Morgunblaðið - 16.08.2002, Blaðsíða 13

AKUREYRI
MORGUNBLAÐIÐ FÖSTUDAGUR 16. ÁGÚST 2002 13
Tillaga að breytingum á
aðalskipulagi 1998-2018:
Verslunar- og þjónustulóðir í og við Giljahverfi
Akureyrarbær auglýsir hér með skv. 1. mgr. 20. gr. skipulags- og
byggingarlaga neðangreindar tillögur að breytingum á aðalskipulagi:
A) Lögun verslunar- og þjónustusvæðis við gatnamót Hlíðar-
brautar og Borgarbrautar breytist, þannig að það stækki til
suðurs og austurs og mörk aðliggjandi verndunarsvæðis
breytist til samræmis. Nánari skilgreining landnotkunar og
ákvæði um nýtingarhlutfall breytist einnig.
B) Skilgreining landnotkunar á lóðinni Kiðagil 1 við gatnamót
Merkigils og Kiðagils, sem ætluð hefur verið fyrir hverfis-
verslun og þjónustu, breytist úr verslunar- og þjónustu-
svæði í íbúðarsvæði.
Tillöguuppdráttur með greinargerð mun liggja frammi í þjónustuand-
dyri Akureyrarbæjar, Geislagötu 9, 1. hæð, næstu 6 vikur frá birt-
ingu þessarar auglýsingar, þ.e. til föstudagsins 27. september
2002, svo að þeir, sem þess óska, geti kynnt sér tillögurnar og
gert við þær athugasemdir. Tillögurnar eru einnig birtar á heimasíðu
Akureyrarbæjar: http://www.akureyri.is/ undir: Auglýsingar og um-
sóknir/Skipulagstillögur.
Frestur til að gera athugasemdir við tillögurnar rennur út kl. 16.00
föstudaginn 27. september 2002 og skal athugasemdum skilað til
Umhverfisdeildar Akureyrarbæjar, Geislagötu 9, 3. hæð. Hver sá,
sem ekki gerir athugasemdir við auglýsta tillögu innan þessa frests,
telst vera henni samþykkur.
Skipulags- og byggingarfulltrúi Akureyrarbæjar.
Akureyrarbær auglýsir:
MIKLAR framkvæmdir og end-
urbætur standa fyrir dyrum í
Miðgarðakirkju í Grímsey. Snorri
Guðvarðarson, málarameistari
með kirkjumálun sem sérsvið, er
mættur til starfa. Miðgarða-
kirkja, sem byggð var árið 1867,
á nú á ný að klæðast sínum upp-
runalegu litum. Það er alla vega
útgangspunkturinn sem unnið
verður eftir í samráði við Magnús
Skúlason, arkitekt og forstöðu-
mann húsafriðunarnefndar. Sem
sagt litirnir sem kirkjan var mál-
uð í fyrir meira en 130 árum
verða notaðir að nýju, þó þannig
að þeir spili vel og skemmtilega
saman, að sögn Snorra. Snorri
Guðvarðarson er einn af fáum
málurum á Íslandi sem helga sig
málun á kirkjum og segir að sér
líði einstaklega vel í vinnunni.
Snorri telur að það muni taka um
tvo mánuði að vinna verkið í Mið-
garðakirkju þar sem allt er pens-
ilvinna og þá ekki unnið með
stórum penslum.
Sonur Snorra, Sverrir Páll,
mun koma til liðs við föður sinn
en hann hefur sérstaklega til-
einkað sér viðarmálun en sú mál-
unarlist er mikið á undanhaldi.
Snorri sagði að litir í kirkjum
væru mikilvægir til að veita vel-
líðan og hlýju, ekki eingöngu í
messuhaldi heldur líka við önnur
tilefni eins og tónleikahald.
Raflögn Miðgarðakirku verður
öll endurnýjuð og sér Ólafur
Kjartanson rafvirki um þá hlið.
Alfreð Garðarsson er formaður
safnaðarnefndar Grímseyjar.
Hann sagði að lengi hefði staðið
til að endurbæta Miðgarðakirkju
innandyra en fyrst hefði kirkjan
verið klædd að utan og kirkju-
turninn byggður upp. Alfreð
sagði líka að fyrir örfáum árum
hefði kirkjugarðurinn sjálfur
verð hlaðinn upp og ræstur fram.
„Miklar umbætur kosta mikið fé
og mun verða leitað til húsafrið-
unarnefndar og víðar um styrk
við þetta stóra verk,“ sagði safn-
aðarformaðurinn.
Mörgum reynst vel
að heita á Miðgarðakirkju
Að lokum langaði Alfreð að
segja frá því að mörgum mann-
inum reyndist vel að heita á Mið-
garðakirkju og ef til vill mætti
segja að hún væri nokkurs konar
„Strandarkirkja“ Norðurlands
enda kirkjustaðurinn magnaður í
eyju sem er útvörður landsins í
norðri.
Í sólskininu á dögunum þegar
Snorri málarameistari stóð á
kirkjutröppunum og var að fá sér
kaffisopa í góða veðrinu sá hann
stórhveli leika listir sínar í vík-
inni fyrir neðan kirkjuna og var
það bæði merkileg ogskemmtileg
upplifun fyrir kirkjumálarann
sem brosti sínu breiðasta.
