Morgunblaðið - 31.12.2022, Blaðsíða 16

16 MORGUNBLAÐIÐ TÍMAMÓT 31.12.2022
Ljósmynd/Szilvia Micheller
Íslensku landsliðsmennirnir fagna sætum stórsigri á Frökkum á Evrópumótinu í Búdapest í janúarmánuði 2022.
Ljósmynd/Szilvia Micheller
Viktor Gísli Hallgrímsson var valinn efnilegasti markmaður heims.
Ljósmynd/Szilvia Micheller
Ómar Ingi Magnússon er kominn í hóp þeirra bestu í heiminum.
Innistæða fyrir bjartsýninni?
Mörg ár eru liðin síðan jafn mikil
spenna hefur ríkt í samfélaginu fyrir
þátttöku íslenska karlalandsliðsins í
handbolta á stórmóti og finna hefur
mátt fyrir að undanförnu.
VÍÐIR SIGURÐSSON
hefur verið fréttastjóri íþróttafrétta á Morgunblað-
inu og mbl.is frá 2008 og starfað hjá Árvakri frá
2000. Áður var hann íþróttafréttamaður hjá DV,
Þjóðviljanum og Dagblaðinu.
Eftir góða frammistöðu á Evrópumótinu í
Ungverjalandi og Slóvakíu í janúar 2022 þar
sem Ísland lagði sterka mótherja á borð við
Portúgal, Ungverjaland og Frakkland að velli,
þrátt fyrir stöðugt fleiri forföll vegna kórónu-
veirusmita, hafa margir orðið til þess að spá
Guðmundi Þ. Guðmundssyni og hans mönnum
enn betra gengi á heimsmeistaramótinu sem
hefst í Svíþjóð og Póllandi 11. janúar.
Þeir bjartsýnustu tala um raunhæfa möguleika
á verðlaunasæti. Handboltaáhugamenn ætla að
fjölmenna á leiki Íslands í Kristianstad og Gauta-
borg og ljóst er að langt er síðan stuðningur við
liðið á stórmóti erlendis hefur verið jafnöflugur
og útlit er fyrir á leikjunum í Svíþjóð.
Er innistæða fyrir þessari miklu bjartsýni?
Eigum við landslið í dag sem getur fetað í fótspor
„gullaldarliðsins“ sem náði í silfur á Ólympíuleik-
unum í Peking 2008 og brons á Evrópumótinu í
Austurríki 2010? Eða í það minnsta endað eina
ferðina enn í hópi sex efstu liða á stórmóti?
Það fer ekki á milli mála að íslenska lands-
liðið er á réttri leið og það var afrek að ná
sjötta sætinu á Evrópumótinu 2022. Þar komst
Ísland í fyrsta skipti í átta ár í hóp sex efstu
liðanna á stórmóti en það er lengsti biðtíminn
eftir slíkum árangri frá því íslenska handbolta-
ævintýrið hófst fyrir alvöru með sjötta sætinu
á Ólympíuleikunum í Los Angeles árið 1984.
Tvö lykilatriði vega þungt
Tvö lykilatriði vega þungt hjá íslenska
landsliðinu í dag og gefa fyrirheit um að það
geti náð stigvaxandi árangri á næstu árum.
Annars vegar er stærsti hluti leikmannanna
á mjög góðum aldri. Þeir eru flestir á aldrin-
um 22-28 ára og eiga því möguleika á að eiga
langan og farsælan feril fyrir höndum.
Hins vegar eru flestir þeirra á mála hjá mjög
sterkum félagsliðum í Evrópu. Átta leikmenn í
hópnum sem fer á HM spila í þýsku 1. deildinni,
sem er tvímælalaust sterkasta deild heims,
og hinir spila í Frakklandi, Danmörku og
Ungverjalandi og með toppliðum í Noregi og
Sviss. Einn með Íslands- og bikarmeisturum
Vals sem hafa gert það gott í Evrópudeildinni
í vetur.
Fimm landsliðsmannanna sem eru á leið til
Svíþjóðar leika með liðum sem spila í Meist-
aradeild Evrópu í vetur en í þeirri keppni eru
aðeins sextán af bestu liðum álfunnar.
Íslenska landsliðið hefur sennilega sjaldan
eða aldrei átt jafn breiðan hóp leikmanna sem
spila með félagsliðum í fremstu röð í Evrópu,
og þar með í heiminum.
Öflugt byrjunarlið
Skoðum aðeins byrjunarliðið sem Guðmund-
ur getur stillt upp í fyrsta leik á HM í Svíþjóð:
Markmaður: Viktor Gísli Hallgrímsson, 21
árs og leikur með Nantes sem er í 3. sæti í
Frakklandi og í 3. sæti í sínum riðli í Meistara-
deildinni.
Vinstra horn: Bjarki Már Elísson, 32 ára og
leikur með Veszprém sem er efst í Ungverja-
landi og í 2. sæti í sínum riðli í Meistara-
deildinni.
