Bændablaðið - 04.04.2023, Síða 24

24 Bændablaðið | Þriðjudagur 4. apríl 2023
Viðtökur á efni leikfélagsins Hugleiks hafa ætíð verið
frábærar, sumar frábærari en aðrar, sbr. þessa stuttfrétt
haustið 1998 í tbl. Degi.
Leikfélagið Hugleikur var stofnað í
Reykjavík það herrans ár 1984 og
því elsti starfandi áhugaleikhópur
Reykjavíkur, nú á leið inn í sitt
fertugasta aldursár.
Nafnið Hugleikur er fengið úr
Heimskringlu þar sem konungi
nokkrum að nafni Hugleikur er lýst
á þann hátt að hann hafi „auðugur
verið mjög og sínkur af fé, hafði í
hirð sinni alls konar leikara, harpara
og gígjara og fiðlara; hann hafði og
með sér seiðmenn og alls konar
fjölkunnugt fólk“. Litskrúðugur
semsé og hressilegur – líkt og
leikfélög eiga að vera!
Íslensk frumsamin verk
Leikhópurinn hefur þá sérstöðu
meðal íslenskra leikfélaga að þau
verk sem fara á svið eru nær öll
samin af meðlimum félagsins, auk
þess sem umfjöllunarefnið er oftar
en ekki sprottið úr íslensku þjóðlífi.
Vitnað er í sögu þjóðarinnar,
þjóðsagnaarfinn og gullaldar-
bókmenntirnar, en einnig stinga
nútímalegri verk upp kollinum af
og til. Tugi leikrita í fullri lengd og
hundruð stuttverka standa eftir hópinn
en auk áherslu á íslensk, frumsamin
verk hefur söngur og tónlist jafnan
sett svip sinn á sýningarnar.
Gaman er því að segja frá því
að mörg leikrit félagsmanna hafa
verið tekin til sýninga hjá öðrum
áhugaleikfélögum um land allt.
Leikhópur Hugleiks hefur reynt
að þróa sérstakan stíl innan sinna
vébanda sem nefndur hefur verið
hugleikskur leikmáti eða bara
hugleikska – en þó hefur þótt
erfiðleikum bundið að skilgreina
þann ritstíl og leikmáta. Samkvæmt
vefsíðu félagsins kemur fram að
skilgreiningin felist í „togstreitu
milli hefðar og nýsköpunar eða
skerspennum milli nútímalegra
spunakenninga og húmanískra
leiklausna.“
Árið 2006 fékk leikfélagið
Hugleikur viðurkenningu á degi
íslenskrar tungu, auk þess sem
leiksýningin Rokk var valin athyglis-
verðasta áhugaleiksýningin 2009-
10 af Þjóðleikhúsinu. Fjórum árum
síðar hlaut 30 ára afmælissýning
félagsins, Stund milli stríða, sömu
viðurkenningu, eða árið 2014. Svo
stiklað sé á stóru er áhugavert að geta
sýningar leikkonunnar og skáldsins
Júlíu Hannam, en fyrir síðustu
áramót sýndi Hugleikur stuttverkin
„Í öruggum heimi“, nokkra bestu
stuttþætti hennar með einvala liði
leikara og leikstjóra.
Fertugasta afmælisár Hugleiks
Eins og staðan er núna er formaður
Hugleiks, Sesselja Traustadóttir,
afar spennt fyrir komandi ári.
Styrkur var veittur þeim til handa
frá Reykjavíkurborg vegna afmælis-
ársins – sem þau eru afar þakklát
fyrir og sjá því fram á glaum og gleði
árið á enda.
Nú um miðjan apríl, þann 15.
nánar tiltekið, frumsýnir Hugleikur
verkið Húsfélagið í leikhúsi
Kópavogs, Funalind 2, þar sem án
efa verður glatt á hjalla, enda fyrsta
leiksýning félagsins síðan árið 2019.
Aðalpersónur verksins eru þau
nafntoguðu Gunnar, Njáll, Bergþóra
og Hallgerður ... en þau eru ekki ein
í húsfélaginu enda verða á sviðinu
tólf persónur ásamt hljómsveit.
