Morgunblaðið - 05.10.2001, Blaðsíða 11
FRÉTTIR
MORGUNBLAÐIÐ FÖSTUDAGUR 5. OKTÓBER 2001 11
OKKUR þykir miður að upp hafi
komið þessi misskilningur,“ segir
Sigurbjörn Gunnarsson, fram-
kvæmdastjóri líftryggingasviðs
VÍS, sem sér um rekstur Líftrygg-
ingafélags Íslands, Lífís, en sagt
var frá konu í Morgunblaðinu í gær,
sem taldi sig og eiginmann sinn
hafa keypt einnar milljónar króna
líftryggingu hjá Lífís fyrir rúmum
tveimur árum. Þegar eiginmaður
hennar lést 19 mánuðum síðar, fékk
hún rúmar 93.000 krónur í bætur.
Sigurbjörn segir að umrædd
hjón hafi keypt svokallaða „söfnun-
artryggingu“, ekki „söfnunarlíf-
tryggingu“ og að á þeim sé tölu-
verður munur. Báðar fyrrgreindar
líftryggingar tilheyra flokki sem
kallast „söfnunarlíftrygging með
fjárfestingarkosti“, ásamt fjárfest-
ingartryggingu, sem er þriðji
möguleikinn í þessum flokki trygg-
inga sem Lífís býður viðskiptavin-
um sínum.
„Kannski svolítið flókið“
„Það kann að vera að þetta sé
svolítið flókið, ég viðurkenni það, en
tryggingin sem umrædd kona
keypti var söfnunartrygging, sem
byggist einvörðungu á söfnunar-
þætti. Innan hennar er jafnframt
líftryggingarþáttur, sem er 1% og
leggst við söfnunarþátt viðkomandi
einstaklings, þegar tryggingin er
greidd út. Ef einstaklingur hefur
safnað sér 100.000 krónum þegar
tryggingin er greidd út, væri líf-
tryggingarþátturinn því 1.000
krónur og heildarútgreiðsla 101.000
krónur. Þessi trygging er áþekk
reglubundnum sparnaði, en nýtir
sér jafnframt kosti líftryggingar,
hvað varðar eignarskattsfrelsi,“
segir Sigurbjörn.
Segir hann þessa leið henta fólki
á miðjum aldri sem „síður þarf á líf-
tryggingu að halda þar sem það er
að jafnaði búið að koma undir sig
fótunum. Iðgjald á mánuði fyrir
einnar milljónar króna hefðbundna
líftryggingu handa 55 ára konu sem
reykir ekki er um 4.900 krónur á
mánuði. Karlmaður á sama aldri
myndi þurfa að borga 8.200 krónur
á mánuði fyrir líftryggingu,“ segir
Sigurbjörn.
Hjónin sem áttu í hlut borguðu
rúmlega 7.000 krónur á mánuði í
söfnunartryggingu, hvort um sig, í
19 mánuði og segir Sigurbjörn
kaupendum ráðlagt að velja söfn-
unartryggingu til langs tíma, að
minnsta kosti tíu ára.
Fjárfest samkvæmt
vali tryggingartaka
Eins og áður greinir fékk konan
greiddar rúmar 93.000 krónur þeg-
ar maður hennar lést, en hafði
greitt samtals rúmar 141.000 krón-
ur vegna tryggingarinnar um-
rædda 19 mánuði og segir Sigur-
björn mismuninn skýrast af
svokölluðum upphafskostnaði, sem
vegi þyngst gildi tryggingin í stutt-
an tíma.
Fyrir fjárhæðina sem greidd er
mánaðarlega er fjárfest samkvæmt
vali tryggingartaka og segir Sigur-
björn að viðskiptavinum bjóðist tíu
sjóðir til ávöxtunar. Ávöxtun hafi
síðan verið „með lægra móti“ á því
tímabili sem um ræðir vegna að-
stæðna á fjármálamörkuðum.
Aðspurður segir Sigurbjörn að
sölumenn eða ráðgjafar fái þóknun
fyrir hvern samning sem gerður er
við tryggingataka.
Er rétt að sú upphæð geti hlaup-
ið á tugum þúsunda í hvert sinn?
