Sjómannablaðið Víkingur - 01.03.2012, Blaðsíða 43

Sjómannablaðið Víkingur – 43
farþegum og eyjaskeggjum en í bréfi sínu ber hann það af sér.
Segir hann að það hafi verið af sinni eðlislægni, sinni reynslu
og þekkingu á hafinu sem guðshöndin leiddi hann að strönd-
inni. Segir hann að samskiptamistök milli skipverja hafi orðið
til að skipið rakst í klettinn. Þá sagðist hann ekki vera neinn
heigull, forgangsmálið var ekki að finna sökudólg heldur að
höndla ástandið án þess að tapa áttum. Varðandi ótímabæra
brottför hans úr skipinu sagði hann að skipið væri besta björg-
unarfarið en hann hefði beðið þar til fjaraði á strandstaðnum.
Þótt Schettino skipstjóri eigi vart eftir að sigla skemmtiferða-
skipum framtíðarinnar er víst að nafn hans er nú ritað á spjald
sögunnar líkt og kollega hans, Smith á Titanic.
Nýr risi í uppsiglingu
Suður-Arabísku olíuskipaútgerðirnar Bahri og Vela eru með
áætlanir um sameiningu sem mun gera hina nýju útgerð að
fjórðu stærstu tankskipaútgerð heims. Samruni sem þessi er af
stærðargráðu upp á 1,3 milljarða bandaríkjadala sem fyrrnefnda
útgerðin ætlar að greiða fyrir Vela. Verður samanlagður skipa-
floti upp á 77 tankskip. Stærst þeirra eru 32 risaolíuskip (VLCC),
þá koma 20 efnaflutningaskip, 5 olíuflutningaskip, 4 ekjuskip
og 16 minni skip. Samanlagður sjómannafjöldi þessa beggja risa
eru rúmlega 2100 og landstarfsmenn um 500 talsins.
Sjóránin
Á þessum síðum hefur í fjölda ára verið mikið fjallað um sjó-
rán, fyrst á Suður Kínahafi en í seinni tíð við strendur Sómalíu.
Því miður bendir lítið til þess að breytinga sé að vænta í þá
veru að útrýma vágestunum sem bíða eftir að ná til sjómanna
og skipa þeirra. Sex manna áhöfn flutningaskipsins Leopard frá
Kaupmannahöfn hefur verið í haldi sjóræningja í eitt og hálft
ár. Hefur útgerð skipsins óskað eftir að dregið verði úr umfjöll-
un um ránið í fjölmiðlum þar sem málið væri á afar viðkvæmu
stigi og róið væri að því öllum árum að frelsa skipverja. Það er
með öllu ómögulegt að setja sig í spor þeirra manna sem eru
numdir á brott úr skipum sínum og haldið föngnum í afskekkt-
um þorpum í fjöllum Sómalíu.
Kílarskurðurinn
Skipamiðlarar eru að ókyrrast vegna ástands Kílarskurðarins.
Um miðjan ágúst varð bilun í lokunum í Holtenau sem olli
miklum töfum og bentu skipamiðlarar á þau áhrif sem lang-
varandi lokum skurðarins gæti haft í för með sér. Á síðasta ári
biluðu lokurnar í Brunsbüttel og má rekja þessar bilanir til lé-
legs viðhalds. Krefjast skipamiðlararnir þess að þýska stjórnin
grípi í taumana og tryggi rekstraröryggi skurðarins sem og að
hefja þegar stækkun hans svo stærri skip geti siglt þessa mikil-
vægu skipaleið. Á síðasta ári fóru 17.351 skip um skurðin en á
fyrstu sex mánuðum þessa ár hafa 52,3 milljónir tonna verið
flutt eftir skurðinum.
Tækifærin í kreppunni
Í viðskipafræðinni segir að gott sé að kaupa ódýrt og selja dýrt.
