Morgunblaðið - 02.05.2006, Blaðsíða 15

MORGUNBLAÐIÐ ÞRIÐJUDAGUR 2. MAÍ 2006 15
MINNSTAÐUR
LANDIÐ
Hvanneyri | Bjarni Guðmundsson prófessor
við Landbúnaðarháskóla Íslands gaf nýlega
út hljómdiskinn ,,Að sumarlagi“ með fimm-
tán frumsömdum lögum. Lögin eru öll í létt-
ari kantinum og tengjast sumri, sól, sveit og
bústörfum.
Ljóðin við lögin eru flest eftir Guðmund
Inga Kristjánsson frá Kirkjubóli í Bjarn-
ardal, en þar eru líka ljóð eftir Guðmund
Böðvarsson, Jóhannes úr Kötlum, Trausta
Eyjólfsson og eitt ljóð er frumsamið. Bjarni
flytur flest lögin sjálfur en Þórunn Péturs-
dóttir syngur tvö.
Sleppur létt frá heimilisstörfunum
,,Að útgáfunni er býsna langur aðdrag-
andi segir Bjarni, ,,ég er búinn að fást við al-
þýðutónlist í hálfa öld og hef gripið í að
semja lög. Lögin á disknum eru valin úr
haugi laga sem hafa orðið hafa til á síðustu
tuttugu árum. Segja má að fjölskyldan og
nágrannar hafi valdið því að ég fór út í
þessa útgáfu. Fyrir sex árum fékk ég í gjöf
frá fjölskyldunni möppu sem innihélt 200
tóma plastvasa og var merkt mér með nafni
auk þess sem á henni stóð ,,Laga- og texta-
bók, þannig að ég fór að tína saman blöð og
nótur, nú er mappan hálffull og ég hugsa að
hún dugi mér. Nágrannar og sveitungar
Bjarna ýttu svo undir að lögin yrðu ódauð-
leg. ,,Þegar ég átti stórafmæli fyrir nokkru,
varð þrítugur í annað sinn, gáfu þeir mér
peningagjöf til þess að fara í hljóðver. Ég
tók upp hjá Vilhjálmi Guðjónssyni sem sá um
hljóðfæraleik að mestu, og alla hljóðritun og
saman útsettum við þessi 15 lög sem fóru inn
á diskinn.“ Bjarni semur lögin sín á gítar og
lítilsháttar á hljómborð. ,,Gítar hefur verið
mitt afþreyingarhljóðfæri síðustu 40-50 ár-
in,“ segir Bjarni ,,og ég slepp létt frá heim-
ilisstörfunum, konan mín Ásdís B. Geirdal
hefur séð um það allt fyrir mig. Ég glamra á
hljóðfærið í staðinn fyrir að láta í upp-
þvottavélina enda er það yfirlýst skoðun fjöl-
skyldunnar að ég kunni það ekki. Hins vegar
kann ég að skúra og er nokkuð góður í því.“
Ásdís er framkvæmdastjóri og fjármálastjóri
útgáfunnar, en dætur þeirra þrjár koma líka
að framkvæmdum. Sú elsta, Ásdís Helga, er
forstöðumaður kynningardeildar, Þórunn
Edda er hönnuður umbrots og sá um tölvu-
vinnslu og sú yngsta, Sólrún Halla, gerir það
sem út af stendur. ,,Ég kvarta ekki yfir söl-
unni, ég er að gera þetta að gamni mínu og
er enginn sölumaður sjálfur. Ég veit hins
vegar að dætur mínar þegja ekkert yfir út-
gáfunni. Og í þessum töluðum orðum hringdi
farsími Bjarna og einhver pantar disk. ,,Það
lítur út eins og ég hafi pantað þetta símtal,“
segir Bjarni og hlær ,,einmitt með blaða-
manninn hjá mér.“ Gefin voru út 1000 eintök
og getur Bjarni fengið meira ef hann vill.
,,Þó ég gefi þetta sjálfur út hef ég fengið
mikla og góða hjálp frá Steinari Berg hjá
Steinsnar, tónlistar- og ferðabónda í Fossa-
túni.“ Þeir sem hafa áhuga á að eignast disk-
inn geta sett sig í samband við Bjarna á net-
fanginu laekjartun@vesturland.is
Syngur sauðasöngva
fyrir ameríska eldri borgara
Bjarni hefur líka verið að koma fram
ásamt Snorra Hjálmarssyni bónda og söngv-
ara á Syðstu-Fossum. ,,Við erum búnir að
syngja saman í 14 ár sauðasöngva og íslensk
lög og texta sem snerta sauðkindina um árs-
ins hring. Við höfum skemmt um 3000 amer-
ískum eldriborgurum sem hingað koma til
landsins gagngert til að kynnast náttúru,
sögu og atvinnuháttum. Við skemmtum þeim
á kvöldsamkomum á Hótelinu í Borgarnesi í
15-18 mínútur og spilum 5-6 lög. Þetta er
launað starf og harður bissness,“ segir
Bjarni brosandi. ,,Nú, oft koma norrænir
hópar í heimsókn að Hvanneyri og ef vantar
uppákomur troðum við upp. Við syngjum
líka saman í kór, erum í kirkjukór Hvann-
eyrarsóknar og Reykholtssóknar.“ Bjarni
söng jafnframt um árabil í karlakór en hefur
látið af þeirri iðju sökum tímaskorts.
En tónlistin er ekki eina áhugamál Bjarna
því hann hefur verið í forsvari fyrir Búvéla-
safnið að Hvanneyri og nú er einnig í bígerð
að koma upp Landbúnaðarsafni Íslands.
Söfnun, rannsóknir og kynning
,,Það er allt í þróun, og hugmyndin er að
þetta verði fyrirtæki sem tæki að sér að
gera búnaðarsögu 20. aldar skil, með söfnun,
rannsóknum og kynningu . Ætlunin að þetta
þróist áfram upp á grundvelli Búvélasafns-
ins sem hér hefur starfað um árabil. For-
sendur fyrir svona safni hér á stað eru
margar: Hér hefur verið landbúnaðarskóli í
120 ár sem dekkar miklar breytingar. Hér
eru ýmsar minjar sjáanlegar í umhverfinu,
hér er besta bókasafn á landinu um land-
búnað. Og hér er fjöldi fólks með marg-
víslega þekkingu sem nýst getur safninu. Í
þessa átt standa draumar okkar, og við er-
um að vinna í þessu þessar vikurnar. Segja
má samt að þetta sé fremur þróun en bylt-
ing.“ Að sögn Bjarna er rætt um að gamla
fjósið og hlaðan á Hvanneyri myndu hýsa
þessa starfsemi. ,,Þar er pláss og mikilvægt
að finna þessu húsnæði verðugt hlutverk.
Þekkingar- og tækniþróun landbúnaðarins
losaði um mikið vinnuafl sem horfið gat til
annarra starfa að uppbyggingu íslensks
samfélags. Safn sem þetta gegnir því mik-
ilvægu hlutverki í því að segja sögu síðustu
100-120 ára, og að varðveita þá þekkingu
sem til hefur orðið – og áhöldin og aðferð-
irnar sem sköpuðu henni farveg.“
Syngjandi prófessor
Morgunblaðið/Guðrún Vala Elísdóttir
Spil og söngur Bjarni á góðri stund með gítarinn, sem aldrei er langt undan.
Eftir Guðrúnu Völu Elísdóttur