Fjallar Húsfélagið, jú, um
húsfélag þar sem margar mikilvægar
ákvarðanir þarf að taka – af alls konar
mismunandi fólki á mismunandi
stöðum í lífinu. Meðal annars verður
svo ruslaflokkunarsöngur sunginn
af hjartans lyst, áhorfendum til
skemmtunar og allvíst að sviðið
muni iða af lífi.
Dans og söngur eru í stóru
hlutverki, sitt lítið af hverju fyrir
auga og eyra. Leikstjóri verksins,
Gunnar Björn Gunnarsson, beitir
þar töfrum sínum, en hann hefur,
auk annars, leikstýrt nokkrum
áramótaskaupum.
Áætlaðar eru tíu sýningar og má
nálgast miða á vef Hugleiks, www.
hugleikur.is. /SP
MENNING
Límtréshús, bogahús
og færanlegar byggingar
Hýsi.is
Færanlegar byggingar
Bogahús
Límtréshús
Leikfélagið Hugleikur:
Húsfélagið
Sýningar Leikfélags Vest-
mannaeyja á hinu klassíska
verki Rocky Horror hefjast
von bráðar, þann 6. apríl nk.
Sýnt verður á Heiðarvegi 19,
Vestmannaeyjum, miðasala fer
fram á staðnum og eru áætlaðar
tólf sýningar – frumsýningin
þann 6. apríl kl. 20.00. Daginn
eftir verður sýnt bæði klukkan
19 & 22, en er seinni sýningin
svokölluð „POWER“-sýning þar
sem leikarar setja sprengikraft í
leik sinn á sviðinu og má búast við
sannkallaðri flugeldasýningu.
Frekari sýningar eru svo frá 14.-30.
apríl, en upplýsingar varðandi þær
má fá í síma 868 2139.
Leikfélag Hólmavíkur hefur nú í sýningu gamanleikinn Maður
í mislitum sokkum. Var frumsýninginn þann 26. mars sl. en áætlaðar
eru fimm sýningar, sú síðasta laugardaginn fyrir páska. Sýnt er í
félagsheimilinu Sævangi þar sem Sauðfjársetrið er til húsa, en eins og
vani er hjá leikfélaginu verður haldið í leikferð er sýningum lýkur – a.m.k.
eftir sauðburð. Áhugasamir geta nálgast miða í síma 693 3474 og hefjast
sýningar alla jafna klukkan 20. Rétt er að minna á að í Sauðfjársetrinu er
hægt að panta súpu fyrir sýningar.
Leikfélag Hofsóss sýnir Saumastofuna í Höfðaborg á Hofsósi,
en frumsýning verksins var þann 28. mars sl. við mikinn
fögnuð áhorfenda. Alls verða sýningarnar níu talsins, sú síðasta þann
14. apríl klukkan 20.30. Miðaverð fyrir fullorðna er 3.500 kr., ellilífeyrisþegar
borga 3.000 kr. og börn 2.500 kr. Miðapantanir og frekari upplýsingar eru
í s. 834-6153. Ranglega var farið með símanúmer upplýsinga í 6. tbl.
Bændablaðsins, en leiðrétt hér með.
Á döfinni ...
Í nóvembermánuði árið 1985 setti Hugleikur upp verkið „Skugga-Björgu“,
eins konar „kynbreyttan Skugga-Svein“ að sögn Ingibjargar Hjartardóttur
bókasafnsfræðings, í viðtali við Morgunblaðið í tilefni sýningar, en hún fór
með hlutverk Kötlu skræku í sýningunni. Hér eru þau Unnur Guttormsdóttir
í hlutverki Gvends smala og Eggert Guðmundsson sem Jón sterki áður en
þeir halda á grasafjall í leikverkinu Skugga-Björgu. Mynd / timarit.is
Frá æfingum á leikritinu Húsfélagið
sem verður frumsýnt þann 15. apríl nk.
Mynd / aðsendar
Leikendur úr einþáttungnum „Hver er þessi Benedikt?“ eftir Júlíu Hannam. Á myndinni eru þær Mamiko D. Ragnarsdóttir og Hrefna Hjörvarsdóttir.