Morgunn - 01.06.1964, Síða 45

MORGUNN
39
sambandi við einhverja sérstaka manneskju á heimilinu, án
þess að hún sjálf viti af því eða eigi nokkurn viljandi þátt í
að framkvæma þau, en krafturinn sé að einhverju leyti til
hennar sóttur, þótt enn hafi ekki tekizt að skýra með hverj-
um hætti það verður.
Að því er snertir fyrirbærin á Saurum, hefur ekkert tek-
izt að sanna í því efni. Hins vegar hefur það komið í ljós við
athugun, að hreyfifyrirbærin hafa átt sér stað í fjarveru
dótturinnar, Sigurborgar, er hún dvaldi í Reykjavik, einnig
á meðan Guðmundur bóndi og Björgvin sonur hans voru á
sjó, og einnig á meðan Benedikt, sonur hjónanna, var að
heiman við fjárgeymslu. Sú eina manneskja, sem jafnan
var heima eða heimavið, þegar hlutir hreyfðust, var Mar-
grét húsfreyja. Þetta ber þó ekki að skoða sem neina sönn-
un þess, að fyrirbærin hafi staðið í sambandi við hana sér-
staklega. Hún var af eðlilegum ástæðum sú, sem stöðu
sinnar vegna var heima í bænum allan þann tíma, sem
þessir atburðir áttu sér stað. Hins vegar verður það að telj-
ast að minnsta kosti einkennileg tilviljun, að fyrirbærin
skyldu hætta með öllu í þá rúmu viku, sem hún var f jarver-
andi á sjúkrahúsinu á Blönduósi, og að þeirra skyldi verða
lítilsháttar vart að nýju skömmu eftir að hún kom heim
aftur.
Nú hefur engra dulrænna fyrirbæra orðið vart á Saurum,
svo vitað sé, siðan seint í aprílmánuði. Væntanlega er þess-
um ófögnuði þar að fullu hætt, enda hefur hann þegar valdið
þessu heimili mörgum og margháttuðum óþægindum og
tjóni, bæði beint og óbeint.
En rétt hefur þótt að birta og geyma í MORGNI frásagn-
ir af þessum atburðum eftir því sem sannast og réttast er
um þá vitað.
Sveinn Víkingur.