Bændablaðið - 03.04.2014, Side 46

46 Bændablaðið | Fimmtudagur 3. apríl 2014
Líf og lyst
BÆRINN OKKAR
Ljúffeng svínarif og bráðhollt Sesarsalat
Svínarif í grillsósu er réttur sem
óhætt er að leyfa sér endrum og
eins. Hráefnið er ódýrt og það er
gaman að borða rif í góðra vina
hópi með köldum bjór. Fyrir þá
sem leggja ekki í rifin er kjörið
að útbúa ekta Sesarsalat. Verði
ykkur að góðu!
Svínarif í BBQ-sósu
Fyrir rifin:
› 4 hreinsuð svínarif
› 30 g íslenskt flögusalt
› ½ tsk. svartur pipar, mulinn
› 2 tsk. hvítur pipar
› ½ tsk. cayenne-pipar
› 1 matskeið sykur
› ½ msk. hvítlauksduft
› ½ msk. laukduft
› Kryddið kjötið með þurrkryddunum
Fyrir BBQ-sósu :
› ½ msk. sojasósa
› 1 bolli tómatmauk
› ¼ bolli kjúklingaseyði (vatn og
kraftur)
› ¼ bolli tómatsósa
› ¼ bolli epla edik
› 1 kryddaður bjór
› ½ bolli appelsínusafi
› ¼ bolli vatn
› 3 hvítlauksrif, smátt söxuð
› 1 tsk. chilliduft
› 1 msk. laukduft
› 1 msk. salt
› 1 msk. svartur pipar
› 2 bollar ljós púðursykur
Blandið saman salti, papriku,
sykri, hvítlauk og laukdufti og
nuddið jafnt yfir kjötið.
Forhitið ofninn í 155 °C. Vefjið
svínarifin lauslega með álpappír,
látið beinin snúa niður. Eldið rifin
að lágmarki í 90 mínútur, snúið á
15 mínútna fresti .
BBQ-sósa: Maukið saman í
blandara; sojasósu, tómatmauki,
kjúklingaseyði, tómatsósu, ediki,
bjór, hvítlauk og appelsínusafa.
Kryddið með chili, laukdufti, salti ,
pipar og púðursykri. Látið krauma
í potti í 25 til 30 mínútur.
Brúnið rif á grillpönnu eða grillið
á útigrilli. Penslið sósu á rifin og
bakið áfram í ofni. Penslið tvisvar
sinnum á 10 mínútna fresti og brúnið
svo undir grilli til að karamella
sósuna. Berið fram með hrásalati.
Sesarsalat
› 3 hausar íslenskt romane-salat
› 200 g parmesanostur
› 2 msk. sérríedik
› 2 stk. egg, soðin í 4 mín. og kæld
› 4 stk. útvatnaðar ansjósur úr dós
› 4 dl ólífuolía
› salt og nýmalaður pipar
› ½ msk. worcestershire-sósa
› Ögn vatn eftir smekk (líka hægt að
nota kjúklingasoð eða vatn og kraft)

Takið salatblöðin af stilkunum
og hreinsið undir köldu rennandi
vatni, þerrið vel og haldið köldu.
Rífið parmesanost fínt. Setjið egg,
ansjósur, parmesanost og edik í
matvinnsluvél og blandið vel. Látið
vélina ganga og hellið ólífuolíu hægt
út í, í mjórri bunu. Þynnið með vatni
ef þarf. Kryddið til með salti, pipar
og worcestershire-sósu.
Brauðteningar:
› 4 sneiðar franskbrauð
› 50 g smjör
› 60 g parmesanostur
› ½ búnt graslaukur
Skerið brauðið í ½ cm teninga. Hitið
smjör á pönnu, fleytið froðuna ofan
af og steikið brauðbitana gullinbrúna
og stökka. Setjið á eldhúspappír og
svo aftur á þurra pönnuna. Stráið
parmesanosti yfir og hristið pönnuna
vel.
Setjið smá dressingu á diska og
rífið parmesanost yfir. Setjið 3-4
salatblöð á diskana, smá dressingu
aftur yfir, ásamt parmesanosti.
Endurtakið þetta tvisvar sinnum.
Stráið brauðteningum yfir og skreytið
með graslauk. Ekki skemmir að rífa
kjúklingaafganga í salatið.
MATARKRÓKURINN – BJARNI GUNNAR KRISTINSSON MATREIÐSLUMEISTARI
Svanhildur og Magnús keyptu
hluta úr jörðinni Holtsmúla
I ásamt öllum húsakosti árið
2008. Þar með rættist langþráður
draumur beggja, að eignast sína
eigin jörð. Jörðin hafði ekki
verið í ábúð í eitt ár, en þar áður
stunduðu Sigurður og Lisbeth
Sæmundsson þar afar farsæla
hrossarækt. Markmiðið er að
halda því áfram.
Býli: Holtsmúli I.
Staðsett í sveit: Neðarlega í gömlu
Landsveit, Rangárþingi ytra.
Ábúendur: Þórir Magnús Lárusson
og Svanhildur Hall.
