Bændablaðið - 03.04.2014, Blaðsíða 4

4 Bændablaðið | Fimmtudagur 3. apríl 2014
Fréttir
Segja þarf upp að minnsta
kosti fimmtán starfsmönnum
Landbúnaðarháskóla Íslands
verði ekki af sameiningu hans við
Háskóla Íslands. Þetta kom fram í
máli Ágústs Sigurðssonar rektors
skólans á starfsmannafundi á
mánudaginn.
„Þetta er alveg rétt. Við fengum
bréf þess efnis frá okkar ráðuneyti
um að við ættum að draga saman
seglin. Við erum búin að gera
áætlanir þar um, vorum í því alla
síðustu viku. Þetta snertir alla okkar
starfsemi þó við séum ekki búin að
fara nákvæmlega yfir hvar þetta
hittir fyrir. Við erum búin að senda
þessa áætlun inn til ráðuneytisins en
eigum eftir að fá staðfestingu á því
hvort hún verði samþykkt eða ekki,“
segir Ágúst.
Lengi hefur verið talað um að
skólinn þyrfti að fá leyfi til að selja
eignir til að bæta fjárhagsstöðuna.
Að sögn Ágústs er ekki um slíkt að
ræða í fjárhagsáætluninni sem send
hefur verið menntamálaráðherra nú.
„Þær óskir liggja fyrir og hafa
legið fyrir síðustu tíu árin. Hluti af
þeim hugmyndum sem lágu fyrir
varðandi sameiningu skólans við
Háskóla Íslands gengu út á að losa
þessar eignir til að hægt yrði að
fjárfesta í skólastarfinu. Það verður
hins vegar ekki gert nú.“
Sameining myndi þýða
mikil tækifæri
Ágúst segist eindregið þeirrar
skoðunar að það myndi styrkja
Landbúnaðarháskólann í
rekstrarlegu og faglegu tilliti að
sameina hann Háskóla Íslands.
„Algjörlega, ég er vita sannfærður
um það. Sérstaklega á það við um
faglegu hliðina og ég tala nú ekki
um ef ríkisvaldið er tilbúið til, líkt
og er staðreynd, að koma með aukna
fjármuni inn í starfsemi skólans. Það
myndi þýða heilmikil tækifæri fyrir
okkur.“
Alþekkt í löndunum í kringum
okkur
Ágúst bendir á að það sé ekki óþekkt
að skólar sameinist þó langt sé á
milli þeirra.
„Það má benda á
Íþróttafræðasetur Háskólans á
Laugarvatni. Það ber öllum saman
um að þar hafi starfsemin eflst.
Alls staðar í löndunum í kringum
okkur hefur þetta verið að gerast.
Landbúnaðarskólar hafa orðið hluti
af stærri heild. Fyrir nokkrum árum
var til Konunglegi danski dýralækna
og landbúnaðarháskólinn. Nú er hann
hluti af Kaupmannahafnarháskóla
og fleiri dæmi mætti taka. Þetta
er bara að gerast víða og með því
er verið að efla og styrkja skólana
en ekki láta hlutina koðna niður.
Danir eru nú kannski einir mestu
landbúnaðarmenn okkar heimshluta.
Þeir gera þetta svona og við sjáum
ekki annað en þetta gangi mjög vel
og hafi eflt nám og rannsóknir. Hví
ætti það ekki að verða svo hér á landi
líka?“
Skilur afstöðu
menntamálaráðherra
Gagnrýnt hefur verið að ríkisvaldið
hafi verið tilbúið til að auka við
fjármuni til rekstrar skólans ef af
sameiningu yrði en nú. Þegar búið
sé að slá slíka sameiningu út af
borðinu sé skólanum gert að draga
verulega saman í rekstri til að greiða
uppsafnaðan halla á rekstrinum.
Ágúst segir að það komi sér ekki
á óvart.
