Morgunblaðið - 20.03.2001, Page 15

AKUREYRI
MORGUNBLAÐIÐ ÞRIÐJUDAGUR 20. MARS 2001 15
UNGAR stúlkur, nemar í framhalds-
skólunum á Akureyri streymdu í
Oddeyrarskála í gærmorgun og
kynntu sér þá starfsemi sem þar fer
fram auk þess að fá inngrip í fjöl-
breytta starfsemi Eimskips. Þá fóru
þær um borð í eitt skipa félagsins,
Mánafoss, og skoðuðu það hátt og
lágt. Heimsóknin á hafnarsvæðið var
liður í víðtæku jafnréttisátaki sem
Háskóli Íslands og Jafnréttisstofa í
samstarfi við fjögur ráðuneyti, fjögur
fyrirtæki og tvenn samtök standa að
en því var ýtt úr vör í síðasta mánuði
og stendur til ársins 2002. Markmið
þess miðast að því að fjölga kvennem-
endum í verk-, tækni- og tölvunar-
fræðinámi á háskólastigi, en hlutfall
kvenna í þessum greinum er um eða
innan við 20%. Meginhugsunin að
baki hvatningarátakinu er að kven-
nemendur og útskrifaðar konur í um-
ræddum greinum hvetji kvennem-
endur í framhaldsskólum til að velja
sér þessi fög sem námsbraut á efri
stigum menntunar sinar.
Markvisst unnið að því að fjölga
konum í stjórnunarstöðum
Um fjörutíu konur, sem ýmist hafa
lokið eða stunda nú nám í þessum
greinum, hafa farið á milli framhalds-
skóla landsins og kynnt þar nám og
störf í tæknigreinum. Röðin var kom-
in að Akureyri í gær, en haldnir voru
fundir bæði í Menntaskólanum á Ak-
ureyri og Verkmenntaskólanum á
Akureyri auk þess sem Eimskip bauð
stúlkunum í heimsókn á athafnasvæði
sitt. Þar sagði Benedikt Ingi Elíasson
forstöðumaður frá starfseminni á Ak-
ureyri og Norðurlandi. Á Akureyri og
Dalvík starfa 30 manns hjá Eimskip,
þar af eru fjórar konur. Helga Dröfn
Þórarinsdóttir véla- og iðnaðarverk-
fræðingur kynnti fyrir stúlkunum þá
fjölbreyttu starfsemi sem fram fer á
vegum félagsins hér á landi og í út-
löndum, en hún benti m.a. á að góðir
og vel menntaðir starfsmenn væru
félaginu afar mikilvægir. Inga Björg
Hjaltadóttir, lögfræðingur og deild-
arstjóri launa- og kjaramála í
starfsþróunardeild Eimskips, fór m.a.
yfir starfsmannamálin hjá félaginu og
stefnu sem fylgt væri á þeim vett-
vangi. Hún benti á að starfsmenn
hefðu fjölbreytta menntun, en tækni-
menntuðu fólki hefði fjölgað að und-
anförnu. Hún sagði að markvisst
hefði verið unnið að því að fjölga kon-
um í stjórnunarstörfum innan fyrir-
tækisins og árangur af því átaki verið
góður. Þannig hefði félagið hlotið við-
urkenningu Jafnréttisráðs árið 1999 í
kjölfar þess.
Mikilvægt að sjónarmið
kvenna komi fram
Þær Rósa Erlingsdóttir, verkefn-
isstjóri átaksins, Guðrún Rögnvaldar-
dóttir, framkvæmdastjóri Staðalráðs
Íslands, Guðrún Ösp Þórgnýsdóttir,
tölvunarfræðingur hjá Hugbúnaðar-
fyrirtækinu Teymi, og María Ragna
Lúðvígsdóttir, nemi í tölvunarfræði,
kynntu stúlkum í framhaldsskólunum
á Akureyri átakið, sem og nám og
störf í verk- og tölvunarfræðum. Rósa
sagði mikinn skort á starfsfólki í þess-
um greinum og því væri nú verið að
leita starfskrafta úr röðum kvenna
sem hefði ekki í jafnmiklum mæli sótt
í þessi störf og karlar. Sjónarmið
kvenna vantaði inn í þessar greinar,
en það væri mikilvægt til framtíðar að
þær sinntu þessum störfum til jafns
við karla.
Guðrún Rögnvaldardóttir, sem er
verkfræðingur, sagði stúlkunum að
fátítt hefði verið að konur færu í verk-
fræðinám á árum áður, en það sem
fyrir sér hefði vakað með náminu
væri að það gæfi af sér þokkalegar
tekjur, auðvelt væri að fá vinnu og
eins hefði henni þótt gaman að læra
stærðfræði. Hún sagði námið vissu-
lega strembið en það væri líka
skemmtilegt. Starfið hentaði að henn-
ar sögn konum ekki síður en körlum,
um væri að ræða fjölbreytt starf á
hinum ýmsu sviðum en goðsögnin um
karl með hjálm að virkja uppi á há-
lendinu ætti ekki endilega við.