Fjölskyldustærð (og gæludýra):
Við búum hér með dætrum okkar
tveimur, Eddu Margréti 8 ára og
Berglindi Maríu 5 ára, bráðum 6!
Kisurnar tvær, Ponta og Alda, eru
orðnar 9 ára.
Stærð jarðar: Lítil! Um 40 hektarar
en vel hýst. Til viðbótar leigjum við
um 500 hektara.
Gerð bús: Hrossaræktarbú.
Fjöldi búfjár og tegundir: Við
eigum um 160 hross núna en eigum
von á 38 folöldum á næstu vikum
og mánuðum.
Hvernig gengur hefðbundinn
vinnudagur fyrir sig á bænum?
Eldri dóttirin fer með skólabílnum
í Laugalandsskóla og oft fær sú
yngri far í leikskólann, nú ellegar
skutlar Pabbi. Svo er allt liðið
komið klukkan 8 í hesthúsið
nema húsmóðirin, en hún er föst
við tölvuna eitthvað mislengi
fram eftir morgni eftir því hversu
bókhald og hrossasölumál eru
fyrirferðamikil þann daginn. Segja
má að tamningar og þjálfun hrossa
taki alltaf lungann úr deginum, en
ábúendur taka auk þess að sér ýmis
störf tengd hestum og hestamennsku
svo sem reiðkennslu bæði hér heima
og erlendis, dómstörf, ráðgjöf í
hrossarækt og fleira. Á vorin og
sumrin fer töluverður tími í eftirlit
með hryssum sem eru að kasta og
stóðhestahald.
Skemmtilegustu/leiðinlegustu
bústörfin: Húsfrúnni finnst
bókhaldið leiðinlegt, sérstaklega
þegar það stemmir ekki, en
skemmtilegast að þjálfa efnileg hross
úr eigin ræktun. Húsbóndanum
þykir leiðinlegt að brjóta saman
þvottinn en skemmtilegast að ríða
út með dætrum sínum.
Hvernig sjáið þið búskapinn
fyrir ykkur á jörðinni eftir
fimm ár? Fram að þessu höfum
við lagt áherslu á að vera með
afar fjölbreytt úrval hrossa til
sölu, en stefnan er sett á að fækka
eitthvað og vinna lengur og meira
úr hverjum grip. Á síðasta ári
byggðum við reiðhöll, firnagóða
vinnuaðstöðu sem gerir þann
möguleika gerlegan.
Hvaða skoðun hafið þið á
félagsmálum bænda? Við
teljum að aukin og betri samvinna
forystu afla í hestamennsku myndi
skila hestamönnum hraðar áfram
í öllu sem verið er að vinna að.
Of mikil átök einkenna fundi og
samkomur oft á tíðum þar sem
menn bítast um viðburði, nám
og námsefni, markaði, nefndir
og fleira. Það leiðir til þess að
hver er í sínu horni að potast og/
eða jafnvel finna upp hjólið í
stað þess að hugsa sameiginlega
fram á veginn um það sem er
íslenska hestinum fyrir bestu,
því það mun að sjálfsögðu verða
hestamönnum fyrir bestu. Það
vantar jákvæðni og traust manna
á milli í hestamennskunni og
svolitla trú á því að fólk vilji vel.
Hvernig mun íslenskum
landbúnaði vegna í framtíðinni?
Þar sem margt fólk er að vinna
margvíslega hluti og mat úr
óendanlegum breytileika hráefna
úr íslenskum landbúnaði og
náttúru erum við bjartsýn á framtíð
íslensks landbúnaðar.
Hvar teljið þið að helstu
tækifærin séu í útflutningi
íslenskra búvara? Markhópur
íslensks landbúnaðar erlendis er
án efa efnameira fólk sem vill
eitthvað nýstárlegt, hreint og
heilsusamlegt. Þetta eru svona
framtíðarorðin höldum við. Ísland
passar einkar vel inn í þennan
orðaforða.
Hvað er alltaf til í ísskápnum?
Mjólk, ostur, smjör, fetaostur, og
grænmeti.
Hver er vinsælasti maturinn á
heimilinu? Við værum fljótari að
telja upp hvað er ekki vinsælt á
þessum bæ, en við eigum alltaf
lambakjöt, folaldakjöt og ýsu í
kistunni. Marineruð og grilluð
folaldasteik er alltaf vinsæl, sér
í lagi með nýjum kartöflum og
grænmeti.
Eftirminnilegasta atvikið
við bústörfin: Þegar vindótti
stóðhesturinn okkar, hann Þeyr
frá Holtsmúla I, fór í glæsilegan
kynbótadóm, 8,33 aðeins fimm
vetra gamall og náði verðlaunasæti
á Landsmóti. Einnig hefur haft
mikil áhrif á okkar daglegu störf
notkun reiðhallar sem við byggðum
í fyrra. Hún hefur algerlega
umturnað allri okkar vinnu við
þjálfun hrossa til hins betra.
Holtsmúli
Þeyr frá Holtsmúla.