„Hjarta mitt slær með þessari
starfsemi og séu menn tilbúnir til
að koma með starfsemi inn í hana
þá set ég engin skilyrði fyrir því
sem rektor. Hins vegar skil ég
alveg hvað ríkisvaldið er að gera
hér, okkar ráðuneyti. Þar á bæ segja
menn: Við erum tilbúin að fjárfesta
í þeirri leið að Landbúnaðarháskóli
Íslands og hans fræðasvið verði
hluti af stærri heild. Við erum hins
vegar ekki tilbúin í að fjárfesta í
óbreyttu ástandi. Það finnst mér
bara mjög skiljanleg afstaða.“
Fækkað um 40 manns
á níu árum
Ágúst segir að niðurskurðurinn
muni gera skólanum mun erfiðara
um vik við að sinna hlutverki sínu.
„Það er bara þannig. Ég hef
mjög mikla trú á þessari starfsemi,
hún er afar mikilvæg og starfsfólk
skólans hefur staðið sig afar
vel alla tíð. Skólinn býr að því
að eiga mikinn fjársjóð í sínu
starfsfólki. Þetta verður hins vegar
enn erfiðara eftir því sem okkur
fækkar sem störfum við skólann.
Mannauðurinn skiptir öllu máli.
Þegar Landbúnaðarháskólinn varð
til [árið 2005] tóku um 130 manns
til starfa við hann, sem komu frá
stofnunum sem áður voru forverar
hans. Nú starfa innan við 90 manns
við skólann. Á sama tíma höfum við
aukið við starfsemi skólans mjög
mikið. Ég vil líka segja það að ef
við hefðum þá fjármuni í dag sem
voru við hendina í upphafi, og þóttu
ekki nægir þá, hefðum við skilað
rekstrarafgangi upp undir hundrað
milljónir á síðasta ári. Okkur hefur
tekist að hagræða gríðarlega á
sama tíma og við höfum aukið við
starfsemi skólans. Það eru takmörk
fyrir því hins vegar hversu langt er
hægt að ganga. Við erum undir það
seld að þurfa að standast ákveðnar
alþjóðlegar gæðakröfur, við höfum
farið í gegnum eina slíka úttekt og
komum faglega mjög sterk út úr
henni, en eftir því sem fólki fækkar,
þess erfiðara verður það.“
Starfsfólki ekki haldið í
myrkrinu
Eftir fundinn í gær sendi kennari
í skólanum harðort bréf á alla
starfsmenn þar sem lýst er mikill
óánægju með málatilbúnað
rektors og menntamálaráðherra.
Í bréfinu segir að ljóst sé að
rektor og yfirstjórn skólans hafi
unnið að því ötullega undanfarið
ár með menntamálaráðuneyti að
Landbúnaðarháskólinn skyldi
sameinaður HÍ án þess að starfsfólk
skólans hafi verið upplýst um það.
Ágúst segir að hann hafi ekki séð
umrætt bréf en hann hafni þessum
ávirðingum.
„Það er eðlilegt að ekki séu
allir sammála um málið enda
myndu felast miklar breytingar í
sameiningu. Hins vegar neita ég því
að þetta hafi farið leynt á nokkurn
hátt. Allan þann tíma sem ég hef
verið rektor hef ég reynt að koma
hreinskilnislega fram við starfsfólk
og segja þeim frá hvað er í gangi.
Manni tekst samt líkleg aldrei að
gera nóg af því að upplýsa. Það
er hins vegar bara ekki rétt að
starfsfólki hafi á einhvern hátt verið
haldið í myrkrinu.
Við höfum auðvitað verið að
bíða eftir því að stjórnvöld taki
ákvörðun um framtíð skólans. Nú
þegar sú ákvörðun virðist liggja
fyrir þá er auðvitað margt eftir í
því að marka stefnu til framtíðar
í starfsemi skólans. Þar þurfa
auðvitað starfsmenn, nemendur og
fleiri að koma að málinu. Við höfum
verið í lausu lofti til þessa.“
Hyggst ekki stökkva frá
vandanum
Ágúst segist ekki upplifa að upp
sé kominn trúnaðarbrestur milli
sín og starfsmanna skólans. Hann
segist hafa hugsað sinn gang hvað
sína stöðu varðar en ætli sér ekki
að hverfa frá starfi á ólgutímum.
