Morgunblaðið - 05.11.2004, Blaðsíða 24
24 FÖSTUDAGUR 5. NÓVEMBER 2004 MORGUNBLAÐIÐ
MINNSTAÐUR
Reykjanesbær | Kaffibarþjónar
víða að komu til Íslands til að
fylgjast með Norðurlandamóti
kaffibarþjóna, Nordic baristacup
2004, sem fram fór í Kaffitári í
Njarðvík um helgina. Danska liðið
sigraði í keppninni.
„Við ákváðum að halda Norð-
urlandakeppni vegna þess hvað
heimsmeistaramótin eru orðin al-
varleg. Þar eru svo miklir pening-
ar og pólitík að gleðin er að
hverfa,“ segir Aðalheiður Héðins-
dóttir, framkvæmdastjóri Kaffi-
társ, um Norðurlandakeppnina.
Keppnin stóð yfir í þrjá daga og
þurftu keppendur að leysa ýmsar
þrautir á þeim tíma. Keppnin var
haldin í Kaffitári nema hvað
Mjólkursamsalan í Reykjavík sá
um keppnina einn daginn og þá
var mjólkin í fyrirrúmi.
Danska liðið sigraði í keppninni.
Ekki voru veitt verðlaun fyrir
önnur sæti en Aðalheiður upplýsir
að íslenska liðið hafi staðið sig vel
og verið næsthæst að stigum.
Það kom skipuleggjendum
keppninnar á óvart hversu margir
erlendir gestir komu til að fylgjast
með og taka þátt í dagskránni. Að-
alheiður segist hafa átt von á um
sjötíu manns, að meðtöldum
keppnisliðunum og fylgifiskum
þeirra, en alls hefðu þátttakendir
og gestir verið 110 talsins. Þrettán
komu frá Bandaríkjunum en einn-
ig fólk frá Póllandi, Frakklandi,
Ítalíu, Þýskalandi og Mexíkó, svo
dæmi séu tekin. Í keppninni voru
notaðar kaffibaunir frá Mexíkó og
það skýrir þátttökuna þaðan, að
sögn Aðalheiðar.
Flestir gestirnir eru kaffibar-
þjónar sem vilja fylgjast með því
besta sem gerist í heiminum og
sækja til Norðurlandanna í þeim
tilgangi enda segir Aðalheiður að
Norðurlandabúar hafi orð á sér
fyrir að vera framsæknir í þessu
efni. Það sýni árangur þeirra á
síðasta heimsmeistaramóti.
Danska liðið sigraði í alþjóðlegri kaffibarþjónakeppni
Yfir hundrað erlendir
þátttakendur og gestir
Morgunblaðið/Héðinn Eiríksson
Sigurvegari Klaus Thomsen úr sig-
urliði Dana bar sig faglega að við
blöndun drykkja.
Bolungarvík | Allir gera sér grein
fyrir uppeldislegu og menningarlegu
gildi tónlistarmenntunar fyrir sam-
félagið, sagði Ólafur Kristjánsson,
fyrrverandi bæjarstjóri Bolungar-
víkur, í tilefni af fjörutíu ára afmæli
Tónlistarskóla Bolungarvíkur sem
minnst var um helgina með mikilli
tónlistarveislu. Ólafur byggði upp
starfsemi Tónlistarskólans sem
fyrsti skólastjóri hans og því starfi
gegndi hann í 24 ár.
Kennslan á vegum skólans fór
fram á heimilum kennara hans allt
fram til 1989 að skólinn fékk inni í
leiguhúsnæði hjá Verkalýðsfélagi
Bolungarvíkur en 1993 flutti skólinn
svo í varanlegt húsnæði í gamla
Barnaskólanum þar sem vel er búið
að starfsemi hans.
Ólafur Kristjánsson sagði í sam-
tali við Morgunblaðið að hann væri
afar þakklátur fyrir að hafa fengið
tækifæri til að byggja upp Tónlistar-
skóla Bolungarvíkur en ánægðastur
kvaðst hann þó vera með það að hafa
átt þátt í því að koma skólanum í var-
anlegt húsnæði og fá gott fólk til
starfa við skólann en á þessum 40 ár-
um hafa margir afar hæfir tónlistar-
kennarar starfað við skólann.
„Ég veit að bæjaryfirvöld og Bol-
víkingar allir bera góðan hug til skól-
ans og gera sér ljósa grein fyrir upp-
eldislegu og menningarlegu gildi
tónlistarmenntunar fyrir samfélag-
ið,“ sagði Ólafur.