Fjölbreytt starf og góð laun
Guðrún Ösp sagði meirihluta tölv-
unarfræðinga karlmenn, en ef konur
vildu hafa áhrif á framtíð sína ættu
þær að hasla sér völl sem víðast og
tölvunarfræðin væri ein þeirra greina
þar sem skortur væri á kvenfólki.
Hún sagði starf tölvunarfræðinga af-
ar fjölbreytt, það væri nánast ekkert
svið þar sem þeir kæmu ekki við sögu.
Eftirspurn eftir fólki með þessa
menntun væri mikil bæði hér á landi
og í útlöndum og góð laun væru í boði,
trúlega væri hvergi hægt að fá eins
góð laun og þau sem byðust fólki með
tölvunarfræðimenntun. Þá benti hún
einnig á að fyrirtækin byðu starfs-
fólki upp á ýmis hlunnindi því allt
væri gert til að halda fólki ánægðu í
starfi.
María Ragna er á öðru ári í tölv-
unarfræði við Háskóla Íslands, en
hún kynnti námið í deildinni og upp-
byggingu þess. Hún sagði það hafa
komið sér á óvart hversu fjölbreytt
þetta nám væri og skemmtilegt. Hún
nefndi einnig að greinilegt væri að
fólki með þessa menntun stæði næg
vinna til boða, en nánast væri slegist
um starfskraftana.
Stúlkum í framhaldsskólunum kynnt átak til að fjölga konum í verk- og tölvufræðigreinum
Morgunblaðið/Kristján
Stúlkur í framhaldsskólunum á Akureyri heimsóttu Ægi Jónsson, skipstjóra á Mánafossi,
upp í brú skipsins þar sem þær fræddust um lífið á sjónum.
Morgunblaðið/Kristján
Helga Dröfn Þórarinsdóttir, iðnaðar- og vélaverkfræðingur hjá Eimskip, kynnti starfsemi
félagsins fyrir stúlkum í framhaldsskólunum á Akureyri.
Mikil eftirspurn eft-
ir slíku starfsfólki
ÁÆTLUN um rekstur, fjármál og
framkvæmdir bæjarsjóðs Akureyrar
á árunum 2002 til 2004 gerir ráð fyrir
miklum framkvæmdum á þessu tíma-
bili og hafa þær ekki verið jafnum-
fangsmiklar í annan tíma. Alls er gert
ráð fyrir að framkvæmdir á vegum
bæjarsjóðs á áætlunartímabilinu
nema 2.645 milljónum króna, en
stærstu kostnaðarliðirnir í áætluninni
eru á sviði grunn- og leikskóla að sögn
Kristjáns Þórs Júlíussonar bæjar-
stjóra. Síðari umræða um þessa
þriggja ára áætlun verður í bæjar-
stjórn Akureyrar í dag, þriðjudag.
Kristján Þór sagði að áætlunin
væri byggð á ákveðnum forsendum
varðandi þróun tekna og gjalda en
einnig væri gert ráð fyrir að fjölgun
íbúa yrði 1,5% á ári á tímabilinum
Þannig er búist við að íbúar á Ak-
ureyri verði um 16.100 í lok árs 2004.
Samkvæmt áætluninni er gert ráð
fyrir að skatttekjur hækki úr um 3,3
milljörðum króna árið 2002 í rúmlega
3,9 milljarða í lok tímabilsins. Hvað
rekstur málaflokka varðar er sam-
kvæmt áætluninni gert ráð fyrir að
hann kosti rúmlega 2,7 milljarða á
næsta ári en fari í tæplega 3,2 millj-
arða í lok tímabilsins.
Tveir nýir leikskólar og miklar
framkvæmdir við grunnskóla
Hvað helstu framkvæmdir á sviði
leik- og grunnskóla varðar sagði bæj-
arstjóri að byggðir yrðu tveir nýir
leikskólar á áætlunartímabilinu, ann-
ar yrði tilbúinn og hinn langt kominn
að því loknu. Áhersla verður lögð á að
ljúka Giljaskóla á þessu tímabili og þá
verður að sögn Kristjáns Þórs tekið
til við verkefni í Brekkuskóla. Jafn-
hliða verður byggingu Síðuskóla lok-
ið, en undirbúningur þess verks verð-
ur unninn á þessu ári, framkvæmdir
hefjast árið 2002 og þeim verður lokið
ári síðar. Einnig verður á tímabilinu
hafist handa við undirbúning vegna
byggingar íþróttahúss við Giljaskóla.
