Gripla - 20.12.2015, Page 176

GRIPLA176
stat jerapolim van den vnlouighen mynschen. vnde waert an ein kruce ghe-
henget alze syn meyster cristus den he preddykede. vnde waert begrauen
mit synen beyden dochteren. de ene to der vorderen syden. de anderen to
der luchtere.
Jd was ok een van den .vij. diaconen de hete ok Philippus. de hadde .iiij.
dochtere dede hillich weren desse Philippus dede ok grote wunderwerk in
deme namen Jhesu christi. to desseme quam de engel vnde sprak Phillippe
sta vp vnde gha in dat land. dar de sunne to goade gheyt. vp den wech in
Gazam. Dat dede he. Do quam em ein iunk konnynk [AM 667 V 4to
4vb ends] entieghen vth morland. de hadde to jherusalem ghewest vnde
hadde god anghebedet. vnde sath vp synen waghen. vnde wolde wedder
to hus varen vnde las ysaiam den propheten. do sprak de hylligheghest to
sunte Philippo. Philippe gha to deme waghen. vnde hore. he lest ysaiam
den propheten. dat dede he. do sprak sunte Philippus to deme iunghen
konnynghe Westu wol wat du lest. Do sprak de konnink Neen. vnde bad
sunte Philippum dat he tho em in den waghen queme. vnde em dat lerede
Dat dede he. do las he wente dar He wart to deme dode gheuoret alze
ein lam dat dar swyghed vor deme de dat dodet. vnde synen mund nee vp
ghedaen heft. syn gherichte heft he gheleden myt othmodycheyt. do sprak
de iunghe konnink. Uan welkeme propheten sprikt he dat. van eneme an-
deren. edder van syk suluen. do lede em sunte Philippus vth wat he hadde
ghelezen. vnde makede em vnsen leuen heren jhesum cristum bekant. vnde
lerede em den cristenen louen. Unde do se alzo vp deme waghene voren. do
quemen se to eneme watere. Do vraghede de iunghe konnink. vnde sprak.
Seet dar is eyn water. we mach my nu dar ynne dopen. do sprak sunte
Philippus. Louestu van ganczen herten. so sprek. jck loue dat jhesus cristus
de ware god is Do ghingen se beyde in dat water. vnde sunte Philippus
dofte den iunghen konnink. vnde do he vth der dope ghink. do quam de
hylligheghest. vnde nam sunte Philippum to syk. vnde de iunghe konnink
sach ene nicht meer. vnde he voer myt groten vrouden to hus. vnde sunte
Philippus waert ghevunden in der stad destico. vnde preddykede den
cristen louen in allen steden. so lange dat he quam in Cesariam. dar lerede
he ok deme volke den cristenen louen myt groteme vlyte. O hyllighe apostel
godes sunte philippe. wy bidden dy. dattu vns van gode vorweruest vnses
leuendes eyn gud salich ende.
GRIPLA XXVI. - 12.12.B.indd 176 12/13/15 8:24:49 PM