Morgunblaðið - 08.06.2006, Blaðsíða 11

MORGUNBLAÐIÐ FIMMTUDAGUR 8. JÚNÍ 2006 11
FRÉTTIR
HÓPUR sjö breskra slökkviliðs-
manna hyggst á morgun leggja af
stað í vikulanga göngu yfir Vatna-
jökul á skíðum. Mun um 150 km
löng leið þeirra liggja í suðvestur
frá Kverkfjöllum, að Grímsvötnum,
í austur að Öræfajökli, upp á
Hvannadalshnúk og þaðan til
byggða um Hnappaleið. Ætlunin er
að afla fjár til styrktar krabba-
meinssjúkum börnum á Englandi
og hefur umfangsmikil fjáröflun
staðið yfir ytra. Leiðsögumaður í
ferðinni verður Ingþór Bjarnason,
en hópurinn hefur búið sig undir
gönguna síðastliðið ár undir hand-
leiðslu hans. „Hópurinn hefur að-
eins einu sinni komist í snjó á þessu
tímabili,“ segir Ingþór „og hefur
undirbúningur því til dæmis falist í
því að draga dekk og hlaupa, en
hver mannanna dregur um 25-30 kg
af búnaði á eftir sér á sleða.“
Meðal annars draga mennirnir á
eftir sér tjöld, enda einungis von
um að komast í skála í Kverk-
fjöllum og við Grímsvötn. Hópnum
til aðstoðar verða björgunarsveitin
Garðar á Húsavík og hjálparsveitir
í Aðaldal og í Öræfasveit. Felst að-
stoðin fyrst og fremst í því að taka
á móti mönnunum og flytja þá milli
staða, auk þess að veita þeim húsa-
skjól.
Breskir
slökkviliðs-
menn á
skíðum yfir
Vatnajökul
FLESTIR Íslendingar láta sér það
nægja að aka hringveginn um land-
ið nokkrum sinnum á lífsleiðinni,
þótt sumir séu duglegri við að
ferðast innanlands en aðrir. Sú
reynsla af Íslandi sem fæst við
akstur í bíl svalar hins vegar ekki
forvitni þeirra náttúruunnenda sem
kjósa öllu persónulegri ferðamáta.
Til þessa hóps má ugglaust telja
Rotem Ron, 37 ára gamla útivistar-
konu frá Ísrael, sem hefur í bígerð
að róa á kajak umhverfis Ísland.
Róðurinn í kringum landið er fyrsti
meiriháttar leiðangur Ron, en henni
til aðstoðar verður vinkona hennar
og samlandi, hin 36 ára gamla Had-
as Feldman, sem þykir einn besti
kajakræðari heims í dag. Fyrsta
konan sem kennir það Íslandi.
Aðspurð hvaðan hún fékk hug-
myndina að þessu heldur óvenju-
lega ferðalagi segir Ron að hún hafi
kviknað eftir að Feldman reri
ásamt félaga sínum Jeff Allen um-
hverfis Japan. „Feldman skoraði á
mig að gera eitthvað sem væri
meiri áskorun,“ sagði Ron í gær.
„Ég hafði áður farið í kajakferðir í
Alaska, Bretlandi og Grikklandi svo
dæmi séu tekin en hef aldrei farið í
leiðangur umhverfis eyju upp á eig-
in spýtur. Ég var að leita að per-
sónulegri áskorun og fann út á end-
anum að hana væri að finna hér á
Íslandi.“
Undirbúningur tímafrekur
Ron segir undirbúning að svona
ferð tímafrekan en hún áætlar að
tæpir þrír mánuðir hafi farið í
skipulagningu hennar. Þá segir Ron
að kajakáhugamenn víða um heim
muni fylgjast með ferðalagi hennar,
sem muni taka tvo til þrjá mánuði.
„Ég mun sigla réttsælis um Ísland í
ferð minni,“ sagði Ron í gær, en
hún reiknar með að ýta úr vör frá
Stykkishólmi á morgun, föstudag.
Spurð hvort íslenskt veðurfar
geti ekki orðið hindrun í róðrinum
segir Ron að það eigi eftir að koma
í ljós. „Ég sigli fyrir utan öldubrot-
ið,“ sagði Ron. „Öryggisbúnaður
minn verður gervihnattasími en að
auki mun Feldman verða í sam-
bandi við mig af landi og veita mér
aðstoð. Að öðru leyti þarf ég að
reiða mig á sjálfa mig í ferðalag-
inu.“
Svona leiðangur er ekki ódýr og
nýtur Ron stuðnings styrktaraðila
til að létta undir. Hún leggur þó
áherslu á að hún kenni á kajak, m.a.
við Terra Santa-kajakklúbbinn í
Ísrael, og segist því ekki teljast til
áhugamanna í greininni.
Fyrsta tilraunin mistókst
Fyrir þremur árum reyndi Bret-
inn Jonathan Burleigh að verða
fyrstur manna til að róa á kajak
umhverfis Ísland. Það ætlunarverk
mistókst hins vegar þegar Burleigh
hætti ferð sinni eftir að hafa metið
aðstæður á sjó við suðurströnd
landsins þannig að þær væru of
hættulegar til að réttlæta áfram-
haldandi róður.
Að sögn Þorsteins Sigurlaugs-
sonar hjá Seakayak Iceland voru
tveir Bretar fyrstir manna til að
fara umhverfis Ísland í kajak árið
1978. Hann segir að það hafi síðan
verið tvisvar endurtekið, 1986 og
2003, en að enginn hafi afrekað slíkt
einn síns liðs. Að lokum vill Þor-
steinn hvetja fólk sem er tilbúið til
að hjálpa Ron á ferð hennar um-
hverfis landið til að hafa samband
við sig í síma 690 3877.