Vinstri skytta: Aron Pálmarsson, 32 ára og
leikur með Aalborg sem er í 2. sæti í Dan-
mörku og í 6. sæti í sínum riðli í Meistara-
deildinni.
Miðjumaður: Gísli Þorgeir Kristjánsson, 23 ára
og leikur með Þýskalands- og heimsmeisturum
Magdeburg sem eru í 4. sæti í Þýskalandi og í 3.
sæti í sínum riðli í Meistaradeildinni.
Hægri skytta: Ómar Ingi Magnússon, 25 ára,
samherji Gísla hjá Magdeburg sem var kjörinn
besti leikmaður þýsku 1. deildarinnar á síðasta
tímabili og varð næstmarkahæstur, ásamt því
að verða markakóngur EM 2022.
Hægra horn: Sigvaldi Björn Guðjónsson, 28
ára og leikur með Kolstad sem hefur unnið alla
leiki sína í norsku úrvalsdeildinni í vetur.
Lína: Ýmir Örn Gíslason, 25 ára og leikur
með Rhein-Neckar Löwen sem er í 3. sæti í
Þýskalandi.
Síðan er hægt að stilla upp byrjunarliði
númer tvö og í því gætu verið Björgvin Páll
Gústavsson, Hákon Daði Styrmisson, Elvar
Örn Jónsson, Janus Daði Smárason, Viggó
Kristjánsson, Óðinn Ríkharðsson og Arnar
Freyr Arnarsson.
Góð blanda af þessum tveimur liðum, auk
öflugra manna sem einnig eru í hópnum,
Ólafs Guðmundssonar, Elvars Ásgeirssonar,
Kristjáns Arnar Kristjánssonar og Elliða Snæs
Viðarssonar, er vissulega til þess fallin að auka
tiltrú handboltaáhugafólks á því að landsliðið í
dag geti komist í allra fremstu röð.
Tíu sinnum meðal sex bestu
Væntingar eru eitt, frammistaða er ann-
að. Ísland hefur verið framarlega í flokki í
heiminum, tiltölulega samfleytt, frá árinu 1984.
Frá þeim tíma hefur íslenska karlalandsliðið
tíu sinnum hafnað í sjötta sæti eða ofar á
einhverju stórmótanna þriggja, Ólympíuleik-
um, Evrópukeppni og heimsmeistarakeppni.
Áður náði Ísland sjötta sæti á HM árið 1961 og
stimplaði sig þá inn í hóp handboltaþjóða þótt
biðin eftir sambærilegum árangri yrði löng.
Fjórum sinnum hefur Ísland komist í undan-
úrslit, tvisvar á Ólympíuleikum og tvisvar í
Evrópukeppni. Á heimsmeistaramótinu er hins
vegar fimmta sætið enn sem komið er besti ár-
angur Íslands frá upphafi en þeim áfanga náði
liðið árið 1997, í Kumamoto í Japan. Inn á milli
hafa síðan komið stórmót þar sem væntingarn-
ar voru gríðarlega miklar en liðið náði síðan
ekki að standa undir þeim.
Ómar tekinn við af Ólafi
Núverandi landsliðsmenn geta eftir sem
áður horft til árangurs forvera sinna, mátað
sig við þá og mætt til leiks á HM með það að
keppikefli að ná svipuðum eða betri árangri.
Rétt eins og þegar Ólafur Stefánsson fór fyrir
íslenska liðinu sem komst tvisvar á verðlauna-
pall og var einn besti leikmaður heims, er
örvhent skytta í forystuhlutverkinu. Nú er það
Ómar Ingi Magnússon, sem hefur víða verið
settur í hóp fimm til tíu bestu handboltamanna
heims um þessar mundir, og þó hann sé ólíkur
Ólafi sem leikmaður og karakter þá er hann á
sama hátt sá sem getur dregið vagninn og gert
samherja sína betri.
Liðið þarf að fara vel af stað á HM. Fyrstu
tveir leikirnir, gegn Portúgal og Ungverjalandi,
eru lykilleikirnir, því ef allt þróast á eðlilegan
hátt tekur liðið úrslitin í þeim með sér í milli-
riðilinn. Þar verða Evrópumeistarar Svíþjóðar
og Suður-Ameríkumeistarar Brasilíu stóru
hindranirnar. Til að komast í átta liða úrslit,
og sýna að það hafi verið innistæða fyrir bjart-
sýninni, þarf íslenska liðið líklega að vinna þrjá
af þessum fjórum leikjum, og má ekki misstíga
sig gegn lægra skrifuðum mótherjum.
TÍMAMÓT HEIMSMEISTARAMÓT KARLA Í HANDBOLTA FER FRAM Í JANÚAR OG MARGIR SPÁ ÍSLANDI GÓÐU GENGI
Tvö lykilatriði vega þungt hjá íslenska
landsliðinu í dag og gefa fyrirheit um að það
geti náð stigvaxandi árangri á næstu árum.