Morgunblaðið - 30.03.2003, Blaðsíða 14
14 SUNNUDAGUR 30. MARS 2003 MORGUNBLAÐIÐ
inn framleiðandi virtist vera kominn
eins langt og Archos, í það minnsta
var svarið jafnan „kemur á markað í
haust“, „seinna á árinu“ eða bara
„bráðum“. Mikil gróska var aftur á
móti í MP3-spilurum; stór hluti einn-
ar sýningarhallarinnar var undirlagð-
ur af taívönskum fyrirtækjum, flest-
um litlum, og þar var ótrúlegt úrval af
svonefndum USB-minniskortum,
sem eru litlir stautar, um 7–10 sm á
lengd, sem stinga má í tölvu og nota
sem aukadrif. Slík minniskort, eða
minnisstautar, hafa verið á markaði
lengi og til að mynda nokkuð algengt
að tölvufyrirtæki gefi stauta sem
merktir eru þeim á kynningum. Aust-
ur í Taívan hafa menn aftur á móti séð
óteljandi möguleika í slíkum stautum,
því ekki var bara annað hvert fyrir-
tæki með stauta á básum sínum held-
ur voru þau flest einnig með stauta
sem breytt hafði verið í MP3-spilara
eða örsmáar stafrænar myndavélar.
Spilararnir áttu reyndar nær allir það
sameiginlegt að vera afskaplega ljót-
ir; ég sá ekki nema einn sem var með
flottri hönnun. En tæknileg útfærsla
var mjög flott víða, sumstaðar hægt
að taka upp tónlist og breyta í MP3
jafnharðan; hægt að nota stautinn
sem upptökutæki og taka upp fyrir-
lestra eða viðtöl. Sem stendur eru
þeir flestir 128 MB, nokkrir eru þó til
sem 256 MB, en væntanlegir eru spil-
arar sem rúma 512 MB og á næsta ári
GB spilarar sem eru þá óneitanlega
býsna eiguleg apparöt. Hægt er að
nota alla spilarana sem aukadisk og
setja á þá hvaða gögn sem er.
Tréskjáir og talandi þvottavél
Sum fyrirtæki bjóða svo sérhæfða
og flókna hluti að menn fá höfuðverk
við að heyra skýringar á því. Önnur
þar sem engin leið er að gera sér
grein fyrir því hvað er í gangi; hvaðan
viðkomandi hugmynd er eiginlega
komin og hverjir lögðu pening í fyr-
irbærið. Talsvert hefur dregið úr sér-
kennilegum varningi á CeBIT eftir
því sem menn hafa gert meiri kröfur
um að vit sé í varningnum; að ekki sé
bara verið að framleiða eitthvað af því
það er svo sniðugt.
Sænsk fyrirtæki hafa sum verið
með sérkennilegar hugmyndir, án
þess þó að hægt sé að alhæfa um
sænska tölvutækni almennt. Sem
dæmi um hugmyndir sem eru
kannski ekki svo galnar er til að
mynda TFT-tölvuskjár í beyki-
ramma. Hann kom ótrúlega vel út þó
notagildið sé ekki augljóst. Ekki eins
augljóst var notagildi framleiðslu
PopCatcher, en það er í sem stystu
máli einskonar MP3-útvarp sem
hljóðritar lög úr útvarpsútsendingu
og vistar sem MP3-þjöppuð lög og
hendir sjálfkrafa út auglýsingum og
spjalli milli laga.
Þýska fyrirtækið Speech Experts
sýndi talandi þvottavél sem vakið hef-
ur nokkra athygli. Hægt er að segja
vélinni fyrir verkum, hvað eigi að fara
að þvo og hvernig blettir séu í flík-
unum. Vélin svarar að bragði, biður
um meiri upplýsingar eða skensar
eigandann fyrir að vera að sulla niður
á sig rauðvíni. „Þú drekkur of mikið af
rauðvíni, drekktu heldur bjór það er
auðveldara að þvo hann úr,“ heyrði ég
hana segja. Notagildi slíks apparats
er ekki augljóst. Hugsanlega getur
það komið sér vel að geta rætt málin
við þvottavélina ef viðkomandi er óör-
uggur um hvernig á að þvo (og svo er
alltaf gott að hafa einhvern til að tala
við). Að sögn hönnuða vélarinnar er
hún í raun bara kynning á því hvað
hægt sé að gera með raddstýringu á
heimilistækjum og fleiri tólum. Ekki
stendur til að setja slíka vél í fram-
leiðslu, í það minnsta ekki í náinni
framtíð.
Það var reyndar eftirtektarvert
hve margir voru að vinna við radd-
greina, þ.e.a.s. búnað sem skilur mælt
mál og getur brugðist við munnlegum
skipunum. Margir sjá enda fyrir sér
að slíkt eigi eftir að verða áberandi í
farsímum og álíka tækjum, sem sum
eru orðin svo lítil að illt er fyrir venju-
legar hendur að stýra þeim. Það fellur
líka vel að hugmyndinni um blá-
tannarsíma. Viðkomandi get-
ur þá verið með símann í vas-
anum og þarf ekki að taka
hann upp til að svara eða
hringja, getur samið og sent
SMS og látið síðan lesa þau fyrir sig.
