Fréttablaðið - 29.11.2007, Blaðsíða 90

62 29. nóvember 2007 FIMMTUDAGUR
FÓTBOLTI Ólafur Jóhannesson
stýrði sínum fyrsta landsleik í síð-
ustu viku er Ísland tapaði fyrir
Dönum 3-0 á Parken. Ólafur hefur
verið spar á allar yfirlýsingar
hingað til og lítið viljað tjá sig um
málefni landsliðsins. Fréttablaðið
settist niður með Ólafi á Hilton-
hótelinu í gær og rak úr honum
garnirnar með ætlanir sínar, hið
meinta agaleysi landsliðsins, Eið
Smára og margt fleira.
„Ég var mjög sáttur með þessa
fyrstu ferð mína. Ég var ánægður
með leikmennina sem mér fannst
gefa mikið af sér. Læknalið lands-
liðsins er frábært og það kom mér
þægilega á óvart slíkir fagmenn
þeir eru. Það var flest jákvætt en
við sem erum í þjálfarateyminu
ætlum að búa til okkar umgjörð í
kringum liðið þannig að það verða
einhverjar breytingar hvað það
snertir. Ég hef ákveðnar hug-
myndir og væntingar um hvað ég
vil gera og það byrja allir með
hreint borð hjá mér,“ sagði Ólafur
um sína fyrstu reynslu með lands-
liðinu en á hvað leggur hann mesta
áherslu?
Munum alltaf spila 4-5-1 hjá mér
„Að sjálfsögðu varnarleikinn
enda hefur hann ekki verið nógu
góður. Við munum spila 4-5-1 allt-
af undir minni stjórn en þó með
einhverjum áherslubreytingum
hverju sinni. Við munum oftar en
ekki vera með tvo djúpa miðju-
menn sem verjast. Það hefur í
gegnum tíðina verið vandamál hjá
landsliðinu hvað við eigum að gera
þegar við erum með boltann. Við
ætlum að reyna að finna lausn á
því og hún felst líklega í því að
stilla upp mönnum sem eru flinkir
og geta haldið boltanum. Fjórir
fremstu menn eru okkar sóknar-
menn en þeir hafa að sjálfsögðu
varnarhlutverk líka. Grétar verð-
ur til að mynda bara bakvörður
hjá mér eins og AZ Alkmaar.“
Næsta verkefni landsliðsins er
á Möltu í febrúar þar sem Ísland
tekur þátt í fjögurra þjóða móti. Á
hvað mun Ólafur leggja áherslu
þar?
„Það liggur ljóst fyrir að við
getum ekki farið með alla atvinnu-
mennina okkar þangað. Einn af
dögunum er alþjóðlegur leikja-
dagur og þá fæ ég alla sem ég vil.
Uppistaðan verður annars leik-
menn frá Íslandi og ég mun reyna
að fá leikmennina á Norðurlönd-
unum til að vera allan tímann en
það verður erfitt enda hugsa
félagsliðin fyrst og fremst um
sjálft sig.
Ég mun svo líka kíkja á yngri
strákana sem eru að spila í Evrópu
og ég hef áhuga á að skoða,“ sagði
Ólafur sem ætlar að vera mjög
duglegur að fara út og skoða
íslensku strákana sem spila víðs
vegar um Evrópu.
Hef ekki trú á að agaleysi verði
vandamál
Það hefur mikið verið rætt um
meint agaleysi í landsliðshópnum
síðustu vikur. Hvernig hyggst
Ólafur tækla það málefni?
„Allir íþróttamenn vilja hafa
aga og það gengur ekki upp að
vera með agalausan íþróttamann.
Þessir strákar lúta allir aga hjá
sínum félagsliðum og hið sama
verður upp á teningnum með
landsliðinu. Ég hef ekki trú á að
eitthvað agaleysi verði vandamál.
Ég mun ekki rígbinda menn í ein-
hverju og ég treysti á almenna
skynsemi leikmanna. Ég ætla ekki
að vera einhver fóstra fyrir leik-
mennina. Ég verð að treysta leik-
mönnunum og þeir verða að
treysta mér. Annars næst ekki
árangur. Mönnum verður líka að
líða vel og leikmenn eiga að hlakka
til að koma í landsliðsverkefni,“
sagði Ólafur en þó svo hann muni
treysta leikmönnum þá muni hann
ekki taka neinum vettlingatökum
þá leikmenn sem brjóta agaregl-
ur.
„Í fyrsta lagi þá vona ég að ekki
muni koma til þess að einhver
brjóti reglurnar alvarlega og ég
trúi ekki að það muni gerast. Ef
einhver vitleysa er í gangi þá
verður að sjálfsögðu tekið fast á
slíkum málum og ég tel ekki mikl-
ar líkur á því að ég myndi velja
viðkomandi leikmann aftur í hóp-
inn,“ sagði Ólafur.
Gagnrýni vegna landsliðsvals
hverju sinni fer ekki í taugarnar á
Ólafi. Ólafur gerði litlar breyting-
ar á landsliðshópnum fyrir Dana-
leikinn en hann segir að breyting-
arnar verði meiri í næstu
verkefnum.
„Ég geri ráð fyrir því. Ég vildi
litlu breyta fyrir Danaleikinn en
það verða klárlega meiri breyting-
ar næst.“
Vil spila á öllum alþjóðlegum leik-
dögum
KSÍ hefur fengið harða gagn-
rýni fyrir hve illa sambandið
hefur hlúð að landsliðinu enda hafi
til að mynda vináttulandsleikir
verið mjög fáir. Horfir nú til betri
vegar í þeim málum og Ólafur
segir að stefnan sé að spila eins
mikið og hægt er.
