Morgunblaðið - 05.11.2004, Blaðsíða 48
Buddy: Hvað á til bragðs að taka þegar
hversdagslíf manns slær í gegn?
Kopps: Sænskir laganna verðir kunna að
stytta sér stundir og skapa atvinnu.
DÁGÓÐUR völlur hefur verið á norrænni kvik-
myndagerð síðustu árin. Hafa býsna margar
myndir náð almennri hylli, ekki bara heima fyr-
ir, heldur líka á erlendri grundu, ekki síst hjá
hinum Norðurlandaþjóðunum. Hér á landi eru
jafnan tiltölulega fáar myndir sýndar frá ná-
grannalöndunum en þegar það gerist, þegar
hingað berast góðar norrænar myndir, þá er
þeim jafnan vel tekið. Á Norrænum bíódögum
sem haldnir verða í Háskólabíói dagana 5.–15.
nóvember verða sýndar sex norrænar myndir
sem allar eiga það sameiginlegt að vera nýjar
eða nýlegar, hafa almennt hlotið góða dóma
gagnrýnenda, nutu vinsælda í heimalandinu og
unnu til alþjóðlegra verðlauna.
MIÐSUMARS (MIDSOMMER)
Danmörk Allir eiga sér fortíð. Sumir eiga sér
framtíð. Hér er á ferðinni dulmögnuð dönsk-
sænsk spennumynd sem fjallar um nokkra
danska menntaskólakrakka sem fara í ferðalag
til Svíþjóðar, leigja sér sumarhús og ætla að eiga
þar ógleymanlegar stundir í glaum og gleði. Að-
alpersónan, Christian, er enn að ná sér eftir lát
systur sinnar. En við komuna í sumarhúsið fara
undarlegir og dularfullir hlutir að gerast. Unga
fólkið fer að óttast um sinn hag og þau fara að
gruna hvert annað um græsku.
LÖGGUR (KOPPS)
Svíþjóð Opnunarmynd hátíðarinnar. Gam-
anmynd eftir Josef Fares, hinn sama og gerði
Jalla! Jalla!, léttleikandi ádeila á hinn meinta
„innflytjendavanda“ í Svíþjóð, sem sló rækilega í
gegn bæði í heimalandinu og hérlendis. Kopps
naut einnig mikilla vinsælda en hún skartar
mörgum af þeim leikurum sem einmitt gerðu
Jalla! Jalla! svo smellna.
Myndin segir frá nokkrum smábæjarlöggum
sem hafa ekkert að gera. Þegar aðgerðarleysið
er alveg að fara með þá og niðurskurður í lögg-
unni yfirvofandi ákveða þeir að taka málin í sín-
ar hendur og fremja sjálfir glæpina. Bandarísku
grínstjörnunni Adam Sandler leist svo vel á
þennan söguþráð að hann tryggði sér réttinn til
að endurgera myndina í Hollywood.
FÉLAGI (BUDDY)
Noregur Ein umtalaðasta og vinsælasta mynd
sem komið hefur frá Noregi í lengri tíma. Frum-
burður kvikmyndagerðarmannsins unga Mor-
tens Tyldum, rómantísk gamanmynd um Krist-
ofer, letihaug með lítið sjálfsálit. Hann býr með
þremur vinum sínum og fer á bömmer þegar
kærastan lætur hann róa. Fyrir tilviljun lendir
kostuleg myndbandsdagbók hans hjá sjónvarps-
stjórum, sem ákveða tafarlaust að gera úr henni
sjónvarpsþætti, sem slá rækilega í gegn. Krist-
ofer verður svo að segja frægur á einni nóttu og
áður en hann veit af þarf hann að velja á milli
frekari frama eða vináttunnar og ástarinnar.
Myndin hefur unnið til fjölda alþjóðlegra við-
urkenninga, fékk Amanda-verðlaunin í ár sem
besta norska myndin og fyrir leik, áhorf-
endaverðlaun í fyrra í Karlovy Vary í Tékklandi
og í Varsjá í Póllandi.
MIFFO
Svíþjóð Rómantísk gamanmynd eftir Daniel
Lind-Lagerlöf sem fjallar um Tobias, nýútskrif-
aðan prest sem býr í íbúð fyrrverandi kærustu
sinnar í Uppsölum. Kirkjusóknin er dræm svo
Kvikmyndir | Norrænir bíódagar í Háskólabíói 5.–15. nóvember
Myndirnar verða sýndar í Háskólabíói. Nánari
upplýsingar um sýningartíma er að finna í
Stað og stund og auglýsingu frá Háskólabíói.
skarpi@mbl.is
hann ákveður að banka upp á hjá sóknarbörnum
til að vekja athygli á starfi sínu og kirkjunni. Fá-
ir sýna viðbrögð en þegar hann hittir Carol
verður breyting á í lífi hans. Rómantíkin
blómstrar en ýmis atriði koma upp. Í aðal-
hlutverkum eru Carina Boberg (Kopps) og Livia
Millhagen (Beck). Myndin hefur hlotið all-
nokkrar vegtyllur; valin besta myndin á Holly-
wood Film Festival 2003 og Fort Lauderdale
International Film Festival. Þá fékk hún dóm-
nefndarverðlaun á alþjóðlegri kvikmyndahátíð í
Mannheim-Heidelberg, auk þess sem Millhagen
var tilnefnd til sænsku kvikmyndaverðlaunanna.