„Jú, ég hef að sjálfsögðu hugsað
um það. Það hefur hins vegar
aldrei hvarflað að mér að stökkva
frá vandanum. Það þarf að koma
þessum málum í höfn, þannig að
ljóst sé hvaða ákvörðun hafi verið
tekin. Síðan líður minn tími bara,
ég er ráðinn til fimm ára í senn,
og minn skipunartími rennur út
núna í sumar. Þá mun ég bara taka
ákvörðun um hvert framhaldið kann
að verða.“ /fr
Breytingar boðaðar hjá Landbúnaðarháskóla Íslands:
Fimmtán verður sagt upp
Hilmir Snær og hljómsveitirnar
Brother Grass og Hundur í
óskilum munu leiða saman hesta
sína í Hörpu síðdegis í kvöld,
fimmtudaginn 3. apríl. Boðið
verður upp á nýstárlegt, tónrænt
uppistand í Norðurljósasal Hörpu.
Íslenski hesturinn verður skoðaður
frá öllum hliðum og rifjuð upp
rysjótt sambúð hans við ótamin
náttúruöfl og brokkgenga þjóð.
Hilmir Snær segir sögur af hestum
og brestur í söng og hljómsveitin
Brother Grass leikur þekkt og óþekkt
íslensk hestalög með nokkrum öðrum
hætti en fólk á að venjast. Þá mun
hljómsveitin Hundur í óskilum leika
lausum hala um sviðið og aðstoða
bæði Hilmi Snæ og Brother Grass
við flutninginn. Eru hestamenn og
aðrir hvattir til að koma og upplifa
íslenska hestinn á þessum einstaka
viðburði í gegnum sögur, ljóð og
söng. Miðasala á midi.is.
Heimboð í hesthús á föstudag
Föstudaginn 4. apríl ætla
hestamannafélögin Fákur, Hörður,
Sóti, Sprettur og Sörli að bjóða
gestum og gangandi í félögin sín.
Valin hesthús verða opin fyrir
áhugasama og hestateymingar verða
í boði í reiðhöllum félaganna ásamt
léttum veitingum.
Öll hestamannafélögin verða
með sömu dagskrá á sama tíma.
Klukkan 17-19 verða opin ákveðin
hesthús sem merkt verða með
blöðrum. Verður teymt undir
börnum í reiðhöllum félaganna.
Klukkan 18.00 munu börn og
unglingar sýna atriði og kaffi, svali
og kjötsúpa verður í boði hjá hverju
félagi.
Skrúðreið 5. apríl
Kl. 13.00 – Skrúðreið um 150
hesta verður farin frá BSÍ klukkan
13.00 á laugardag. Riðið verður
upp á Skólavörðuholt, niður
Skólavörðustíg, yfir Lækjargötu,
Austurstræti, Pósthússtræti,
Kirkjustræti og Tjarnargötu
og að Ráðhúsi. Þá verður farið
áfram Tjarnargötu, í gegnum
Hljómskálagarð, yfir Njarðargötu
og aftur að BSÍ.
Kl. 20.00 – Ístölt þeirra allra
sterkustu verður svo í Skautahöllinni
í Laugardal klukkan 20.00 þar sem
boðið verður upp á töltandi gæðinga
á ís.

Sunnudagur 6. apríl
Æskan & hesturinn verður í
reiðhöllinni í Víðidal á sunnudag
klukkan 13.00 og 16.00.
Landssamband hestamannafélaga:
Hestadagar 2014
Ársfundur Lífeyrissjóðs bænda:
Hrein raunávöxtun
árið 2013 var 5,6%
Ársfundur Lífeyrissjóðs bænda
(LSB) var haldinn 21. mars. Þar
kom fram að hrein eign til greiðslu
lífeyris nam 27,3 milljörðum
króna í árslok 2013, hækkaði um
1,8 milljarða króna milli ára eða
7,0%.
