Gripla - 20.12.2015, Page 178

GRIPLA178
dat seggen de bozengheste van em. de beseten hebben de mynschen. dat he
allene god sy in deme hemmele vnde in der erden. do sprak de leue sunte
Marcus. Den god bekenne yk wol. vnde yk loue an em. vnde dene em alle
tijt. vnde byn syn knecht. Wult du den louen weten. den wil yk dy gherne
leren. do sede he des byn yk ghans vro. [AM 667 V 4vo 5vb ends] do
sede de leue sunte marcus. du schalt louen dat he gheboren sy van ener
reynen iuncfrouwen. vnde vmme vnsen willen is ghestoruen. vnde is in
deme pasche daghe wedder vp ghestan van deme dode. vnde is dar na to
hemmele gheuaren. dessen louen schalt du dy nemande laten berouen.
noch dorch drouwe. noch dorch des richters pyne. du scalt eer steruen. so
besittet dyne zele de ewyghe vroude. Do dat sunte Marcus sprak. do sach
he des meysters lame hand an. vnde sprak syne hyllighe benediginghe dar
ouer vnde he waert ghesunt. Do vel de meister em to vote. vnde bad dat
he ene dofte. Do dofte ene de leue sunte Marcus. vnde syn wijf. vnde syne
kyndere. vnde alle syn husghesynde.
unse leue here Cristus dede vele wunderwerke vnde tekene dorch den
hillighen bisscop sunte marcum in deme lande. vnde bekerede dat lant
alle to gode. vnde wygede dar suluest vele bysscope vnde prestere. vnde
dyaken. vnde subdyaken ouer alle dat lant vnde beuoel en dat se deme
cristene louen scolden vaste bystaen. dar na voer sunte Marcus wedder to
Uenedien. vnde de venedigers hadden wol ghehort dat sunte marcus hadde
vele volkes bekeret. vnde sanden na eme. vnde beden ene dat he en ock
den cristene louen lerede. vnde se dofte. wente se hadden de grote tekene
ghehort. de vnse here jhesus in jherusalem ghedaen hadde. do lerede en
sunte marcus den cristene louen vnde dofte se alle myt der hulpe godes.
Do nu de loue bestedighet waert. do settede he vele presters in de stat. vnde
beuoel en. dat se den cristen louen scolden enen yewelken leren. vnde pred-
diken. vnde toch do in egypten. dar dede he ok grote tekene. vnde bekerede
vele mynschen in der stat vnde in deme lande mit syner guden lere. vnde
vorstorede de affgode. vnde makede vele mynschen ghesunt. de dar krank
weren in deme lande. vnde beuestighede den cristene louen ghans wol
vnde de bozengheste vloen vor syne hyllighe worde. vnde vor syn hyllyghe
leuent. Dar na quam he in Alexandrien. vnde wygede Amanum tho eneme
bisscope. vnde wygede dre prestere. vnde souen diaken. vnde lerede en
den cristene louen. vnde bekerede ock de stat. vnde scheydede do van dar.
Do quam he to Penthapolim. dar weren ok vele heyden. vnde lerede en dar
GRIPLA XXVI. - 12.12.B.indd 178 12/13/15 8:24:49 PM