Gripla - 20.12.2015, Blaðsíða 180

GRIPLA180
cristen vnde begrouen den lycham myt werdicheyt in de kerke. Do schegen
dar vele tekene dat id vele mynschen seghen. wente de leue sunte marcus
was de erste hyllighe in Alexandria. vnde god deyt noch vele gnade den
mynschen dorch synen willen.
to ener tijd quemen vele koplude in Alexandria van Uenedige. do
men screeff na christus boert .cccclxviij. Do de koplude quemen to den
twen presteren de sunte marcus bewareden. de beden se ghans vlytliken.
dat se em sunte marcus licham gheuen. vnde dat se seggen scolden. dat se
nicht enwysten wor he bleuen were. vnde gheuen en so vele gudes. dat se
dat deden. do se den lycham vth deme graue nemen. do waert de stad so
vul gudes rokes. dat syk alle mynschen vorwunderden wor de gude roke
her queme Do worden de koplude ghans vro dat se den hyllighen lycham
hadden. vnde vorden den mit vrouden in dat schyp. Do quemen en entieg-
hen ander lude vp eneme anderen schepe. de vragheden en wat se vorden.
se seden. des leuen heren sunte marcus lycham. do sprak eyn van en. men
heft iuw vorwar eues heydens lycham gheuen. vnde gy menen dat sy sunte
marcus lycham. do kerede syk dat schyp vmme. dar sunte marcus lycham
inne was. vnde leep van syk suluen an dat ander schyp dar he inne was de
dat ghespraken hadde. vnde tobrak dat schyp en ener syde. vnde leet nicht
aff. bet so lange dat se altomale repen. Wy louen dat de lycham des leuen
sunte marcus hijr is.
Dar na enes nachtes quam eyn groet storm vnde vnwedder. dat se men-
den se scholden vorgaen de se den licham vorden. vnde dat schip schuddede
syk ghans sere. wente id nach vnde duster was. darumme wysten de koplu-
de nicht wor se varen scolden. vnde weren in groten sorghen do openbarde
syk sunte marcus eneme monnike. de synen lycham bewarde. vnde sprak
segge drade den luden dat se dat segel nedder leggen wente se synt nicht
verne van deme lande. dat deden se. Do weren se by eneme eylande. dar
na quemen se to Uenedige. vnde wolden sunte marcus lycham hemelyken
hebben vorborghen. do quemen de lantlude vnde repen alle Ach salich synt
gy de den hyllighen lycham sunte marcus hebben ghebrocht. ghunnet vns
dat wy ene vlytlyken lauen vnde eme ere beden.
Dar na was eyn schypman. de louede nicht dat sunte marcus lycham dar
were. do voer de duuel in em. vnde was also lange beseten dat he dat louede
vnde openbar bekande. do wart he vorlozet. vnde louede gode. vnde hadde
sunte marcus sere leef. vnde erede ene.
GRIPLA XXVI. - 12.12.B.indd 180 12/13/15 8:24:50 PM