Morgunblaðið - 16.08.2002, Blaðsíða 16

SUÐURNES
16 FÖSTUDAGUR 16. ÁGÚST 2002 MORGUNBLAÐIÐ
Í KVÖLD verður haldinn kynning-
arfundur í Glaðheimum á fyrirhug-
aðri parhúsabyggð Búmanna við
Hvammsgötu í Vogum. Íbúðirnar
eru hugsaðar fyrir 50 ára og eldri.
Jóhanna Reynisdóttir, sveitar-
stjóri í Vogum, segir að með mark-
vissu átaki til fjölgunar íbúum, sem
fór af stað árið 1999, hafi barnafólki
fjölgað mikið í bænum. Nú sé hins
vegar vilji og áhugi fyrir því að bjóða
eldra fólki húsnæði á hagstæðum
kjörum í bænum.
Íbúar í Vogum eru í dag um 850
talsins. Áður en átakið hófst voru
þeir um 700. Þetta er í takt við þau
markmið sem yfirvöld sveitarfé-
lagsins settu sér, en vonast var til að
íbúafjöldinn næði 1.000 á fimm árum.
Í þeim tilgangi var ákveðið að úthluta
100 nýjum byggingarlóðum í bænum
og hafa um 50 byggingarleyfi verið
gefin út. Í upphafi ákvað sveitarfé-
lagið að greiða niður gatnagerðar-
gjöld til að laða að nýja íbúa. Síðan
átakið hófst árið 1999 hefur íbúða-
verð í Vogum hækkað um 40% og allt
sem fer á sölu selst að sögn Jóhönnu.
En af hverju fer sveitarfélag í
markvisst átak til að fjölga íbúum?
Hagstæðari rekstrareining
„700 íbúa bæjarfélag er mjög
óhagstæð rekstrareining að mörgu
leyti,“ segir Jóhanna. „Tilgangurinn
var því að hækka tekjur bæjarins.
Það kostar nær það sama að reka
grunnskóla fyrir 700 og 1.000 manna
sveitarfélög. Það kostar jafnmikið
eða minna að reka íþróttamiðstöð
fyrir fleiri en færri. Eina tilfellið þar
sem fjölgun er ekki hagkvæm er
gagnvart leikskólanum.“ Jóhanna
segir að íbúar höfuðborgarsvæðisins
hafi verið markhópur við markaðs-
setningu Voga. Það hefur að sögn Jó-
hönnu gengið eftir og stór hluti
þeirra sem flutt hafa til bæjarins
undanfarin ár vinnur á höfuðborgar-
svæðinu, enda ekki nema 30 mínútna
akstur á milli. Með tvöföldun Reykja-
nesbrautar munu samgöngur batna
enn frekar.
Jóhanna segir að daglega sé sótt
um lóðir í Vogum. Nýja byggðin í
Norður- og Suður-Vogum saman-
stendur enn sem komið er eingöngu
af einbýlishúsum. Parhúsabyggð Bú-
manna mun breyta því svo og fyr-
irhuguð fjölbýlishús Íslenskra aðal-
verktaka. Þar verða íbúðir fyrir 60
manns. Búið er að deiliskipuleggja
svæðið og beðið er eftir endanlegum
teikningum af húsunum og svæðinu í
heild.
Jóhanna segir að búið sé að
tryggja fjármagn fyrir parhúsa-
byggð Búmanna, teikningar liggi
fyrir og búið sé að semja við verk-
taka. Kynningarfundurinn í kvöld
mun svo leiða í ljós hvort raunveru-
legur áhugi sé fyrir hendi. „Það virð-
ist vera mikill áhugi og ef það reynist
rétt verður strax hafist handa við
byggingu parhúsanna og þau verða
þá tilbúin til afhendingar í febrúar.“
Íbúðirnar verða tveggja og þriggja
herbergja.