Hrein eign til greiðslu lífeyris
hefur vaxið frá bankahrunsárinu
2008, ekki aðeins miðað við verðlag
hvers árs heldur hefur orðið nokkur
aukning umfram hækkun verðlags.
Ávöxtun á árinu 2013 var 9,6%, sem
samsvarar 5,7% raunávöxtun. Hrein
raunávöxtun nam 5,6% á árinu 2013,
á móti 5,5% árið 2012.
Ávöxtun síðustu fjögurra ára er
4,5% að meðaltali, sem er talsvert
umfram það viðmið sem stuðst er
við í tryggingafræðilegri athugun
lífeyrissjóðanna.
Afkoma ársins 2013 var með
ágætum þegar horft er til takmarkaðra
fjárfestingarmöguleika með tilkomu
gjaldeyrishaftanna.
Eignasafn sjóðsins er traust og
væntingar eru um stöðuga og góða
ávöxtun á næstu árum. Aukin áhersla
á greiningu á fjárhagslegri stöðu
við fjárfestingar, greiðslugetu og
gæðamat á skuldara fremur en að
horfa eingöngu til ávöxtunar, mun
styrkja sjóðinn enn frekar og afkomu
hans þegar til framtíðar er litið.
Lífeyrisréttindi sjóðsins eru
verðtryggð og breytast til samræmis
við breytingu á vísitölu neysluverðs.
Heildariðgjaldatekjur námu 575
m.kr., sem er 13,0% hækkun frá
fyrra ári. Iðgjöld sjóðfélaga námu
195 m.kr., mótframlög 379 m.kr. og
réttindaflutningar og endurgreiðslur
nettó var 1,1 m.kr. Greiðandi virkir
sjóðfélagar voru 2.592 á árinu 2013
samanborið við 2.657 á árinu 2012.
Iðgjöld sjóðfélaga eru 4% af
launum. Hjá bændum miðast
iðgjöld við reiknað endurgjald í
landbúnaði eða greidd laun þar sem
búrekstrarformi er þannig háttað, sbr.
1. og 2. mgr. 4. gr. laga nr. 12/1999.
Starfsmenn LSB í árslok 2013
voru þrír auk framkvæmdastjórans,
Ólafs K. Ólafs, og er Skúli Bjarnason
þar stjórnarformaður.
Hilmir Snær.
Ágúst Sigurðsson rektor
Sauðfjárbændur fjölmenna til
Reykjavíkur föstudaginn 4. apríl til
þess að halda aðalfund og árshátíð
Landssamtaka sauðfjárbænda.
Að því tilefni bjóða þeir gestum
og gangandi til mannfagnaðar
á KEX Hostel á Skúlagötu 28
milli klukkan 16.00 og 18.00. Þar
munu þaulvanir rúningsmenn
kynna verklagni sína og keppa
um Gullklippurnar. Verðlaunin
eru veitt þeim sem rýir með hvað
mestum glæsibrag
Meðal gesta verður sauðfé frá
Hraðastöðum í Mosfellsdal en
því verður ekið í þar til gerðum
sauðfjárvagni til og frá rúningsstað
og mun dýralæknir sjá um að velferð
þess sé í hávegum höfð. Við sama
tilefni verður eigendum fremstu
hrúta landsins veittar viðurkenningar
fyrir besta lambaföðurinn og mesta
kynbótahrútinn.
Rúið verður í portinu á KEX og
mun rúningsfólk hefjast handa kl.
16.00. Sætaferðir verða frá Hótel
Sögu fyrir sauðfjárbændur kl. 15.45.
Viðburðurinn er samvinnuverkefni
KEX Hostel, Landssamtaka
sauðfjárbænda og Bændablaðsins.
Aðalfundur Landssamtaka
sauðfjárbænda fer fram á Hótel
Sögu dagana 3.-4. apríl en árshátíð
félagsins verður að kvöldi föstudags.
Þriðja árið í röð er uppselt á hátíðina
þar sem 350 sauðfjárbændur gera sér
glaðan dag í Súlnasal.
Sauðfé og bændur í borginni