SÚSÝ LITLA (SMALA SUSSIE)
Svíþjóð Hér fer gamansöm spennumynd frá
2003 sem sögð hefur verið í anda hinnar skosku
Trainspotting. Fjallar um Eirík sem kemur í
heimabæ sinn til að leita að systur sinni Súsý
litlu sem er týnd. Öllu er þarna stjórnað af
glæpaklíkum og fljótlega kemst Erik að því að
flest hefur breyst og lögreglan sinnir ekki verk-
um sínum. Gömlu vinirnir eru glæpamenn og
dópsalar og myndbandaleigueigandinn stjórnar
öllu. Þráður sem minnir svolítið á Walking Tall
en er bara sænskari að sjálfsögðu.
Aðalhlutverk er í höndum Tuva Novotny
(Jalla!Jalla!).
FUGLADANSINN (MORS ELLING)
Noregur Í tilefni af Norrænu bíódögunum
verða á ný teknar upp sýningar á þessu fram-
haldi af hinni vinsælu mynd um hinn sérlundaða
Elling. Í raun er hér um forsögu Ellings að ræða
en myndin greinir frá því þegar hann fer í sum-
arfrí með móður sinni til Spánar. Þess má geta
að þessi vinsæla skáldsaga Ingvars Am-
bjørnsens kom nýverið út í íslenskri þýðingu og
heitir Fugladansinn.
Sænskar löggur, norskir
félagar og danskir draugar
ROKKSVEITIN Brain Police mun spila nýja breiðskífu sína,
Electric Fungus, í heild sinni á Gauki á Stöng í kvöld en platan
kom út fyrir stuttu og er þriðja plata hljómsveitarinnar. Platan
kemur einnig út í takmörkuðu upplagi þar sem meðfylgjandi er
mynddiskur sem inniheldur heimildarmynd um gerð plötunnar
ásamt myndbandi við lagið „Coed Fever“.
Brain Police hefur frá upphafi verið skipuð þeim Jóni Birni Rík-
arðssyni, „Jónba“ trommuleikara, Herði Stefánssyni bassaleikara
og Gunnlaugi Lárussyni gítarleikara (og nú orgel- og píanóleik-
ara). Eftir vandræðagang mikinn með söngvara slóst Jens Ólafs-
son (fyrrum Toy Machine) í hópinn fyrir tveimur árum og við það
endurfæddist sveitin, styrktist til muna og í fyrra kom út önnur
plata hennar, samnefnd sveitinni. Á henni voru Brain Police loks
búnir að finna fótum sínum forráð og útkoman frábær rokkskífa.
Á Electric Fungus heldur sveitin áfram reiki sínu um lendur
eyðimerkurrokksins („stoner rock“ á ensku) og eru sem fyrr inn-
blásnir af Black Sabbath, Kyuss, Fu Manchu og skyldum sveitum.
„Síðasta plata var keyrð í gegn á skömmum tíma í hljóðverinu,“
segir Jónbi. „En við nostruðum meira við þessa og lágum lengur
yfir henni.“ Hörður segir muninn á þessari og þeirri síðustu jafn-
framt liggja í því að nú unnu þeir náið með upptökustjóra, Axeli
Árnasyni (fyrrum trymbill 200.000 naglbíta) og varð hann einn af
hópnum.
Orgel, píanó og ýmis áhrifshljóð eru komin í hljóðmynd Brain
Police og er Gunnlaugur gítarleikari að mestu ábyrgur fyrir þeim
þætti. Liðsmenn viðurkenna fúslega að þeir hafi markmiðsbundið
forðast að endurtaka síðustu plötu og hafi lagt sig í líma við að
vinna áfram með formið, eyðimerkurrokkið, enda platan fjöl-
breyttara verk en það síðasta.
Útlönd heilla Heilalögguna að sjálfsögðu enda Íslandsmark-
aðurinn fljótur að mettast. Sveitin hefur enda verið starfandi í sex
ár. „Okkur langar auðvitað að fara út því það er fólk í röðum sem
er að „fíla“ svona tónlist,“ segir Jenni en sveitin hefur gert efni sitt
aðgengilegt á vefsíðunni www.stonerrock.com og hefur Brain
Police selst þar í tæpum tvö hundruð eintökum.
„Á þessari síðu er safn af mp3 skrám,“ segir Gunnlaugur. „Mað-
ur hefur verið að kanna þetta og það kom mér á óvart hvað mikið
af þessu var ekkert sérstakt þó að það sé stök snilld inni á milli.“
Brain Police ættu því að vera fyllilega samkeppnishæfir í þess-
um geira og alltént er andinn í herbúðum sveitarinnar jákvæður,
allir sem einn klárir í slaginn.
„Brátt hrindum við af stað ákveðinni vinnuáætlun með útlönd í
huga,“ segir Jónbi. „Við erum komin með einhver sambönd. Málið
er að koma sér á einhvern túr með ráðsettari böndum eða þá
böndum sem eru á svipuðum stað og við erum á núna. Þetta er allt
í startholunum en við erum meira en tilbúnir að leggja á okkur þá
vinnu sem þarf.“
Tónlist | Brain Police kynnir nýja breiðskífu á Gauknum
Þriðja vaktin
Brain Police: Jónbi, Jenni, Höddi, Gulli.
Útgáfutónleikar Brain Police hefjast klukkan 23.00 í kvöld og
aðgangseyrir er 500 krónur. Einnig leika Solid I.V. og Ensími.
www.brainpolice.net www.stonerrock.com
arnart@mbl.is
48 FÖSTUDAGUR 5. NÓVEMBER 2004 MORGUNBLAÐIÐ
Grímsbæ &
Ármúla 15
Stærðir
36 - 50
Glæsilegur fatnaður fyrir allar konur
Þú færð skóna
hjá okkur
HELGIN