„Það er okkar markmið að fá
leik á öllum alþjóðlegum lands-
leikjadögum. Möltumótið er frá-
bært framlag og ég vil að við
tökum þátt í slíku á hverju ári ef
við mögulega getum. Ég mun fara
fram á það. Því fleiri leikir því
betra,“ sagði Ólafur en mun hann
verða frekur við Geir Þorsteins-
son, formann KSÍ, fái hann sínu
ekki framgengt?
„Ég hef alltaf sagt að ég sé fínn
í umgengni svo framarlega sem
menn fara eftir mér. Annars get
ég orðið hundfúll. Ég hef alltaf
verið óhræddur við að segja mína
skoðun og það breytist ekkert
sama hvort mönnum líkar það
betur eða verr. Við Geir ætlum
samt að vinna þetta saman og
erum sammála um þá leið sem nú
á að fara. Mér líst bara vel á
þetta.“
Eiður Smári er ekki að hætta
Eiður Smári Guðjohnsen lands-
liðsfyrirliði spilaði ekki gegn
Dönum en Ólafur segir að ekkert
sé hæft í orðrómi um að hann ætli
að hætta með landsliðinu.
„Eiður Smári er besti fótbolta-
maður Íslands og ég vil að hann
spili fyrir liðið. Ég talaði oft og
mikið við Eið um daginn þar sem
við ræddum ítarlega um landslið-
ið.
Hann gat því miður ekki komið
til Danmerkur en ég var fullkom-
lega sáttur við ástæðurnar sem
hann gaf fyrir fjarverunni. Það er
engin fýla í gangi og hann hefur
ekki sagt við mig að hann ætli sér
að hætta með landsliðinu,“ sagði
Ólafur en hann segir að Eiður
muni ekki fá neina sérmeðferð hjá
sér.
„Eiður er settur undir nákvæm-
lega sama hatt og aðrir leikmenn
landsliðsins. Hjá mér lúta allir
sömu reglum og það er ein regla
fyrir alla,“ sagði Ólafur Jóhannes-
son landsliðsþjálfari.
henry@frettabladid.is
Landsliðsþjálfari en ekki fóstra
Ólafur Jóhannesson landsliðsþjálfari segir að sögusagnir um meint agaleysi í íslenska landsliðinu valdi
honum ekki hugarangri. Hann segist treysta leikmönnum liðsins og þeirra skynsemi en tekur þó fram að
hart verði tekið á þeim sem verða uppvísir að agabrotum innan landsliðshópsins.
GOTT SAMSTARF Ólafur er ánægður með samstarfið við Pétur Pétursson. Þeir félagar
sjást hér kátir á Parken á dögunum. NYHEDSAVISEN/MARTIN SYLVEST
ÞAÐ LÚTA ALLIR SÖMU REGLUM Ólafur Jóhannesson segir að hvorki Eiður Smári né nokkur annar leikmaður landsliðsins muni fá
sérmeðferð hjá sér. Það sé ein regla fyrir alla. Ólafur segir að ekkert sé hæft í þeim orðrómi að Eiður Smári ætli að hætta með
landsliðinu. Hann hafi ekki nefnt neitt slíkt við sig. NYHEDSAVISEN/MARTIN SYLVEST
FÓTBOLTI Manchester United
tryggði sér efsta sætið í sínum
riðli með 2-1 sigri á Sporting og
leikmenn liðsins geta því farið
afslappaðir í lokaleikinn á móti
Roma á Ítalíu.
Það kemur sér vel fyrir
stjórann Sir Alex Ferguson því
liðið mætir Liverpool á Anfield í
ensku deildinni aðeins nokkrum
dögum síðar. Ferguson gaf það til
kynna að hann myndi hvíla
lykilmenn í leiknum á móti Roma.
„Þetta var mjög mikilvægur
sigur því nú get ég notað allt mitt
lið í síðasta leiknum. Það gæti
jafnvel farið svo að einn til tveir
leikmenn kæmu ekki með því
okkar bíður mikilvægur leikur á
móti Liverpool,“ sagði Ferguson.
- óój
Sir Alex Ferguson:
Hvílir menn í
lokaleiknum
KÁTUR Sir Alex Ferguson var ánægður
með úrslitin á móti Sporting.
NORDICPHOTOS/GETTY
FÓTBOLTI Zlatan Ibrahimovic
skoraði frábært mark í 3-0 sigri
Inter á Fenerbahce en þetta var
fimmta mark hans í keppninni.
„Það var mjög mikilvægt að
vinna leikinn og tryggja okkur
sæti í 16 liða úrslitunum. Ég er
mjög ánægður með markið sem
og frammistöðu liðsins,“ sagði
Zlatan. Mörgum þótt sem hann
nældi sér viljandi í gult spjald
korteri fyrir leikslok. Hann fékk
það fyrir að tefja leikinn en hætti
þá tvisvar sinnum við að taka
aukaspyrnu.
„Ég er ekkert leiður yfir gula
spjaldinu eða leikbanninu. Það að
ég skuli missa af lokaleiknum
skiptir engu máli,“ sagði Zlatan í
viðtali á heimasíðu Inter-liðsins
eftir leikinn. - óój
Zlatan Ibrahimovic:
Reyndi hann
að fá spjaldið?
VILJANDI SPJALD? Zlatan var bara sáttur
með að vera kominn í leikbann.
NORDICPHOTOS/AFP