Langstærsta einstaka fram-
kvæmdin á sviði menningarmála sem
lokið verður á næsta framkvæmda-
tímabili verður bygging við Amts-
bókasafnið á Akureyri, en gert er ráð
fyrir að þeirri byggingu verði lokið á
þremur árum. Þá sagði bæjarstjóri að
jafnframt væru ætlaðir fjármunir
vegna undirbúnings við byggingu
væntanlegs menningarhúss.
Miklar framkvæmdir verða einnig
á sviði íþróttamála en þar ber hæst að
reist verður fjölnota íþróttahús á
félagssvæði Þórs við Skarðshlíð og
hefjast þær á þessu ári, en megin-
þunginn kemur á árin 2002–3. Þá gat
Kristján Þór þess að einnig yrði
meira fé en áður lagt til gatnagerðar,
fráveituframkvæmda og umhverfis-
mála.
Nýta fjármagn úr
Framkvæmdasjóði
Hann sagði að ætlunin væri að taka
ný lán að upphæð 300 milljónir króna,
en einnig væri áætlað að borga niður
eldri lán að upphæð 350 milljónir
króna. Þá væri gert ráð fyrir að nýta
fjármagn úr Framkvæmdasjóði Ak-
ureyrar, samtals 950 milljónir króna
vegna framkvæmda á umræddu
tímabili, en alls væri til í þeim sjóði í
árslok 2000 fé að upphæð um 1,2
milljarðar króna. „Þannig ætlum við
að brúa þá fjárþörf sem er umfram
það sem fram kemur í áætluninni,“
sagði Kristján Þór. Hann sagði að
samkvæmt áætluninni væri einnig
gert ráð fyrir að byrjað yrði að greiða
niður langtímaskuldir bæjarins árið
2003, samtals um 30 milljónir og því
haldið áfram árið á eftir þegar skuldir
yrðu greiddar niður um 140 milljónir
króna.
„Að því gefnu að forsendur áætl-
unarinnar standist er ljóst að við
munum halda áfram öflugri uppbygg-
ingu á grunnþjónustu bæjarins af
miklum metnaði. Jafnframt því ger-
um við mikið átak á sviði gatnagerðar
og umhverfismála. Einnig gerir fjár-
hagur bæjarsjóðs nú kleift að efna
gamalt loforð um viðbyggingu við
Amtsbókasafnið auk þess sem við
munum skapa knattspyrnu- og frjáls-
íþróttamönnum góða aðstöðu til æf-
inga og keppni.“
Áætlun um rekstur, fjármál og framkvæmdir bæjarsjóðs Akureyrar til 2004
Framkvæmdir fyrir tæpa
þrjá milljarða á tímabilinu
JAFNRÉTTISNEFND Akureyrar
fjallaði um dóm Ingibjargar Eyfells
á fundi sínum nýlega og lýsti nefndin
ánægju sinni með niðurstöðu hans
fyrir hönd Ingibjargar.
Jafnframt var bókað að Jafnrétt-
isnefnd er ekki sátt við að Akureyr-
arbær fái ítrekað á sig mál vegna
jafnréttisbrota og hvetur bæjar-
stjórn til þess að fara að lögum svo
ekki þurfi að koma til frekari mála-
ferla af þessu tagi.
Eins og fram hefur komið var Ak-
ureyrarbær dæmdur í Héraðsdómi
Norðurlands eystra til að greiða
Ingibjörgu Eyfells, fyrrverandi
deildarstjóra leikskóladeildar, rúm-
ar 1,8 milljónir króna í bætur vegna
mismunar í launakjörum og hálfa
milljón króna í málskostnað.
Jafnréttisnefnd Akureyrar
Bæjarstjórnin
fari að lögum
BÚNAÐARSAMBAND Eyjafjarðar
mun standa fyrir tveimur fræðslu-
fundum um jarðrækt næstkomandi
fimmtudag, 22. mars, fyrst í Ýdölum
kl. 13.30 og svo á Fosshóteli KEA kl.
20.30. Umræðuefnið verður jarðrækt
í víðum skilningi, ræktunarskipulag,
endurvinnsla túna, sáðskipti og fleira.
Frummælendur verða Áslaug
Helgadóttir, sviðsstjóri jarðræktar-
sviðs Rannsóknastofnunar landbún-
aðarins, og Jónatan Hermannsson,
tilraunastjóri á Korpu. Eru bændur
hvattir til að mæta á fundina, en ljóst
er að átak í jarðræktarmálum er eitt
af því brýnasta í búskap.
Bænda-
fundir um
jarðrækt