Dagblaðið Vísir - DV - 30.01.2015, Blaðsíða 8

Helgarblað 30. janúar–2. febrúar 20158 Fréttir
Einn ölvaður og
annar dópaður
Lögreglan á höfuðborgarsvæðinu
stöðvaði ökumann aðfaranótt
fimmtudags sem grunaður er um
ölvun við akstur. Í dagbók lögreglu
kemur fram að maðurinn hafi
verið látinn laus að lokinni blóð-
töku. Um svipað leyti var annar
ökumaður stöðvaður sem grun-
aður var um akstur undir áhrifum
fíkniefna. Sá var einnig látinn laus
að lokinni blóðtöku. Í dagbók lög-
reglu segir að hann hafi heimilað
leit í bifreiðinni og hafi lítilræði af
ætluðum fíkniefnum fundist.
Milljarða lán til Brims
endar fyrir Hæstarétti
n Máli Haf Funding gegn Brimi áfrýjað n Skuld Brims nemur fimm milljörðum
B
rim hefur áfrýjað dómi Hér-
aðsdóms Reykjavíkur um að
lán sem útgerðarfélagið tók
hjá Glitni árið 2007, að jafn-
virði tveggja milljarða króna
á þáverandi gengi, hafi verið lögmætt
erlent lán. Guðmundur Kristjánsson,
forstjóri og stærsti eigandi Brims, seg-
ir dóminn rangan þar sem lánið hafi
að hans sögn verið greitt út í gengis-
tryggðum krónum og því ólögmætt.
„Við munum verjast, því við telj-
um dóm undirréttar rangan. Hæsti-
réttur er búinn að dæma í fjölda mála
þar sem nákvæmlega eins samningar
voru dæmdir sem íslensk krónulán.
Lögmenn slitastjórnar Glitnis hafa
aftur á móti sannfært dómara um
að hér hafi allt verið fullt af gjaldeyri
árin 2007 og 2008, og að Glitnir hafi
átt nægan gjaldeyri, sem er rangt.
Við þurfum að borga fimm milljarða
króna fyrir þessa tvo milljarða, miðað
við dóm héraðsdóms, og því er ljóst
að það er mikið undir,“ segir Guð-
mundur í samtali við DV.
„Fjarstæðukennd“ rök
Héraðsdómur Reykjavíkur féllst í júní
í fyrra á kröfu írska eignarhaldsfélags-
ins Haf Funding Ltd. um að það yrði
viðurkennt að lánssamningur Glitn-
is banka hf. og Brims hf., frá 22. júní
2007, væri samningur um lögmætt
lán í erlendum gjaldmiðlum. Lánið
hefur verið í eigu Haf Funding frá því
Glitnir stofnaði félagið í lok júlí 2008
í þeim tilgangi að endurfjármagna
bankann.
Í dómi héraðsdóms segir að vaxta-
greiðslur hafi verið í skilum til 10. júlí
2011 og að Brim hafi átt að endur-
greiða lánið með einni greiðslu ári
síðar. Ágreiningur hafi risið milli Haf
Funding og Brims í júlí 2011 um hvort
lánið teldist lögmætt lán í erlendum
gjaldmiðlum eða í íslenskum krónum
bundið ólögmætri gengistryggingu.
Málsvörn Brims fyrir héraðsdómi
byggðist meðal annars á því að þeir
reikningar sem lánið var greitt inn á,
svonefndir IG-reikningar, séu í raun
gengistryggðir í íslenskum krónum.
„Innlendir viðskiptabankar hafi til
margra ára boðið upp á sparireikn-
inga í erlendri mynt, svokallaða IG-
reikninga, og að það sé útbreiddur
misskilningur að með því að fá milli-
færslu inn á IG-reikninga þá flytjist
gjaldeyrir til landsins og verði sér-
greindur í eigu viðkomandi aðila á
viðkomandi reikningi,“ segir í þeim
hluta dómsins þar sem farið er yfir
málsástæður og lagarök Brims.
Útgerðarfélagið telur einnig að
dómur Hæstaréttar í máli Íslands-
banka gegn fyrirtækinu Umbúðamið-
lun ehf. gefi fordæmi um að fallast
beri á kröfur Brims. Í því máli stað-
festi Hæstiréttur dóm Héraðsdóms
Reykjavíkur um að lánssamningur
Umbúðamiðlunar og Glitnis hefði
falið í sér ólögmæta gengistryggingu.
Héraðsdómur féllst ekki á þetta né
önnur rök Brims. Mál Haf Funding
gegn Brimi hafi í öllum atriðum, sem
máli skiptu, verið sambærilegt máli
útgerðarfélagsins Þorbjarnar hf. í
Grindavík gegn Haf Funding. Þar fór
Þorbjörn fram á að viðurkennt yrði
að lánssamningar fyrirtækisins við
Glitni hefðu verið bundnir ólögmætri
gengistryggingu. Hæstiréttur sýknaði
Haf Funding af kröfum Þorbjarnar
í mars 2013. Í síðasta ársreikningi
Brims segir að margt sé ólíkt í málun-
um tveimur.
