Morgunn - 01.06.1964, Page 77

MORGUNN
71
en fyrir því telja spiritistar þegar fengnar sannanir, sem
ekki sé unnt að hrekja eða benda á aðrar fullnægjandi skýr-
ingar á mörgum hinna dulrænu fyrirbæra.
Þeim, sem vildu kynna sér rannsóknir dulrænna fyrirbæra
á síðustu árum og þær ýmsu tilgátur, sem fram hafa komið
til skýringar á þeim, svo og þau helztu rök, sem menntaðir
menn nú færa fram bæði með og á móti framhaldslífi, vil ég
benda á nýlega útkomna bók, eftir prófessor Hornell Hart.
Bókin heitir á ensku: The Enigma of Survival, en á islenzku
mætti hún heita: Gáta framhaldslífsins. Höfundurinn, sem
nú er háskólakennari í Kentucky, var um nítján ára skeið
prófessor í þjóðfélagsfræði við Duke háskólann í Banda-
ríkjunum, en lagði jafnframt stund á sálarrannsóknir og var
náinn samstarfsmaður dr. J. B. Rhine við hans frægu til-
raunir, er leitt hafa til þess, að fjarhrif og ýmis önnur skynj-
anafyrirbæri án hjálpar skynfæranna, eða svonefnd ESP-
fyrirbæri, eru nú af vísindunum yfirleitt taldar fullsannaðar
staðreyndir.
Eftir að prófessorinn í bókarlok hefur dregið saman og
lýst í stuttu máli þeim meginrökum, sem fram hafa komið
gegn spíritismanum, svo og rökum hinna, sem honum fylgja,
lýsir hann sínu eigin viðhorfi til málsins á þessa leið:
„Mitt lokaorð er þetta: Persónuleiki mannsins lifir af lík-
amsdauðann. Það er sú niðurstaða, sem ég hef komizt að,
eftir að hafa borið saman veigamestu rök andstæðinga spír-
itismans og rök hinna, sem honum fylgja — gei’t það eftir
beztu samvizku og hlutdrægnislaust“.
Við þessa yfirlýsingu bætir hinn yfirlætislausi vísinda-
maður því, að með þessu sé hann ekki að reyna að telja
menn á sitt mál, heldur aðeins segja það, sem hann viti sann-
ast og réttast. Það sem mestu skipti, sé það, að menn kynni
sér sjálfir þessi mál gaumgæfilega og fordómalaust og byggi
síðan sannfæringu sína á því, sem sannast reynist, og láti
hana síðan hvetja sig til framhaldandi rannsókna og fyllri
þekkingar. — Hér kveður við annan tón en víða ríkti fyrir
sextíu árum, sem betur fer.