„Sölumenn fá þóknun fyrir hvern
samning, sem ég myndi ekki segja
að hún væri verulega há hér hjá
Lífís. Þóknunin er mjög svipuð
hvað varðar söfnunartryggingu og
söfnunarlíftryggingu en ég vil ekki
upplýsa hvers konar samninga við
gerum við okkar sölumenn.“
Er ekki hætta á því að sölumenn
verði of uppteknir af eigin ávinningi
í slíkum viðskiptum og gæti þess
ekki nægilega vel að kynna trygg-
ingarskilmálana til hlítar fyrir við-
skiptavinum?
„Sú hætta er sjálfsagt alls staðar
fyrir hendi þar sem er afkasta-
hvetjandi launakerfi. En ég myndi
segja að þeir sem viðhafa óvönduð
vinnubrögð, verði ekki langlífir í
starfi.“
Veistu hvaða tryggingarskilmál-
um sölumaðurinn sem seldi um-
ræddum hjónum tryggingu lýsti?
„Ég geri ráð fyrir því að hann
hafi lýst þeim möguleikum sem við
bjóðum upp á. Sölumaðurinn sem
átti í hlut hætti hins vegar hjá okk-
ur fyrir nokkru svo ég get ekki sagt
til um hvað þeim fór á milli.“
Viðskiptavinurinn skrifar
upp á beiðni um tryggingu
Er haft eftirlit með því að sölu-
menn kynni væntanlegum við-
skiptavinum alla skilmála trygg-
inga sem þeir eru að selja?
„Viðskiptavinurinn skrifar upp á
beiðni um tiltekna tryggingu, sem
síðan er yfirfarin og samþykkt. Að
því búnu fær hann sent trygging-
arskírteini ásamt skilmálum trygg-
ingarinnar. Þá hefur hann 30 daga
iðrunarfrest sem bundinn er í lög-
um. Það er vandlega útlistað fyrir
okkar starfsmönnum, meðal annars
í sérstökum reglum að vanda ráð-
gjöf sína á allan hátt og gengið stíft
eftir því að þeim tilmælum sé
fylgt.“
Er algengt að viðskiptavinir mis-
skilji skilmála þeirra trygginga sem
þeir kaupa hjá ykkur?
„Nei, það er sem betur fer af-
skaplega fátítt, en full ástæða til
þess að brýna fyrir sölufólki að
ganga úr skugga um að viðskipta-
vinurinn skilji hvað hann er að
kaupa og hvetja þá sem ætla að fá
sér tryggingu til þess að kynna sér
skilmála hennar til hlítar.“
Er mikið um að sölumenn ykkar
eða ráðgjafar leiti að fyrra bragði
til viðskiptavina til þess að selja
þeim tryggingar?
„Við auglýsum með hefðbundn-
um hætti og sölumenn okkar hafa
líka sjálfir samband við hugsanlega
viðskiptavini. En við reynum ekki
að þröngva tryggingum upp á fólk.“
Nú kemur fram að eitt mánaðar-
gjald fyrir trygginguna hafi verið
innheimt af greiðslukorti mannsins
eftir að hann lést. Hefði verið hægt
að komast hjá því með tilliti til að-
stæðna?
„Tryggingafélagið hefur ákveð-
inn frest til þess að standa skil á
tryggingagreiðslum. Í þessu tilviki
vildi viðkomandi fá upphæðina
greidda strax og við vildum sýna
sveigjanleika og verða við því. Ef
við hefðum nýtt okkar frest hefði
málið horft öðruvísi við. Reglur
greiðslukortafyrirtækisins sem í
hlut á kveða síðan á um hvenær í
mánuði afborgun fyrir trygginguna
er innheimt.“
Er málinu lokið af ykkar hálfu?
„Ég geri ráð fyrir því. Konan
hefur fengið greidda þá upphæð
sem henni bar. Við hörmum auðvit-
að misskilninginn og okkur þykir
miður að svona skuli geta komið
upp,“ segir Sigurbjörn Gunnars-
son, framkvæmdastjóri líftrygg-
ingasviðs VÍS, að endingu.“
„Þykir miður að
þessi misskilningur
hafi komið upp“
Framkvæmdastjóri tryggingasviðs VÍS segir brýnt að
viðskiptavinir skilji tryggingaskilmála