„Þegar við fórum út í markaðs-
setningu Voga hófum við miklar
framkvæmdir, sem meðal annars
sneru að stækkun leikskólans,“ segir
Jóhanna. „Við gerðum þó ekki ráð
fyrir að við fengjum eins hátt hlutfall
og raun bar vitni af fólki með börn á
leikskólaaldri, svo að leikskóli, sem á
að duga fyrir 1.000 manna sveitarfé-
lag, er orðinn þéttsetinn. En við
stefnum að því að hafa áfram enga
biðlista. Húsnæði leikskólans gefur
svigrúm til fjölgunar barna, en þörf
verður á að fjölga starfsfólki.“ Jó-
hanna segir að Vogar séu komnir
langt yfir landsmeðaltal í barna-
fjölda. „Grunnskólinn er einsetinn.
Með því að vera með um 1.000 íbúa
þurfum við ekki að skipta niður í
fleiri en eina bekkjardeild í hverjum
árgangi. Við erum með 18 nemendur
að meðaltali í bekk svo við höfum enn
svigrúm.“
Þegar hefur verið úthlutað nokkr-
um lóðum fyrir iðnaðarhúsnæði. Fyr-
irtækið Normi hefur nú flutt starf-
semi sína úr Garðabæ í Voga. Í
fyrirtækinu starfa um tuttugu
manns. Jóhanna segir að á svæðinu
þar sem Normi byggði sitt húsnæði,
við afleggjarann að Vogum, standi til
að úthluta fleiri iðnaðarlóðum á
næstunni.
Frístundabyggð í Hvassahrauni
Tillaga að deiliskipulagi fyrir frí-
stundabyggð í Hvassahrauni, rétt við
Straumsvík, hefur verið samþykkt í
hreppsnefnd Vatnsleysustrandar-
hrepps. Beðið er eftir svörum frá
Skipulagsstofnun um hvort auglýsa
megi tillöguna án breytinga á aðal-
skipulagi.
Í Hvassahrauni, landi Styrktar-
félags vangefinna, hafa undanfarin
ár risið kofar og hús af ýmsum stærð-
um og gerðum, en svæðið er ekki
skipulagt. „Við erum að reyna að
stemma stigu við þessari óskipu-
lögðu byggð,“ segir Jóhanna. „Við
höfum undanfarið verið að láta fjar-
lægja ónýt hús af svæðinu, en það
hefur gengið misjafnlega vel. En
svæðið er mjög fallegt og eflaust
margir sem myndu vilja eiga þar
sumarhús eins og tillagan gerir ráð
fyrir að verði á þessu svæði.“
– En af hverju ætti fólk að flytjast í
Voga, fyrir utan lág gatnagerðar-
gjöld?
„Hér er rólegt og gott að búa. Fyr-
ir þá sem stunda útivist er svæðið
kjörið. Hér er að finna ótal göngu-
leiðir um Reykjanesið sem gaman er
að fara. Hér eru líka golfvöllur, hest-
húsahverfi og glæsileg íþróttamið-
stöð og sundlaug. Við ætlum að fara
út í að markaðssetja höfnina okkar
sem frístundahöfn.
En góð þjónusta er aðeins hluti af
aðdráttarafli bæjarins. Andrúmsloft-
ið í bænum er afslappað og umhverf-
ið fallegt. Við erum líka með átak í
umhverfismálum, sem t.d. lýtur að
uppgræðslu. Bærinn er því að gróa
upp. Margir koma hingað og heillast
af staðnum og vinalegu yfirbragði
hans.“
Frístundabyggð og fjölbýlishús
Ljósmynd/Hilmar Bragi
Jóhanna Reynisdóttir, sveitarstjóri í Vogum, segir parhúsabyggðina
sérstaklega skipulagða með eldra fólk í huga.
Teikning/Landslag ehf.
Parhúsabyggðin verður nálægt ströndinni, vinstra megin á nýja skipu-
lagssvæðinu. Rauði liturinn táknar lóðir sem þegar er búið að byggja á.
Skipulag fyrirhugaðrar parhúsabyggðar Búmanna við Hvammsgötu kynnt í Glaðheimum í kvöld
Vogar