Hyggst róa á kajak umhverfis landið
Ljósmynd/Þorsteinn Sigurlaugsson
Róðurinn í kringum landið er fyrsti meiriháttar leiðangur Rotem Ron.
Eftir Baldur Arnarson
baldura@mbl.is
HÆSTIRÉTTUR staðfesti á þriðju-
daginn úrskurð héraðsdóms Reykja-
ness, þar sem karlmanni var gert að
sæta nálgunarbanni í þrjá mánuði í
kjölfar grófrar líkamsárásar og
meintra hótana.
Í úrskurði héraðsdóms eru máls-
atvik rakin, en þar er því lýst af hálfu
sækjanda, Lögreglustjórans í Hafn-
arfirði, að upphaf málsins megi rekja
til þess að varnaraðili, X, ætlaði öðr-
um manni, A, að taka á sig sök vegna
ölvunaraksturs. Við rannsókn máls-
ins hjá lögreglu upplýstist hins veg-
ar að varnaraðili hefði ekið bifreið
sinni og verið ölvaður er hann lenti í
óhappi og bifreið hans auk annarra
skemmdist mikið. Í kjölfarið hefði A
orðið fyrir ýmsu áreiti af hálfu varn-
araðila. Þannig hefðu félagar varn-
araðila ráðist að honum á vinnustað
hans auk þess sem varnaraðili og
annar maður, C, hefðu hringt marg-
sinnis í hann, haft í hótunum og sagt
honum að greiða tvær milljónir
vegna tjóns þess er varnaraðili olli
við áðurnefnt umferðaróhapp. A
hefði neitað því en varnaraðili og C
haldið áfram að hringja í hann með
hótunum og fylgst með heimili hans í
því skyni að ganga í skrokk á honum.
Hefði síðasta leit þeirra varnaraðila
og C að A verið gerð 13. maí síðast-
liðinn, er móðir A hafði samband við
lögreglu og óskaði eftir aðstoð henn-
ar, því þangað væri varnaraðili kom-
inn í því skyni að ganga í skrokk á A,
sem þá var í felum og þorði ekki
heim til sín.
Lífshættulegir áverkar
Varnaraðili og C héldu þann sama
dag að heimili D, vinar A, og fengu
hann með sér út í bifreið sem þeir
komu á ásamt þriðja félaga sínum, í
því skyni að fá upplýsingar um hvar
A væri að finna. Þegar D vildi ekki
veita þeim þær upplýsingar hefðu
þeir numið hann á brott og gengið í
skrokk á honum, með þeim afleið-
ingum að hann hlaut lífshættulega
áverka. Að því búnu skildu þeir hann
eftir við Guðmundarlund í Kópavogi.
Við skýrslutökur hjá lögreglu ját-
aði varnaraðili að hafa ráðist að D
ásamt C og sett hann í farangurs-
geymslu bifreiðarinnar umrætt sinn.
Í úrskurði héraðsdóms segir að dóm-
ari telji rökstudda ástæðu til þess að
ætla að varnaraðili muni halda leit
sinni að A áfram sem og símtölum og
hótunum og þannig raska friði hans
og jafnvel brjóta gegn honum verði
ekkert að gert. Þá segir í úrskurð-
arorðum héraðsdóms að varnaraðila
sé óheimilt að koma á eða í námunda
við heimili A. Jafnframt sé honum
óheimilt að veita A eftirför, nálgast
hann á almannafæri, hringja í
heima-, vinnu og farsíma hans, eða
setja sig í beint samband við hann á
annan hátt.
Gert að sæta nálgunarbanni í
kjölfar grófrar líkamsárásar
Á SÍÐASTA degi sumarþings var
samþykkt breytingatillaga við
frumvarp um breytingu á lögum
um olíugjald. Með breytingunum
var komið til móts við óskir björg-
unarsveitarmanna, en fyrir breyt-
inguna fól frumvarpið í sér að á ný
þyrfti að setja kílómetramæla í
bíla þeirra og þeir að greiða kíló-
metragjald.
„Ég bar fram breytingatillögu á
lokastiginu, sem fulltrúar allra
flokka komu að,“ segir Birgir Ár-
mannsson, þingmaður Sjálfstæðis-
flokksins. „Hún fól í sér þessa
breytingu sem var samþykkt, að
björgunarsveitabílarnir voru tekn-
ir út úr greiðslu skattsins.“ Aðrir
flutningsmenn voru Dagný Jóns-
dóttir, Kristján Möller, Ögmundur
Jónasson og Guðjón A. Kristjáns-
son. Kristján Möller lagði raunar
fram efnislega samhljóða tillögu
við aðra umræðu um frumvarpið,
en sú tillaga var hins vegar felld.
„Þá var ekki búið að ná því breiða
samkomulagi sem kom fram við
þriðju umræðu,“ segir Birgir.
Hann segir upphaflega frumvarpið
hafa verið lagt fram til að koma til
móts við óskir björgunarsveitanna.
Leiðin sem sæst var á var að
björgunarsveitarmenn fá að kaupa
litaða eða gjaldfrjálsa olíu á öku-
tæki sín, en sleppa jafnframt við
að setja upp ökumæla í bílana og
greiða kílómetragjald. „Svo niður-
staðan varð sú hagstæðasta sem
völ var á fyrir björgunarsveita-
menn og flestir þingmenn gátu
fellt sig við,“ segir Birgir að lok-
um.
„Hagstæðasta
niðurstaðan“