Gripla - 20.12.2015, Page 170

GRIPLA170
waghen toryten. vnde worden den lycham dar affwerpende. vnde worden
de iunghere dodende. do trosteden syk de iunghere vp vnsen heren jesum
cristum. vnde ghingen vp den berch dar de ossen weren Dar was ein groet
drake vp deme berghe. deme ghynck vorghyft vth deme halze. do de iung-
here vp den berch quemen to deme draken. do makeden se eyn kruce van
holte. vnde leden dat deme draken vp syn lijff. vnde sneden ene dar mede
middene entwey. Darna leden se dat teken des hyllyghen kruces vp de rug-
ghen der wilden ossen in deme namen godes. do worden se tam als de
lammeken. vnde stelleden se do in den waghen. vnde leden den hylghen
lycham sunte Jacobs dar vp. do toghen ene de wylden ossen van ensuluest
mydden vp der konnynghynnen zael vor er. do vorschrack se sere. vnde
sach wol dat yd godes wylle was. vnde waert cristen. vnde leet ere pallas
gode to laue wygen. vnde dem hyllighen heren sune Jacob. vnde gaff vele
gudes to deme munster. vnde wart eyn gued salich mynsche. vnde bleef in
eneme guden salighen leuende beth an eren ende. Alzo wart de leue here
sunte jacob erliken bestedighet to Compostel in Hispanien lant. dar deyt
he grote tekene. vnde is ene grote varth to syneme hyllichdome. [AM 667
XI 4to 1vb ends]
to ener tijd was ein ryke man. de hadde lange nenen eruen. do bad he
sunte iacob mit groter andacht. dat he em enen eruen van gode vorworue.
vnde lauede em. wanneer de sulue erue to synen iaren queme. so wolde
he ene tho syneme graue bringen. do ghaff em god dorch sunte jacobs
willen enen schonen sone. Do nu de sone vpwusz. do ghynk he mit syn-
eme vader vth vnde wolden na sunte iacob gaen. Do quemen se in ene stat
de heet Gelfenach. vnde dar tereden se kostliken. Dat merkede de weert.
vnde dachte wo he se vmme ere gued brochte. vnde stak deme vader enen
sulueren beker des nachtes in synen sak. Unde do se des morghens wech
weren ghegaen. do leet en de weert na rijden. vnde sprak se hadden em syn-
en sulueren beker ghestalen. vnde nam deme vader den beker vth syneme
sakke. vnde sprak to em he moste darumme steruen. do sprak de sone.
jk bekenne mynen vader wol so vraem. dat yd beter is dat yk sterue wen
he. darumme bidde yk dat gy my vor ene doden. dat deden se. do he sik
dat suluen vtherkoren hadde vnde hingen den sone dat sach de vader mit
synen oghen. do wart he bedrouet. vnde claghede syn herteleed deme leuen
heren sunte iacob vnde ghink vor syck to syneme munster. Unde do he dar
quam. do reep he sunte iacob mit groter andacht an. vnde sprak. Hylghe
GRIPLA XXVI. - 12.12.B.indd 170 12/13/15 8:24:48 PM