Djasssveifla kynslóðanna
Afmælisins var minnst með viða-
mikilli dagskrá sem samanstóð af
tónleikahaldi og fræðslu. „Þegar litið
er yfir farinn veg, gluggað í sögu
skólans og horft til áhrifa hans nær
og fjær, gefst innsýn í þann arf sem
skólinn hefur skapað á sínum fjöru-
tíu ára starfsferli. Þennan arf er ekki
hægt að vega og meta í eitt skipti
fyrir öll, en við vitum að hann er dýr-
mætur og að áhrif hans á samfélagið
eru mikil og sífellt að verki. Þetta er
eftirsóknarverður arfur því tónlistin
er óaðskiljanlegur hluti af lífi hverr-
ar manneskju, uppspretta marg-
brotinna tilfinninga og mótandi afl,“
sagði Kristinn J. Níelsson, skóla-
stjóri Tónlistarskólans, í ávarpi á af-
mælishátíðinni.
Nemendur og kennarar tónlistar-
skólans komu fram á einum þremur
tónleikum. Þar bar hæst Djass-
sveiflu kynslóðanna, afmælistónleik-
ar þar sem fram komu Jón Páll
Bjarnason á gítar, Tómas R. Einars-
son á kontrabassa, Szymon Kuran á
fiðlu og Zbigniew Jaremko á saxófón
ásamt vestfirsku djassgeggjurunum
Villa Valla, Óla Kristjáns, Magnúsi
Reyni og Önundi Pálssyni. Voru
þetta stórskemmtilegir djasstón-
leikar þar sem nokkrir nemendur
Tónlistarskólans fengu að spreyta
sig með snillingunum.
Af öðrum dagskráratriðum má
nefna fræðsluerindi Unu Margrétar
Jónsdóttur um rannsóknir hennar á
leikjasöngvum, djassnámskeið,
sögusýningu, söngtónleika og fleira.
Skólanum voru færðar margar
góðar kveðjur og gjafir á þessum
tímamótum. Bæjarstjórn Bolungar-
víkur færði skólanum að gjöf full-
komið rafmagnspíanó. Einnig fékk
skólinn að gjöf stúdíótíma til að taka
upp hljómdisk með tónlistarflutningi
nemenda skólans. Að gjöfinni standa
börn Vagns heitins Hrólfssonar.
Skólastjórar Tónlistarskóla Bol-
ungarvíkur hafa verið fimm frá upp-
hafi. Ólafur Kristjánsson frá 1964 til
1988, Guðrún Bjarnveig Magnús-
dóttir til 1994, Hannes Baldursson til
1998 og Soffía Vagnsdóttir til 2002
en þá tók núverandi skólastjóri,
Kristinn Jóhann Níelsson, við
stjórninni.
Tónlistarveisla á fertugsafmæli Tónlistarskóla Bolungarvíkur
Hefur skapað dýrmætan arf
Morgunblaðið/Gunnar Hallsson
Tónlistarskólaafmæli Fjórir af þeim fimm sem verið hafa skólastjórar frá
upphafi voru á hátíðinni en þau eru, frá vinstri: Kristinn J. Níelsson, Guð-
rún B. Magnúsdóttir, Soffía Vagnsdóttir og Ólafur Kristjánsson.
Sandgerði | „Þetta breytir miklu fyrir þá sem
stunda æfingar hér. Gólfið er miklu mýkra.
Þeir segja að þetta sé allt annað,“ segir Einar
Bergsson, húsvörður í íþróttahúsi Sandgerðis.
Húsið hefur allt verið tekið í gegn sem og
tækjabúnaður.
Sandgerðisbær lagði skólamannvirkin inn í
Fasteignafélagið Fasteign hf., þar á meðal
íþróttahúsið. Í samningum bæjarins og Fast-
eignar var gert ráð fyrir umfangsmiklum end-
urbótum á íþróttahúsinu og er þeim að mestu
lokið. Eftir er að ganga frá umhverfinu.
Einar segir að húsið hafi verið tekið í gegn
og tækjabúnaður endurnýjaður. Íþróttahúsið
var byggt fyrir 1980 og hefur sami dúkurinn
verið á gólfinu allan þann tíma og fjöðrunin
fyrir löngu farin úr honum. Nú var sett parket
á gólfið og er það sömu gerðar og lagt hefur
verið á Íþróttahúsið við Sunnubraut í Keflavík
og fleiri hús. Einar segir að iðkendur séu afar
ánægðir með gólfið, það fjaðri vel.
