Bændablaðið - 03.04.2014, Blaðsíða 44

44 Bændablaðið | Fimmtudagur 3. apríl 2014
Vélabásinn
liklegur@internet.is
Hjörtur L. Jónsson
Sjö manna Peugeot 5008:
Þægilegur fjölskyldubíll fyrir stórfjölskyldur
Peugeot hefur á undanförnum
árum sannað sig í framleiðslu
á litlum, endingargóðum og
sparneytnum bílum meðal
smærri fólksbíla. Fyrir
skemmstu frumsýndi Bernhard
nýjustu árgerðina af Peugeot.
Margar stærðir og gerðir voru
á frumsýningunni, en mér lék
forvitni á að prófa Peugeot 5008,
sem er stór sjö manna bíll sem
á að henta vel sem fjölskyldubíll
(og eflaust sem leigubíll). Bíllinn
sem ég valdi til prufuaksturs var
með 1,6 lítra dísilvél, á að skila
114 hestöflum, sjálfskiptur (með
rafmagnsskiptingu), á að eyða 4,8
lítrum af dísil í blönduðum akstri
miðað við bestu aðstæður.
Útsýni fram fyrir bílinn
framúrskarandi
Það var ekki laust við að mér
yrði hugsað til textabrots með
Bítlavinafélaginu um Auðbjörn,
tvítuga töffarann á bílnum sínum
með topplúguna, en þó svo að
engin væri topplúgan á þessum bíl
er gluggi eftir nánast öllu þakinu
og mætti halda að bíllinn væri
sérhannaður fyrir norðurljósaferðir
á íslenskum vetrarkvöldum (sem
gæti hentað vel fyrir leigubílstjóra
næsta vetur). Ekki er bara útsýnið
gott upp á við heldur er einstaklega
gott útsýni fram fyrir bílinn, en þó
skyggði baksýnisspegillinn aðeins á
og stal örlítið ánægjunni. Hins vegar
voru baksýnisspeglarnir tveir, en efri
spegillinn er meira til að fylgjast
með farþegunum fimm fyrir aftan
ökumanninn.
Hægt að skipta
rafmagnssjálfsskiptingunni á
þrjá mismunandi vegu
Ég er svo sérlunda að ég vil hafa
mína bíla beinskipta, en því er
ekki að neita að það er þægilegt að
keyra sjálfskipta bíla. Það eru ekki
margar bílategundir sem bjóða upp
á rafmagnssjálfsskiptingar, hvað
þá í smærri bílum eins og þessum
(mun algengara í stærri bílum eins
og sendibílum og vörubílum). Að
keyra með svona skiptingu er
ekki ósvipað og að maður ímyndi
sér að vera á beinskiptum bíl og
að einhver annar skipti um gír
fyrir ökumanninn. Hægt er að
keyra bílinn eins og venjulegan
sjálfskiptan bíl. Svo er hægt að
skipta um gír í stýrinu, hægra
megin er upp og vinstra megin
niður. Síðan er hægt að færa
gírstöngina að sér um eitt pall og
þá er aftur upp um gír og fram
niður um gír.
Öftustu tvö sætin ekki fyrir mjög
stóra og „skjólgóða“
Þó að bíllinn sé skráður sjö manna
eru öftustu tvö sætin varla fyrir
fullvaxna Íslendinga, en að ferðast
í bílnum með þrjá í miðsætunum er
vel rúmt um þá og mikið rými fyrir
farangur aftast séu öftustu sætin
niðri. Eldri sonur minn, sem er
töluvert stærri en ég, settist aftur
í bílinn og dásamaði plássið sem
var þar, olnbogarými gott, hátt til
lofts, en þó sérstaklega borðið sem
hann gat sett niður og sagði þetta
vera sérhannað fyrir að taka með
sér fartölvuna í bíltúr.
Veghljóð í fjöðrun
óþægilega mikið
Að keyra bílinn á malarvegi var
svolítið sérstakt, þegar keyrt var
í litlar holur og ójöfnur heyrðist
svolítið veghljóð á stystu og
minnstu fjöðruninni, en ef holurnar
voru stærri heyrðist minna á
hraðanum á milli fjörutíu og
fimmtíu. Ef hins vegar var snúið
við og sami vegkafli var ekin aftur
og þá hraðar á milli 70 og 80 km
heyrðist enn minna veghljóð og
fannst mér við þessa litlu prófun
betra að keyra hratt á holóttum
malarvegi fremur en að fara varlega
og greinilegt að fjöðrunin er hönnuð
fyrir hraða því veggrip virtist bara
batna við hraðari akstur.
Ótrúlega gott aðgengi að vél
Franskir bílar hafa haft það orð á
sér að vont sé að komast að öllu
í vélinni og helst þyrfti að vera
verkfræðingur með barnsmáar
hendur til að skipta um perur í þeim.
Í þessum bíl virðist aðgengi að
vélinni vera mjög gott og að skipta
um peru virðist lítið mál í þessum
bíl jafnvel fyrir klunna hendur eins
og mínar. Alls ók ég bílnum tæpa
200 kílómetra og í mælingu sem
ég gerði á eyðslu á síðustu 108
km var bíllinn að eyða 6,4 lítrum
af dísil á hundraðið á meðalhraða
upp á 45 km á klukkustund. Hægt
er að fræðast meira um Peugeot
á vandaðri heimasíðu á slóðinni
www.peugeot.is.
Peugeot 5008. Myndir / HLJ
Peugeot 5008 1,6 dísil HDi
114 hestöfl
4.590.000 kr.
Lengd: 4.529 mm
Hæð 1.639 mm
Breidd: 1.837 mm
Mikið pláss í miðjusætunum og borðið hentar vel fyrir fartölvu.
Óvenjugott er að komast að við ljósaperuskipti. Baksýnisspeglarnir tveir mættu vera aðeins ofar til að fá enn betra útsýni.
Stórir og góðir hliðarspeglar.
Þegar bílnum er læst falla hliðar-
speglarnir að honum.