Árbók Háskóla Íslands - 01.01.1969, Page 34

32
hafa nú verið lagðar tillögur til fjárveitinga til ýmissa bygginga
í þágu Háskólans, er nema nokkrum tugum milljóna. Allt frá
1963 hefir verið óskað eftir fé til byggingaframkvæmda, en því
miður hafa þær óskir sumpart alls ekki náð fram að ganga eða
fjárveitingar hafa verið miklum mun minni og hægari en vonir
manna stóðu til. Þessi afstaða hefir valdið mér miklum vonbrigð-
um, en um það hefi ég þó verið fáorðari en um hitt, sem góðu
hefir gegnt gagnvart Háskólanum af hálfu ríkisvalds — og verða
menn að virða þá afstöðu mina eftir málefnum. Háskólinn býr
við miklu krappari kjör en sæmilegt má telja, og ég er þess full-
viss, að íslenzk þjóð vill ekki, að Háskólinn búi við þá kreppu, sem
hrjáir hann og varnar vexti og vísindaþróun. Þessi vanbúnaður
og vanhagir allir sæma ekki íslenzku þjóðfélagi, sem sýnt hefir,
að það getur færzt mikið í fang á ýmsum öðrum sviðum. En við
skulum ekki eingöngu beina geiri okkar að ríkisvaldinu — við
verðum einnig Háskólans menn að gera stórauknar kröfur til
okkar sjálfra, leggja okkur í líma um bættar kennsluaðferðir,
sem vafalaust standa í mörgum tilvikum mjög til bóta, og leggja
m. a. til í auknum mæli kennslugögn og stuðla að frjórri og lif-
rænni kennslu með aukinn kost kennslutækja að bakhjalli. Fyrir-
lestraformið er hér enn miklu fyrirferðarmeira en góðu hófi
gegnir — og hér skortir mjög semínaræfingar og ýmsar verkleg-
ar æfingar. 1 flestum deildum við norrænu háskólana má telja að
fyrii’lestrar séu algerlega víkjandi kennsluform og sumstaðar eru
þeir lagðir með öllu fyrir róða. Er æskilegt að stofna til viðræðna
og jafnvel námskeiða út af þessum málum og var raunar haldinn
einn slíkur viðræðufundur s.l. vetur milli nokkurra kennara og
stúdenta að frumkvæði mínu og menntamálanefndar Stúdenta-
ráðs Háskólans.
Rannsóknirnar eru þó sá þáttur í starfsemi Háskólans, sem ég
hefi þrátt fyrir allt enn meiri áhyggjur af en kennslunni. Ef skóli
er ekki rannsóknarstofnun, er hann ekki háskóli, nema í orði
kveðnu. Rannsóknaraðstaða hér við Háskólann er mjög örðug
í flestum greinum. Við verðum að horfast í augu við þann raun-
sanna vanda. 1 því efni hljóta að verða alger stefnuhvörf, ef ekki
á að lenda gersamlega í strandi. öilum aðbúnaði að rannsóknar-