Morgunblaðið - 14.12.2013, Blaðsíða 4

4 FRÉTTIRInnlent
MORGUNBLAÐIÐ LAUGARDAGUR 14. DESEMBER 2013
Guðni Einarsson
gudni@mbl.is
Eintak af fágætum heiðurspeningi endurreisnar
lýðveldis Íslands, lýðveldishátíðarmerkinu, er nú
til sölu hjá Safnaramiðstöðinni ehf. í Reykjavík.
Peningurinn var gefinn út í tengslum við lýðveld-
ishátíðina 1944 og var úthlutað 71 peningi til al-
þingismanna, sendiherra erlendra ríkja, embætt-
ismanna, forsætisráðherra og forseta Íslands. Á
framhlið er skjaldarmerki lýðveldisins og letrað
„Lýðveldi endurreist á Íslandi 17. júní 1944“. Á
bakhlið er merki lýðveldishátíðarinnar 1944 og
undir því er þrykkt 10 k því peningurinn var sleg-
inn úr 10 karata gulli. Peningurinn er festur við
sylgju úr gulli og hangir í borða í fánalitunum.
Heiðursmerkið er auglýst til sölu á vefnum
ebay.com og er verðlagt á 3.450 bandaríkjadali
eða rúmlega 404 þúsund krónur. Sigurður Pálma-
son hjá Safnaramiðstöðinni sagði að lýðveld-
ishátíðarmerkið væri eftirsótt af þeim sem söfn-
uðu heiðursmerkjum, en það væri nokkuð dýrt
vegna þess hversu fágætt það væri. Hann sagði að
áhugi á merki sem þessu hlyti að vera staðbund-
inn og því alls óvíst hvort það seldist.
„Þetta er hlutur sem við sjáum afskaplega
sjaldan,“ sagði Sigurður. Hann kvaðst ekki hafa
fengið áður lýðveldishátíðarmerki til sölu og vissi
ekki hver hefði fengið merkið upphaflega.
Fágætt merki frá lýðveldishátíðinni
 Afhent var 71 heiðursmerki í tilefni lýðveldishátíðarinnar 1944  Merkið fengu m.a. embætt-
ismenn, alþingismenn, sendiherrar, forsætisráðherra og forseti Íslands  Verðlagt á 404 þúsund
Ljósmynd/Safnaramiðstöðin
Heiðurspeningurinn Merkið er á stærð við gamla einnar krónu peninginn og því ekki stórt.
Klúðursleg merking
» Á bakhlið lýðveldismerk-
isins er þrykkt „10 k“ undir
merki lýðveldishátíðarinnar.
Sigurður sagði að þar hefði
upphaflega staðið „Made in
US“ (Framleitt í Bandaríkj-
unum).
» Menn voru óánægðir með
þessa merkingu á sjálfu lýð-
veldismerkinu. Hana mætti
skilja sem svo að lýðveldið
væri frá Bandaríkjunum!
» Peningarnir voru sendir til
baka, áletrunin afmáð og
þrykkt yfir hana. Talið er að tíu
peningar séu til sem ekki var
breytt, að sögn Sigurðar.
SVIÐSLJÓS
Steinþór Guðbjartsson
steinthor@mbl.is
Erlendir ferðamenn verða áberandi
hér á landi um jól og áramót eins og
undanfarin ár og bókanir á hótelum
ganga vel, að sögn Helgu Árnadóttur,
framkvæmdastjóra Samtaka ferða-
þjónustunnar.
Valgerður Ósk Ómarsdóttir, sölu-
og markaðsstjóri Radisson Blu Hót-
els Sögu, tekur í sama streng. Hún
segir að venjulega hafi verið frekar
rólegt á hótelinu um jólin en fleiri
bókanir séu nú en í fyrra. „En við er-
um fullbókuð yfir áramótin og höfum
verið það töluvert lengi,“ segir hún.