Sett voru upp ný mörk og nýjar körfur sem
nú eru festar á bita og eru hífðar upp þegar
þær eru ekki í notkun. Rimlum var bætt við og
sett upp ný klukka. Þá var gert við ýmislegt í
húsinu og það málað hátt og lágt. „Þetta er orð-
ið mjög glæsilegt,“ segir Einar.
Íþróttahúsið er mikið notað. Íþróttakennsla
er fyrri hluta dags og síðan taka við æfingar
íþróttafélagsins og einstakra hópa. Einar segir
að húsið sé í notkun frá átta á morgnana til tíu
eða ellefu á kvöldin, alla virka daga og heil-
mikið um helgar einnig. „Húsið dugar okkur
eins og er en eftir því sem það fjölgar í bænum
kemur að því að ekki verður hægt að koma æf-
ingum fyrir,“ segir Einar Bergsson.
Morgunblaðið/Reynir Sveinsson
Æfing Iðkendur eru ánægðir með nýja gólfið. Upprennandi knattspyrnustúlkur að æfa sig.
Íþróttahúsið í Sandgerði opnað að nýju eftir gagngerar endurbætur með nýjum tækjum og búnaði
Gólfið fjaðrar vel
Sandgerði | Faðir og tveir
ungir synir hans sluppu
ómeiddir þegar eldur kom
upp í íbúð þeirra í Sand-
gerði rétt fyrir hádegið í
gær. Miklar skemmdir
urðu á íbúðinni.
„Þetta uppgötvaðist
snemma. Ég heyrði gler
springa og áttaði mig á því
að eitthvað væri að ger-
ast,“ segir Jón Valdimar
Ingvason, sem var heima
hjá sér í íbúð á efri hæð
steinsteypts íbúðarhúss við
Tjarnargötu í Sandgerði.
Heima voru einnig synir
hans, eins og fjögurra ára,
en eiginkonan var í vinnu.
Þegar Jón leit inn í eldhús-
ið, þaðan sem brothljóðið barst, sá
hann að viftan yfir eldavélinni stóð í
ljósum logum. Hann segir að eld-
urinn hafi verið það mikill að ekki
hafi verið annað að gera en að
hringja í neyðarlínuna og drífa sig
út með strákana.
Þegar hann opnaði út virtist eld-
urinn magnast og upp steig svartur
reykur. Slökkvilið Sandgerðis kom á
vettvang örfáum mínútum síðar og
slökkti eldinn á stuttum tíma. Jón
segir að eldhúsið sé ónýtt og reykur
hafi farið um alla íbúðina.
Sandgerðisbær bauð honum strax
afnot af sumarhúsi í landi Þórodds-
staða rétt utan Sandgerðis og bjóst
Jón Valdimar við því að þiggja það.
Feðgar Jón Valdimar Ingvason með sonum
sínum, Valdimar Rafni og Kristjáni Mark.
„Dreif mig út
með strákana“
Björguðust úr bruna í Sandgerði
Morgunblaðið/Reynir Sveinsson
LANDIÐ
Ölfus | Hætt verður að urða sorp á
Kirkjuferjuhjáleigu í Ölfusi á árinu
2008 og nýjasta urðunarreinin lækk-
uð, samkvæmt samkomulagi sem
náðst hefur milli sveitarfélagsins og
stjórnar Sorpstöðvar Suðurlands.
Samkomulagið felur í sér, að sögn
Ólafs Áka Ragnarssonar bæjar-
stjóra að urðun sorps verði hætt
2008 og sorpstöðinni lokað. Þó er
möguleiki á framlengingu í eitt ár,
verði nýr urðunarstaður ekki tilbú-
inn. Ólafur Áki segir að sveitarfélög-
in muni í sameiningu leita að nýjum
stað fyrir sorpeyðingar- og endur-
vinnslustöð. Áhugi er á því að hafa
samvinnu við Sorpu um það og sveit-
arfélagið Ölfus hefur bent á svæði
fjarri byggð í Ölfusi sem möguleika.
Deilur hafa staðið um hæð urðun-
arreina á Kirkjuferjuhjáleigu. Í sam-
komulaginu felst að nýjasta reinin
verður lækkuð í samræmi við nýtt
skipulag sem gert verður. Þýðir það
að hún verður líklega lækkuð um 3
metra. Ekki verður hróflað við eldri
urðunarreinum, í samræmi við úr-
skurð Skipulagsstofnunar.
Ólafur Áki segist ánægður með
samkomulagið. Mikilvægt hafi verið
að setja niður þessar deilur sem hafi
verið farnar að hafa áhrif á annað
samstarf sveitarfélaga á Suðurlandi.
Sorpstöð-
inni verður
lokað 2008
SUÐURNES