Morgunblaðið/Helga Mattína
Snorri Guðvarðarson málarameistari og Alfreð Garðarsson, safnaðarformaður í Miðgarðakirkju.
Miðgarðakirkja í sínum
upprunalegu litum
Grímsey
BIKARMÓT Norðurlands í hesta-
íþróttum verður haldið við Hrings-
holt í Svarfaðardal laugardaginn 17.
og sunnudaginn 18. ágúst en knapa-
fundur verður haldinn í kvöld.
Fimm sveitir taka þátt í mótinu og
er keppt í öllum helstu greinum
hestaíþrótta. Keppni hefst árla í
fyrramálið og stendur fram eftir
degi en úrslit í flestum greinum
verða háð á sunnudag. Auk hefð-
bundins mótshalds verður grillveisla
við Hringsholt á laugardagskvöld
þar sem ýmsar krásir verða seldar
gegn vægu gjaldi.
Bikarmót í
hestaíþróttum
HREFNA Harðardóttir leirlistar-
kona sýnir leirverk og hljóðverk
íKetilhúsi (litla sal) í Listagilinu
Akureyri dagana 17.- 31. ágúst nk.
Hugmyndir sem lettneski mál-
og fornleifafræðingurinn Marija
Gimbutas (1921-1994) hefur sett
fram um gyðjudýrkun á forsögu-
legum tíma, varð Hrefnu innblást-
ur við gerð leir- og hljóðverkanna
sem verða til sýnis í Ketilhúsinu.
Ketilhúsið er opið alla daga
nema mánudaga kl. 14-18. Á loka-
degi Listasumars/Menningarnæt-
ur á Akureyri verður opið til kl.
22. Aðgangur er ókeypis.
Hrefna Harðardóttir stundaði
nám á myndlistarbraut MA og í
Myndlista- og handíðaskóla Ís-
lands 1992-1995 og útskrifaðist úr
leirlistadeild. Hún hefur sótt nám-
skeið í grafík, ljósmyndun og leir-
list í Frakklandi, Ungverjalandi, á
Ítalíu og Englandi og tekið þátt í
mörgum samsýningum hérlendis
sem erlendis og er þetta fjórða
einkasýning hennar.
Hrefna sýnir
leir- og
hljóðverk
ÓPERA á sumarkvöldi er yfirskrift
tónleika í Ketilhúsinu á Akureyri
laugardaginn 17. ágúst kl. 20.30.
Valdimar Haukur Hilmarsson
bassa-barítón og Alexandra Rigazzi-
Tarling sópran flytja óperur, aríur
og dúetta.
Valdimar Haukur hefur verið bú-
settur í London sl. þrjú ár. Hann ólst
upp á Húsavík sem barn í tíu ár, en á
ættir sínar að rekja til Eyjafjarðar
(Grenivík og Höfða í Höfðahverfi).
Alexandra Rigazzi-Tarling er unn-
usta hans og eru þau bæði í óperu-
deild Guildhall School of Music and
Drama í London. Þau eru að gera sig
klár fyrir lokaárið sem hefst í sept-
ember og hafa verið á tónleikaferða-
lagi í Bretlandi og á Íslandi síðan í
júlí.
Meðal þess sem verður á efnis-
skránni í Ketilhúsinu má nefna
Brúðkaup Fígarós, Don Giovanni,
Faust, Rakarann í Sevilla, Töfra-
flautuna, Fídelíó og Porgy og Bess.
Miðaverð á tónleikana er 1.000 kr.
Ópera
á sumar-
kvöldi
FYRIRTÆKIÐ GV gröfur ehf.
bauð lægst í tvö útboðsverk hjá
Akureyrarbæ en tilboðin voru
opnuð í vikunni. Annars vegar
var um að ræða framkvæmdir
við gatnagerð og lagnir í hluta
Hafnarstrætis, við Samkomu-
húsið, og hins vegar í lagningu
fráveitulagna frá Glerárbrú við
Hjalteyrargötu og að fyrirliggj-
andi hreinsistöð í Sandgerðis-
bót.
Tvö tilboð bárust í bæði verk-
in, frá sömu aðilum, GV gröfum
og G. Hjálmarssyni hf., og voru
öll tilboðin undir kostnaðaráætl-
un. Tilboðið í Hafnarstræti nær
til nýbyggingar um 400 metra af
götu og gangstéttar og gerðar
bílastæða á um 100 metra kafla,
ásamt hellulögn, frágangi og
lögnum. Kostnaðaráætlun bæj-
arsins hljóðaði upp á 26,8 millj-
ónir króna. GV gröfur buðu 21,8
milljónir króna í verkið eða um
81% af kostnaðaráætlun en G.
Hjálmarsson bauð 24,8 milljónir
króna, eða um 92%.
Kostnaðaráætlun vegna frá-
veitulagna frá Hjalteyrargötu í
Sandgerðisbót hljóðaði upp á 32
milljónir króna. GV gröfur buðu
17,3 milljónir króna í verkið,
sem er aðeins 54% af kostnaðar-
áætlun. G. Hjálmarsson bauð
25,6 milljónir króna eða 80% af
kostnaðaráætlun.
Framkvæmdir
hjá Akureyrarbæ
GV gröfur
buðu lægst
♦ ♦ ♦