Breiðfirðingur - 01.04.1998, Side 44

42
BREIÐFIRÐINGUR
í Oddbjarnarskeri hefði orðið fyrir skemmdum og fékk því að
fara með Hafsteini í Flatey út í Sker 4/7 1996. Með Hafsteini
var Hallbjörn Bergmann ásamt fleira fólki og hjálpaði Hall-
björn mér við að mæla hólinn. Reyndist hann vera: frá austri
til vesturs 109 m á lengd og frá norðri til suðurs 101 m á
breidd. Skerhóllinn hefur því litlum breytingum tekið frá fyrra
ári en þó má sjá ummerki stóra brimsins frá í febrúar. Sú
breyting hefur orðið á grasbrúninni að hún er nú brattari að
sunnan og suðaustan. Skeljasandsbeltið virðist nokkuð á
hreyfingu en það skolast ekki í burtu. Sjást því engin feigðar-
merki á hólnum þótt Ægir konungur flagri um hann óþyrmi-
lega.
Einir verbúðarveggir eru enn nokkuð vel uppistandandi
suðaustan til á hólnum þar sem hann er einna hæstur, mun það
vera verbúð Snæbjamar í Hergilsey. Ekki hefur þar verið mikið
húsrúm fyrir heila skipshöfn. Stærð hennar er nú 4,7 x 4,2 m
innanmál veggja. Má vera að hún sé nú eitthvað sigin saman.
Hóllinn er allur sundurgrafinn af lundaholum og er mjög
erfitt að ganga um hann vegna þess að nú er engin grasrót á
honum, aðeins melgresi og jarðvegurinn svo laus að maður
stígur víða í gegnum sandlagið og ofan í lundaholumar og
melgresið nær meðalmanni vel í klof. Hvergi sést að vatn geti
tollað á hólnum en austur á Vatnasteinum bunar heitt vatn upp
úr klöppinni eins og gert hefur svo lengi sem sögur herma.
Mæling 1997
Þann 10. febrúar 1997 gerði haugabrim á Breiðafirði og gekk
sjór þá á land og olli brimið skemmdum á Silfurgarðinum í
Flatey og reif upp sjávargrundir á vestanverðri Sýrey og braut
upp jarðveg á Flatey og víðar í Eyjunum.
Eg hafði því mikinn hug á að komast út í Oddbjamarsker
og sjá hvað þar hefði gerst í þessu mikla brimi. Það var svo
þann 13. júlí að ég fór með Hafsteini Guðmundssyni í Flatey
út í Oddbjarnarsker. Var þar orðin æðimikil breyting á frá því
að ég mældi það 4. júlí 1996.