Tækni sem er innan seilingar
Framtíðardeild IBM var með
margt forvitnilegt á sýningunni og
þar á meðal var raddstýrð HP iPaq-
lófatölva sem gat flett upp götum á
götukorti svo dæmi sé tekið. Einnig
búnaður til að hlusta á talað mál þar
sem mikill niður eða hávaði er í kring.
Búnaðurinn er með sérstökum hrey-
fiskynjara sem les varir, ef svo má
segja. Tölva notar hreyfiskynjarann
til að fylgjast með munnhreyfingum
þess sem talar og leggur það saman
við það sem henni heyrist hann segja
til að fá út rétta merkingu. Mjög
snjöll lausn sem svínvirkar.
Önnur lausn sem virkaði vel var
sýnd á bás HP þar sem annar hver
starfsmaður virtist vera með Com-
paq-töflutölvu og notuðu þeir hana
mikið (til að teikna skýringarmyndir
o.fl.). Töflutölvurnar frá Compaq eru
með hljóðnema. Eitt fyrirtæki sýndi
útgáfu af Dragon Naturally Speak-
ing-hugbúnaði sem skráði jafnharðan
það sem maður sagði við tölvuna. Sá
sem kynnti búnaðinn las viðstöðu-
laust og tölvan ritaði það samvisku-
samlega upp. Það var einfalt að leið-
rétta: „bakka um tvö, víxla stöfum,
upp um eina línu, tvö til hægri, eyða
orði“ og svo framvegis. Mjög hagnýtt
og mun hraðvirkara, að sögn þeirra
sem kynntu. Þeir sem lesa tölvunni
fyrir, í stað þess að slá það inn, af-
kasta um 40% meiru en þeir sem eru
hvað fimastir á lyklaborðinu.
Þráðlaus framtíð
Segja má að þráðleysi hafi verið
einskonar yfirskrift CeBIT 2003. Í
það minnsta voru ótrúlega margir að
kynna þráðlausan búnað. Til gamans
má geta þess að þýsku járnbrautirnar
hyggjast koma upp þráðlausu net-
kerfi í öllum biðsölum sínum og lest-
um. Farþegar myndu þá kaupa eins-
konar skafmiða til að komast inn á
kerfið aukinheldur sem Lufthansa
hyggst gera slíkt hið sama; byrja á að
setja upp þráðlaust net í flugstöðvum,
en einnig á að vera hægt að nota þráð-
laust netkerfi á flugleiðinni Frank-
furt/Washington innan skamms.
Gott dæmi um þráðlausar lausnir
er Hewlett-Packard sem
hefur losað sig við
snúruna að miklu leyti.
Fyrirtækið sýndi mikið af
þráðlausum prenturum af
öllum stærðum og gerðum.
Smekklega var það leyst ef
maður með þráðlausa tölvu
vill prenta út á nærstaddan
prentara án þess að vera
tengdur honum. Hann slær
einfaldlega inn IP-tölu við-
komandi prentara, en IP-tal-
an er sýnileg í stjórnskjá nýju
prentaranna og sumar eldri
gerðir geta víst sýnt hana með
smá tilfæringum. Mjög snyrti-
leg lausn. Ekki fer á milli mála
að HP ætlar sér að sækja enn
fram á prentaramarkaði með
breiða línu prentara. Rétt er að
geta þess að menn geta enn haldið
sig við snúrurnar; þráðlaus bún-
aður er viðbót við prentarana sem
eru allir með venjulegum prent-
ara- og nettengjum.
Meðal breytinga á bleksprautu-
prenturum fyrirtækisins er að blek-
hylki eru nú aðskilin, þ.e. litur og
svartur eru í aðskildum hylkjum. Með
því er fyrirtækið greinilega að bregð-
ast við gagnrýni neytendasamtaka
sem höfðu beitt sér gegn HP fyrir að
hafa allt í einu hylki. Ekki verður hér
farið út í það hvort sú gagnrýni hafi
verið réttmæt yfirleitt en heldur
finnst mér það afturför að hafa prent-
hausana sér, en neytendasamtök hafa
einmitt gagnrýnt það líka að HP seldi
blekhylki með prenthausunum áföst-
um. Málið er aftur á móti að á flestum
heimilum er prentarinn svo lítið not-
aður að prenthausarnir eru sífellt að
stíflast og eyðileggjast. Því sýnist
mér lítið hagræði af því að þurfa
kaupa og skipta um prenthausinn sér.
