Bændablaðið - 19.10.2023, Page 7

7Bændablaðið | Fimmtudagur 19. október 2023
Ræktaðar eru kartöflur á Þórustöðum í Eyjafjarðarsveit. Auk þess að sjá kartöflurnar skoppa um vatnstromlur, færibönd og stærðaflokkara var til sýnis ein heilmikil kartöfluupptökuvél.
LÍF&STARF
Síðasti vísnaþáttur var gjörvallur helgaður
efni úr nýrri ljóðabók Davíðs Hjálmars
Haraldssonar á Akureyri. Bókin er tölusett
sem aðrar ljóðabækur höfundar og ber
heitið Áttunda Davíðsbók.
Eftir því sem ég les frekar í bókinni verð
ég hrifnari, og ætla því að hefja þennan þátt
á tveimur stökum sem ekki þurfa skýringa
með:
Þegar aðrir um þá spá,
ævidaga sína,
læt ég nægja að líta á
loftvogina mína.
Vaða skafla, aur og ár
angurgapar.
„Á rjúpnaveiðum fitnar fár“,
fjöldinn tapar.
Þormóður Pálsson á Njálsstöðum orti
þessa vísu:
Þegar hrökkva heimsins bönd,
hvað sem fólkið skrafar,
get ég rétt þér hlýja hönd
hinum megin grafar.
Þessa vísu kvað Bjarni frá Gröf í
þorrahlákunni 1964, en þá tók upp allan
snjó:
Hvíta skyrtan ónýt er,
alltaf stækka götin.
Guð má fara að gefa þér
grænu sparifötin.
Stephan G. Stephansson orti eitt sinn:
Hvar þér opnar, heillin mín,
heimur sínar álfur,
gef honum bara brosin þín,
böl þitt eigðu sjálfur.
Þessa mögnuðu vísu orti Jóhann Fr.
Guðmundsson:
Kalla tímans kröfur að,
kostur síst að hika.
Enginn veit um stund og stað
stærstu augnablika.
Næstu tvær vísur eru teknar úr
Rósinkranzrímum eftir Jón Rafnsson:
Þröng í búi orðin er,
öfugt snúið flestu.
þrávalt trúað, því er ver,
þeim sem ljúga mestu.
Vondir lúta valdsmenn auð,
virðast mútuþjálir,
labbakútar, kúguð gauð,
keyptar pútusálir.
Eftir Halldór Jónsson kennara er þessi
samrímaða hringhenda:
Geislinn sólar gleði ljær,
görpum rólar sorgin fjær,
lygnir gjóla og lækkar sær,
lítil fjóla í brekkum grær.
Helgi Björnsson frá Staðarhöfða orti:
Rís úr bóli byggðin öll
sem barn af jólafulli.
Yfir hóla, hraun og völl
hellir sólin gulli.
Jósef Húnfjörð orti til vinar síns sem bauð
til silfurbrúðkaups:
Að þér snúi unaðsfull,
ættar trúi hlynur
silfur nú, en síðar gull
sæmi bú þitt, vinur.
Eftir að hafa hlýtt á kórsöng á Sauðárkróki
orti Karl Sigtryggsson:
Á Sauðárkróki er söngur bestur,
sálum veitir yl.
Þar er enginn minni en mestur,
minnstur ekki til.
Umsjón:
Árni Geirhjörtur Jónsson
kotabyggd1@gmail.com
MÆLT AF
MUNNI FRAM
Á Degi landbúnaðarins um miðjan október kenndi margra grasa. Fyrri
daginn fór fram málþing í Hofi á Akureyri undir heitinu Landbúnaður
á krossgötum. Var það vel sótt og fluttar forvitnilegar framsögur ásamt
því að landbúnaðurinn og helstu áskoranir á þeim bænum voru tæklaðar
í tvennum pallborðsumræðum, auk fyrirspurna úr sal. Mikill þungi var í
erindum og umræðum þótt slegið væri líka á létta strengi.
Síðari daginn opnuðu fjögur býli á Eyjafjarðarsvæðinu dyr sínar og
buðu gestum að skoða búskapinn. Voru það Syðri-Bægisá í Hörgárdal þar
sem stunduð er mjólkurframleiðsla, Garðshorn í Þelamörk með hrossa- og
sauðfjárrækt, Sölvastaðir í Eyjafjarðarsveit þar sem er verið að byggja
gríðarstórt svínahús og Þórustaðir í sömu sveit með kartöfluræktun og
risastóra kartöfluupptökuvél.
Aðsóknin var með ágætum og spjallaði heimafólk við gesti um búskap
sinn auk þess að bjóða upp á hressingu.
Skógarbændur héldu auk þess málþing í Borgarfirði þessa helgi
og ræddu mat úr skóginum og umhirðu skógar. / sá
Landsins gagn
og nauðsynjar
Bændur á Syðri-Bægisá í Hörgársveit buðu gesti velkomna að skoða
mjólkurframleiðsluna. Kýr og kálfar létu gestina þó ekki raska ró
sinni heldur jöpluðu í rólegheitum á töðunni.
Á Sölvastöðum í Eyjafjarðarsveit er gríðarstórt svínahús í byggingu
og þótt húsið sé risið er margt eftir að gera innanstokks áður en u.þ.b.
300 gyltur fá þar pláss.
Kindurnar í Garðshorni voru óttalega strípaðar að sjá eftir rúningu en
undu greinilega hag sínum vel og var nokkuð sama um gestaganginn.
Veitið dröfnóttu kindinni fyrir miðri mynd sérstaka athygli!
Heimasætan í Garðshorni, Yrsa Líf, strýkur hér gæðingi og vini um granir í hesthúsi foreldra sinna meðan gestir skoðuðu sig um þar og í fjárhúsum.
Myndir / SÁ
Hér stinga Þorgerður Katrín Gunnarsdóttir og María Rut Kristinsdóttir saman nefjum en til hliðar við þær eru m.a. Hrund Pétursdóttir, Halldóra Hauksdóttir, Hermann Ingi Gunnarsson og Jón Gunnarsson.
Þórustaðapiltar renndu sér alsælir í fyrstu snjóum meðan fullorðna
fólkið sýndi vélar og tæki til kartöfluuppskeru og ræktar: Gabríel Máni,
Aron Máni, Fannar Máni, Birkir Logi og Óliver Kári.
Hér eru framkvæmdastjóri og formaður Bændasamtaka Íslands
í þungum þönkum fyrir málþingið.