyn ander guet dat beter were dan de
akker. do sprak de byscop. jk hebbe eyns vor em ghebeden do vorhoerde
my god dorch syne gude. do leeth syk de man to deme byschoppe dregen.
vnde bath ene dat he in de kerken ginge vnde god vor em bede. dat dede
he. de wyle starff de man. Alzo wroek sunte andreas synen akker. [AM
667 V 4to 1vb ends]
Jd was eyn salich bischop de hadde sunte Andreas ghans leeff vnde
eerde ene alletijt. vnde he was syn apostel de hadde grote anuechtinge van
vnkusckheyt. vnde stunt eer doch wedder Des waert de vyent tornich. vnde
quam to em in ener iuncfrouwen staltnisse. vnde sprak. jk bin van konnynk-
liken gheslechte. vnde wolde gode gherne denen. darumme bidde yk iuw.
dat gy my eyn klene ghemack gheuen. dar yk gode moge ynne denen dat
entwydede eer de byscop. vnde bath se to ghaste. do settede de syk yeghen
den biscop to der tafelen. vnde makede syk yo lenck yo sconer. do krech
de byscp grote leue to eer. vnde hadde den willen he wolde mit eer sundi-
gen. vnde leeth den hoeff tosluten. Do quam sunte Andreas in pelegrymes
wyse vor de dore. vnde kloppede seer an. vnde sprak tho deme sluter he
wolde to deme byschoppe. Do dat de yuncfrouwe hoerde. do sprak se. men
scal ene nicht inlaten. he ensegge vns wat dat groteste wunder sy dat god
ye ghescapen heft. dat vraghede de sluter deme pelegryme do sprak sunte
Andreas. dat groteste wunder dat god ye ghescapen hefft. dat is dat god so
vele antlate ghescapen heft. vnde doch dat eyne anders ys wen dat ander.
vnde de eyne is vor deme anderen wol bekant. Do sprak de iuncfrouwe.
Latet ene vns noch ene vrage berichten. woer dat ertryke hogher sy wen de
hemmel. sunte Andreas sede. do got in der mynscheyt vpvoer. vnde set-
tede syk to der rechter hant synes vaders mit der mynschliken nature. daer
is dat ertryke hogher wen de hemmel. Do sprack echtes de yuncfrouwe.
Uraget em noch eyne vraghe. vnde laet ene dan hijr yn. ys dat he se berich-
LOW GeRmAN LeGeNds OF tHe APOstLes . . .
GRIPLA XXVI. - 12.12.B.indd 165 12/13/15 8:24:47 PM