Ársrit Ræktunarfélags Norðurlands - 01.01.1978, Side 75

allhressilega á tærnar á einum norðmanni (ég tróð honum um
tœr!) en ég sagði óvart „værsogod11 í stað „unskyld“. Hinn
fullkomni herramaður hefði auðvitað átt að svara mér um
hæl með „tusind takk“, en ég fékk bara illgjarnt augnaráð.
Eins dauði er annars brauð (líf) segir gamall málsháttur.
Um hríð hafði ég framfæri mitt af því að rannsaka dauðann,
kalið í túnunum hér á Norðurlandi. Ég var í Noregi á þessum
árum en safnaði gögnum hér á íslandi. Vorið 1968 voru
kalskemmdir miklar og er það í minnum haft að ég kom til
bónda nokkurs í N-Þingeyjarsýslu og skoðaði tún hans. Hon-
um var kalið mikið áfall, enda meirihluti túnanna stór-
skemmdur, allt að því ónýtur. Mér var þetta hins vegar
merkilegt rannsóknarefni, og sést þá hvernig eins dauði er
annars brauð. Þegar við kvöddumst þakkaði ég fyrir góð-
gerðirnar en endaði þakkarávarp mitt einkar óheppilega:
„Það var reglulega gaman að sjá túnið hjá þér“. Við fundum
báðir að hér var eitthvað bogið og fundum sameiginlega rétta
orðið í stað gamansins, en það var orðið fróðlegt. Eg afsaka
mig reyndar með því að Noregsdvölin hafi gert mér tregt um
mál og að ég hafi verið með norska orðið ,,interessant“ í huga
en tekist þýðingin svona óhönduglega.
í sömu ferð er mér minnisstætt að ég kom á bæ einn á
Melrakkasléttu í júnimánuði. Tún voru þar stórskemmd, grá
yfir að líta og örlaði varla á grænu, lifandi grasi. Þetta var á
laugardegi, og er ég ek í hlað heyri ég í útvarpinu í bílnum
mínum að verið er að lesa kveðjur í óskalagaþætti sjúklinga.
Ein kveðjan var einmitt heim á þennan umrædda bæ, og það
má kallast kaldhæðni örlaganna (eða óskalaganna) að óska-
lagið var „Green, green grass of home“ (græna grasið heima).
Ég gæti haldið áfram að segja frá spaugilegum atvikum, en
finnst ég þó varla vera kominn á raupsaldurinn og læt því hér
staðar numið. Það skal að lokum tekið fram að sé eitthvað
missagt í framangreindum fræðum, þá skal hafa að leiðarljósi
orð manns, sem var mér fróðari, Ara fróða Þorgilssonar, en
hann sagði að hafa skyldi það er sannara reyndist. Missagnir
eru allar vegna mistúlkunar nemandans (mín), ekki vegna
lélegrar frammistöðu kennarans (fósturjarðarinnar).
77