Helga Árnadóttir segir að erlend-
um ferðamönnum hérlendis fjölgi
jafnt og þétt á þessum árstíma. „Bók-
anir eru betri yfir jólin sjálf en áður
og hótelin eru öll full yfir áramótin
eins og undanfarin ár,“ segir hún og
bætir við að sem fyrr séu það brenn-
urnar og flugeldarnir sem laða er-
lenda ferðamenn helst að um áramót,
en norðurljósin heilli líka og ýmsar
skipulagðar ferðir.
Skipulögð dagskrá
Ferðamennirnir eru nánast frá öll-
um mörkuðum. Valgerður Ósk segir
að töluvert margir Bretar og Svíar
hafi bókað á Radisson Blu Hótel Sögu
og auk þess sé mikið um Asíubúa og
Rússa. Á aðfangadag og jóladag sé
boðið upp á sérstaka hátíðarkvöld-
verði og töluvert sé um að gestir á
öðrum hótelum og gistiheimilum not-
færi sér það. Á gamlársdag sé boðið
upp á sérstaka dagskrá. Að loknum
hátíðarkvöldverði í Súlnasalnum sé
farið í skipulagða ferð á brennu. Síðan
taki við skemmtun með smákökum og
kakói, fylgst sé með flugeldunum úr
Grillinu á miðnætti og loks sé dans-
leikur á Mímisbar.
Mikið í boði
Fyrir um áratug voru sárafáir mat-
staðir opnir um jól en á því hefur orð-
ið mikil breyting. Eins er meiri af-
þreying í boði en áður var.
Valgerður Ósk segir að fyrirtæki í
ferðaþjónustu bjóði upp á skipulagðar
ferðir fyrri hluta aðfangadags og á
jóladag. „Fólk fer í norðurljósaferðir,
gullna hringinn og þessar sígildu
ferðir,“ segir hún og bætir við að al-
mennt séu ferðamennirnir búnir að
skipuleggja ferðina fyrir komu.
Fullbókað vegna flugelda og ljósa
Morgunblaðið/Kristinn
Nýársbrenna Brennur og flugeldar laða að erlenda ferðamenn.
 Enn fjölgar erlendum ferðamönnum hérlendis um jól og áramót  Hótel fullbókuð yfir áramót
 Erlendir ferðamenn sækja í brennurnar, flugeldana og norðurljósin auk skipulagðra ferða
Eftir stutt hlé hjá kuldabola er reiknað með að
aftur frysti í dag. Frost verður allt að 12 stigum
um helgina, kaldast inn til landsins. Veðurstofan
reiknar með éljum á vestanverðu landinu og
snjókomu á morgun austanlands. Rétt er því að
hafa rúðusköfurnar áfram við höndina eins og
konan á bílastæðinu við Laugar. Því er spáð að á
þriðjudag verði austan hvassviðri eða stormur
en veður fari hlýnandi.
Morgunblaðið/Golli
Kuldaboli áfram á landinu
Spáð allt að tólf stiga frosti
Sjúkratryggingar Íslands og Rauði
kross Íslands hafa gert með sér
samning sem tryggir til loka næsta
árs áframhaldandi rekstur flestra
þeirra sjúkrabíla á landsbyggðinni
sem átti að taka úr rekstri í janúar á
næsta ári. Samkvæmt samningi um
sjúkraflutninga sem gerður var árið
2012 til ársloka 2015 átti að fækka
bílum á landsbyggðinni úr 77 í 68.
Fækkun bíla átti að vera komin til
framkvæmda í byrjun næsta árs.
Áður var búið að fækka bílum um
þrjá og stendur sú ákvörðun óbreytt
þar sem fyrir liggur að þjónusta
raskast ekki vegna þeirra breytinga.
Frestun á fækkun sjúkrabíla tekur
til þeirra bíla sem staðsettir eru í
Ólafsvík, Búðardal, á Hvamms-
tanga, í Ólafsfirði, á Raufarhöfn og
Skagaströnd.
Sjúkrabílum
ekki fækkað
um áramót
Samið Samkomulag er um rekstur
sjúkrabifreiða til ársloka 2014.