Þessi regla hefur gert marga útgerðarmenn ríka þar sem þeir
hafa nýtt sér krepputíma í að kaupa skip og selt aftur á upp-
gangstímum. Þessi aðferðarfræði gerði gríska skipakónga eins
og Onassis og Livornos að þeim risum sem þeir urðu og nú
bendir margt til þess að leikurinn sé að endurtaka sig. Þrátt
fyrir kreppuna í Grikklandi hafa þarlendir útgerðarmenn keypt
á sjö mánuðum þessa árs hvorki meira né minna en 111 skip
fyrir 2,1 milljarð dollara. Á síðasta ári keyptu Grikkirnir 98
skip fyrir samanlagt 2,6 milljarða dollara þannig að hér er um
umtalsverða aukningu að ræða. Af skipakaupum þessa árs
hefur farið milljarður dollara í kaup á stórflutningaskipum, 600
milljónir dollara í tankskip og 480 milljónir dollara í gámaskip.
Nærst stærstir í kaupum og sölu kaupskipa eru kínverskir
útgerðarmenn sem þegar hafa keypt 62 skip fyrir 565 milljónir
dollara.
Endurnýting gáma
Það er ýmislegt sem hægt er að nýta gamla gáma til. Víða má
sjá gáma sem hafa lokið hlutverkum sínum og eru hættir að
ferðast með skipum, lestum og trukkum heimshorna á milli
hlaðnir vörum. Dótturfyrirtæki A.P. Möller í Suður-Afríku,
Safmarine, hefur í samstarfi við samstarfsaðila komið á verkefni
sem þeir kalla „Sport in a box“ þar sem þeir finna gömlu gám-
unum ný verkefni fyrir fátæk byggðarlög í Suður Afríku. Þeir
hafa breytt gámunum í búningsklefa eða klúbbhús fyrir hin
ýmsu íþróttafélög sem ekki hafa ráð á að koma sér upp aðstöðu
fyrir félagsmenn. Þetta er þó ekki í fyrsta sinn sem þeir hafa
gefið gáma því á síðustu 20 árum hafa þeir gefið yfir 8.000
gáma til nota fyrir bókasöfn, búsetu eða til skóla til ýmissa af-
nota. Sá sem þetta skrifar leitaði einmitt til þessarar útgerðar
fyrir namibískan skóla og fékk þar sex gáma gefna til skóla-
starfs. Þannig öðlast gámarnir sannarlega nýtt líf.
Google í skipavöktun
Miklar umræður hafa verið um réttmæti þess hvort eigi að vera
hægt að skoða staðsetningu skipa á netinu og hafa menn þar
deilt á grísku síðuna Marinetraffic.com. Brátt verður breyting á
þar sem enn öflugri upplýsingakerfi um staðsetningu skipa eru
í burðarliðnum. Nú er það Google risinn sem er með með áætl-
un um að gera kort af öllum höfum og landgrunnum. Hafa þeir
greitt 3 milljónir bandaríkjadala fyrir gervitunglatækni sem þeir
ætla að nota til að fylgjast með ferðum skipa og sérstaklega her-
skipa mun betur en yfirvöld geta gert nú. Veldur þetta mörgum
hernaðarríkjum miklum áhyggjum þar sem til stendur að stað-
setningar herskipa muni verða aðgengilegar almenningi. Yfir-
maður tæknideildar Google sagðist vera í þeirri stöðu að geta
fylgst með ferðum herskipa og það valdi honum áhyggjum að
vita til þess að þau geta ekki séð hvort annað þar sem þau noti
ekki AIS eins og önnur skip. Hinsvegar sjá skip búin AIS til
hvors annars í um 20-30 sjómílna fjarlægð. Með gervitungla-
áætlun Google munu þeir fylgjast með skipum um öll heims-
höfin og hafa þeir meðal annars sýnt fram á færni kerfisins að
upplýsa stjórnvöld í Bandaríkjunum um fiskiskip að ólöglegum
veiðum á svæðum langt utan eftirlitssvæða þeirra. Nú er að sjá
hvort í framtíðinni verði hægt í gegnum internetið að fylgjast
með herskipum í á öllum heimshöfunum.
Stefndi útgerð
Nýlega hafnaði dómari í Florida frávísunarkröfu Princess Cruis-
es skipafélagsins í máli sem panamíski fiskimaðurinn Adrian
Vasquez höfðaði gegn útgerðinni eftir að skip útgerðarinnar
Star Princess sigldi framhjá bát sem hann var í. Þetta gerðist 10.
mars s.l. en þá hafði Adrian verið á reki í rúman hálfan mánuð
ásamt tveimur öðrum skipverjum. Honum var ekki bjargað fyrr
en 24. mars, nærri Galapagoseyjum, en þá voru báðir skips-