A-, B- og G-staðlar
Bandaríska fyrirtækið Linksys
sýndi þráðlausan búnað á CeBIT, en
fyrirtækið hefur yfirburðastöðu á
markaði vestan hafs og stefnir af
krafti inn á Evrópumarkað. Linksys
býður margar tegundir af þráðlaus-
um netbúnaði; aðgangspunkta, beina,
nafir og svo má telja. Eitt helsta
tromp Linksys er að fyrirtækið er
þegar komið með í sölu þráðlaus net-
kerfi fyrir heimili og fyrirtæki sem
byggja á G-staðlinum. Fram að þessu
hafa þrír staðlar verið í notkun,
802.11a, 802.11b og 802.11g, sem eru
almennt kallaðir A-, B- og G-staðlar.
B-staðallinn er mest notaður, og al-
mennt þar sem menn eru með þráð-
lausan búnað fyrir heimili, og tiltölu-
lega ódýr fyrir vikið. Hann notar 2,4
GHz tíðnisviðið, sem getur skapað
árekstra við örbylgjuofna, þráðlausa
síma (ekki GSM eða NMT) og fleira.
Flutningsgeta hans er 11 Mbitar á
sek. A-staðallinn er aftur á móti nýrri
og kostar því meira. Hann notar 5
GHz tíðnisvið sem er lítið notað ann-
ars og hefur engin áhrif á 2,4 GHz
sviðið. Flutningsgeta er umtalsvert
meiri, eða um 54 Mbitar á sek. Á þeim
hraða er til að mynda hægt að
streyma kvikmynd frá tölvu í sjón-
varp svo dæmi sé tekið. Langdrægni
A-staðalsins er um fjórðungur af B-
staðlinum. G-staðallinn er svo nýjast-
ur. Hann er svipaður og B-staðallinn
að því leyti að hann notar 2,4 GHz
tíðnisviðið, er tiltölulega ódýr í út-
færslu, hefur sömu langdrægni og A-
staðallinn og sömu flutningsgetu og
A-staðallinn, 54 Mbitar á sek. Á tví-
mælalaust eftir að leysa B-staðalinn
af hólmi fyrir heimili og hugsanlega
fyrir flest fyrirtæki líka, ekki síst í
ljósi þess að G-staðals tæki geta líka
nýtt B-staðalssenda.
Varla þarf að geta þess að Linksys
framleiðir einnig búnað fyrir þá sem
halda vilja í snúrurnar.
Philips og Medion
Philips er öflugt fyrirtæki og sýndi
það rækilega á CeBIT; sýndi mikið af
nýjungum á mjög stórum bás. Líkt og
fleiri er Philips á fullu í að samþætta
tæki, þ.e. bæta tæknilegum mögu-
leikum við tæki eins og sjá má á hlut-
um eins og EXP521-ferðageislaspil-
aranum. Ekki er bara að hann spili
venjulega geisladiska og MP3-
brennda diska, heldur er einnig hægt
að spila á honum tölvuleiki – fimm
leikir fylgja með spilaranum. Ég
sannreyndi að hægt er að hlusta á
tónlist samtímis því sem spilaðir eru
leikir.
Philips er líka meðal fyrirtækja
sem þróað hafa svonefnda Blu-Ray-
tækni, en það er áþekk tækni og not-
uð er í dag í geislaspilurum og -brenn-
urum nema að því leyti að notaður er
leysigeisli á annarri og styttri bylgju-
lengd en hingað til hefur tíðkast. Fyr-
ir vikið er hægt að koma mun meira af
upplýsingum fyrir á slíkum diskum.
Meðal annars kynnti Philips frum-
gerð af BluRay-brennara sem er ekki
stærri en minniskort og getur brennt
á þriggja sm diska 1 GB en 23 GB
komast á diska í venjulegri stærð.
Fróðlegt var að komast í tæri við
Medion, en fyrir stuttu fóru að sjást
tölvur frá því fyrirtæki hér. Þá
spurðu margir hvaða fyrirtæki Med-
ion væri. Á CeBIT mátti glöggt sjá að
Medion er eitt stærsta fyrirtæki á
heimilistölvusviðinu í Þýskalandi og
ekki bara það heldur framleiðir Med-
ion DVD-spilara, hljómtæki, stafræn-
ar myndavélar, síma, faxtæki, skjái,
gervihnattamóttakara, MP3-spilara,
sjónvörp, prentara, skanna, bílaút-
varpstæki og svo má lengi telja.
Markaðsstjóri fyrirtækisins á Norð-
urlöndum sagði að Medion hefði vaxið
býsna hratt í Þýskalandi og væri að
sækja í sig veðrið utan Þýskalands.
Betur verður greint frá nýjungum í
símatækni og stafrænni ljósmyndun
síðar.
Panasonic kynnti meðal annars DVD-ferðaspilara með mjög skýrum og
góðum skjá.
Sími á úlnliðinn frá Samsung.
Philips Ex-
panium
EXP521 er ferða-
geislaspilari sem spilar
líka MP3-diska og svo
er hægt að spila tölvu-
leiki á honum, en fimm
leikir fylgja með.
Medion er með
breiða línu af tölv-
um sem sumar
hafa ekki enn bor-
ist hingað til
lands.
arnim@mbl.is