Fréttablaðið - 16.12.2010, Blaðsíða 34
34 16. desember 2010 FIMMTUDAGUR
Þ
etta er nú bara æsku-
della sem hefur
haldist við og aukist
frekar en hitt,“ segir
Baldur Sveinsson
ljósmyndari, sem var
að gefa út þriðju árbók sína um
flugvélar á Íslandi. „Mér finnst
svo skemmtilegt að horfa á þessa
gripi og fylgjast með þeim og svo
er þetta líka sögulegur áhugi.“
Baldur gaf út bókina Flugvélar
á og yfir Íslandi árið 2007. Að
sögn Baldurs seldist sú bók vel.
„Hún kom út ofan í ákveðið tóma-
rúm. Mál og menning gaf bókina
út og auglýsti hana mikið og fyrir
vikið seldist hún vel. Í kjölfarið
fékk ég svo þessa hugmynd að búa
til árbók og félagar mínir í flug-
klúbbunum hvöttu mig áfram.“
Baldur byrjaði að mynda flug-
vélar árið 1964 en ekki þó af
krafti fyrr en 1970. „Ég á því
safn sem nær þangað aftur. Þetta
hefur gengið í bylgjum. Ég hafði
til dæmis mjög gaman af því að
fara upp á Keflavíkurflugvöll og
fylgjast með flugvélunum þar.“
Baldur segir að töluvert af
flugmönnum sé til í að fljúga með
hann í ljósmyndaleiðangra og enn
aðrir sem vilji fljúga módelunum
– það er vélunum sem hann síðan
myndar.
„Í 99 prósent tilvika þarf ég
ekki að greiða fyrir flugið, annars
stæði þetta ekki undir sér,“ segir
Baldur. „Þetta eru fimm hundruð
bækur sem ég læt prenta og ef
þær seljast allar er ég á þokka-
lega réttu róli, rétt ofan við plús-
inn.“
Baldur segir að á ýmsu hafi
gengið við útgáfu nýjustu bókar-
innar. „Það má segja að þessi
Murphy, sem lögmálið er kennt
við, sé orðinn góður vinur minn.
Það hefur allt gengið á aftur-
fótunum. Þetta eru öflugar og
góðar vélar sem bókin er prentuð
í. Þetta er mjög fullkomin litaljós-
myndatækni sem er við að eiga en
fyrst fóru valsar í prent smiðjunni
og svo spennuvírar. Svo fór þetta í
límingu uppi í Odda og þá hrundu
fræsarinn og límarinn þar. Þá
tafðist útgáfa bókarinnar um
viku,“ segir Baldur hlæjandi.
Þótt á ýmsu hafi gengið getur
Baldur farið að brosa út í annað
því bókin var væntanleg úr lím-
ingu sama dag og hann ræddi við
Fréttablaðið og hún ætti því að
vera komin í flestar betri bóka-
búðir.
Á þeim tæplega fimmtíu árum
sem Baldur hefur verið að mynda
flugvélar hefur safnast upp gríðar-
lega stórt myndasafn sem hleypur
á tugum þúsunda mynda.
Af þessum þúsundum er ein
mynd í uppáhaldi hjá Baldri en
sú mynd birtist í stóru bókinni
sem hann gaf út árið 2007. „Það
var mynd sem ég tók úr Phantom-
vél af tveimur öðrum Phantom-
vélum og einni Awacs-ratsjárvél.
Myndina tók ég við Stokksnes við
Eystrahorn árið 1979. Þessi mynd
fer ekki úr minninu enda hef ég
bara tvisvar flogið með Phantom-
vélum,“ segir Baldur. En hver ætli
sé uppáhaldsflugvélin hans?
„Ég hef alltaf verið hrifinn
af aflinu og kraftinum í orrustu-
þotum. Allar flugvélar hafa samt
sinn sjarma. Það gerist til dæmis
varla betra en að vera í lítilli vél
með opinn glugga og með aðra vél
sveimandi í kring.“
Hver flugvél hefur sinn sjarma
Baldur Sveinsson var að gefa út sína þriðju árbók um flugvélar. Hann hefur haft einlægan áhuga á flugvélum frá því hann var
strákur. Í samtali við Kristján Hjálmarsson segir hann frá flugvélaáhuga sínum, uppáhaldsvélinni og eftirminnilegustu myndinni.
UPPÁHALDSMYNDIN Tvær F-4E Phantom-vélar frá 57. flugsveit sem var á Keflavíkurflugvelli frá 1954 til 1995 fylgja E-3A Sentry
Awacs-ratjárvél yfir ratsjárstöðina á Stokksnesi við Eystra-Horn. Tekin í maí 1979. MYNDIR/BALDUR SVEINSSON
TF-GNÁ Gæsluþyrlan TF-GNÁ fer á loft á flughátíðinni á Akureyri 19. júní 2010 undir styrkri stjórn Sigurðar
Ásgeirssonar flugstjóra.
GÍTARAR Douglas Dakota TF-NPK sést hér þegar 70 tölvuleikjagíturum var kastað úr henni í gíginn Rauðu-
skál við Heklu um klukkan 23.00 hinn 3. júlí 2010.
SÚ STÓRA Antonov AN-225, stærsta flugvél heims, í lendingu á Keflavíkurflugvelli 6. október.
BÓKIN Cessna 172 Skyhawk
yfir gosstöðvunum á Fimmvörðu-
hálsi prýðir kápu nýjustu bókar
Baldurs Sveinssonar.
BALDUR SVEINSSON Hann hefur haft
gríðarlegan áhuga á flugvélum frá því
hann var smástrákur.
Mér
finnst svo
skemmti-
legt að
horfa á þessa gripi og
fylgjast með þeim og
svo er þetta líka sögu-
legur áhugi.