„Telur dómurinn fjarstæðukennt
að líta beri svo á að lánið hafi í reynd
verið greitt út í íslenskum krónum inn
á reikninga sem séu í raun gengis-
tryggðir reikningar í íslenskum krón-
um en ekki gjaldeyrisreikningar,“
segir í niðurstöðu Héraðsdóms
Reykjavíkur í máli írska félagsins og
Brims.
Glitnir hafi ekki átt gjaldeyri
Guðmundur Kristjánsson segir einnig
ljóst að Glitnir hafi ekki átt mikinn
gjaldeyri á þeim tíma sem lánið var
veitt og vísar hann í ársreikning bank-
ans frá 2007.
„Bankinn átti hins vegar fullt af
gengistryggðum eignum. Það er búið
að plata íslenskan almenning í dag og
alla dómara og alla um að þessir IG-
reikningar séu í raun gjaldeyrisreikn-
ingar en þeir eru bara gengistryggðir
krónureikningar,“ segir Guðmundur
og heldur áfram:
„Allar stærstu lögfræðiskrifstofur
landsins voru fengnar í vinnu fyrir
skilanefndir föllnu bankanna. Þeir
eru búnir að eyða tugum millj-
arða í þetta og það er búið að snúa
dómskerfinu á Íslandi við með því að
hér hafi allt verið fljótandi í gjaldeyri
árin 2007 og fyrri hluta 2008. En þetta
voru bara gengistryggðar krónur sem
bankinn lánaði. […] Svo vitum við
ekki hver á þessa kröfu. Þetta er bara
einhver sjóður úti í heimi. Þetta lán er
búið að ganga kaupum og sölum úti
í heimi.“
Ekki náðist í Aðalstein E. Jón-
asson, lögmann slitastjórnar Glitnis í
málinu, við vinnslu fréttarinnar. n
Lánið fært út úr
bókum Brims
Brim er eitt stærsta útgerðarfélag lands-
ins en það er í eigu Línuskips ehf. sem er
aftur í eigu bræðranna Guðmundar og
Hjálmars Kristjánssona. Félagið hagnað-
ist um 756,8 milljónir króna í fyrra, sam-
kvæmt nýbirtum ársreikningi félagsins.
Eignir Brims námu 27,2 milljörðum króna í
árslok 2013 en skuldirnar 16,7 milljörðum.
Stjórn Brims ákvað árið 2012 að taka
lán Haf Funding út úr bókum útgerðar-
félagsins. Komið er inn á þá ákvörðun í
tveimur síðustu ársreikningum félagsins
og ástæðan sögð sú að stjórnin hafi
talið dóminn í máli Íslandsbanka gegn
Umbúðamiðlun fordæmisgefandi þar
sem „um sama lánveitanda er að ræða
og sambærileg málsatvik“. Því er ljóst að
dómur Hæstaréttar í máli Haf Funding
og Brims getur haft talsverð áhrif á
eiginfjárhlutfall félagsins.
Haraldur Guðmundsson
haraldur@dv.is
Glitnir Slitastjórn Glitnis tók við umsýslu lánsins til Brims í byrjun 2012 þegar skilanefnd
bankans lauk störfum. Mynd SteFán KarlSSon
Mikið undir Guðmundur Kristjáns-
son, forstjóri og stærsti eigandi Brims,
segir skuld útgerðarfélagsins við Haf
Funding hafa hækkað um þrjá millj-
arða frá því lánið var tekið í júní 2007.
„Það er búið að snúa
dómskerfinu á Íslandi
við með því að hér hafi allt
verið fljótandi í gjaldeyri
Þetta gæti gerst
við Bárðarbungu
Vísindamannaráð fundaði á
þriðjudaginn um eldsumbrotin við
Bárðarbungu en í ráðinu sitja vís-
indamenn frá Veðurstofu Íslands
og Jarðvísindastofnun Háskólans,
ásamt fulltrúum frá Almanna-
varnadeild ríkislögreglustjóra, Um-
hverfisstofnun og sóttvarnalækni.
Á fundinum kom fram að sýni-
leg virkni var með minna móti á
miðvikudaginn í síðustu viku þegar
margvíslegar athuganir voru gerð-
ar við gosstöðvarnar. Í fundargerð
kemur fram að sniðmælingar úr
lofti sýni að hraunið hafi þykknað
undanfarnar vikur og er rúmmál
þess nú tæplega 1,4 rúmkílómetr-
ar. Svo virðist sem dragi hægt úr
ákafa gossins. Ráðið spáði svo fyrir
um hugsanlega framvindu gossins,
sem staðið hefur yfir í fimm
mánuði, og eru þrír möguleikar
taldir líklegastir um framvinduna:
n Gosið í Holuhrauni heldur
áfram þar til öskjusig í Bárðar-
bungu hættir. Gosið getur varað í
marga mánuði enn.
n Gosvirkni færist til suðurs und-
ir Dyngjujökul og veldur jökul-
hlaupum og gjóskufalli. Einnig
er mögulegt að sprungur opnist
annars staðar undir jöklinum. Ef
slíkt gos yrði langvinnt gæti það
breyst í hraungos.
n Gos í öskju Bárðarbungu. Slíkt
gos gæti brætt mikinn ís og valdið
verulegu jökulhlaupi. Öskufall
gæti orðið nokkuð.