AVS. Arkitektúr verktækni skipulag - 01.03.1994, Side 33

Alltof oft hafa framkvæmdaaðilar á íslandi
kastað höndunum til hönnunar á mann
virkjum sem hafa mjög mikil áhrif á
umhverfi á stórum svæðum, bæði í
þéttbýli og í dreifbýli. Oft eru þessi mannvirki ákveðin
og hönnuð af fólki sem hefur ekki hlotið neina
fagurfræðilega menntun og gerir sér hvorki grein fyrir
því hve miklum umhverfisspjöllum slík mannvirki geta
valdið eða hve mikil staðarprýði vel hannað mannvirki
getur verið ef vel er að því staðið. Það er því sérstakt
ánægjuefni þegar framkvæmdaaðilar hjá
Reykjavíkurborg setja metnað sinn í að láta hanna
frárennslisdælustöðvar það skemmtilega að athygli
veki bæði hér á landi og erlendis.
Nú þegar hafa þrjár dælustöðvar verið byggðar og
teknar i notkun hjá Reykjavíkurborg. Tvær eru við
Sæbraut, annars vegar á mótum Laugalækjar, en
hins vegar á milli Klapparstígs og Ingólfsstrætis.
Þriðja dælustöðin stendur fyrir utan Faxaskjól. Björn
Stefán Hallsson arkitekt hefur annast hönnun þessara
dælustöðva, þá síðustu í samstarfi við Jón Þór
Þorvaldsson arkitekt.
Dælustöðvarnar allar eru einangruð mannvirki í jaðri
byggðar sem þegar hefur verið mótuð og sem nýtur
fagurs útsýnis yfir hafflötinn og til fjalla. Með virðingu
fyrir umhverfisþáttum var það markmið við hönnun
allra dælustöðvanna að þær láti lítið yfir sér í
umhverfinu, en hafi jafnframt ákveðna arkitektóníska
æisn. í ytra efnisvali er höfðað til þeirrar reisnar sem
býr í náttúru umhverfisins og útsýninu við hverja
dælustöð fyrir sig. í efninu og formi mannvirkjanna
er jafnframt skírskotað til fornrar byggingarhefðar
okkar hvað varðar notkun torfs og grjóts og þess
óendanleika sem í þeim efnum býr. ■
31