Bændablaðið - 13.05.2015, Side 8

8 Bændablaðið | Miðvikudagur 13. maí 2015
Þegar Flateyringarnir Einar
Guðbjartsson og Guðrún Pálsdóttir
voru að vitja sumarbústaðar
síns undir Hestfjalli innst í
Önundarfirði síðastliðinn
fimmtudag sáu þau þrjár kindur
ofan við bústaðinn. Þótti þeim það
óvenjulegt þar sem ekki var búið
að hleypa fé út af neinum bæjum
í grenndinni.
Einar sagði í samtali við
Bændablaðið að hann hafi fyrst
talið að um hrúta væri að ræða. En
þar sem hann er alinn upp í Efri
húsum í Önundarfirði og bjó síðan
á Hesti, þá rann honum blóðið til
skyldunnar að kanna þetta betur.
Guðrún er ekki síður tengd sveitinni
enda ólst hún upp á Ingjaldssandi til
fermingaraldurs.
„Kindurnar voru mjög styggar og
fyrst hélt ég að þetta væru hrútar frá
Hóli. Svo fór ég að velta þessu fyrir
mér og kíkti aftur á kindurnar tveim
tímum seinna, þá sá ég að þar var ein
nýborin þrem lömbum,“ sagði Einar.
Tvær úr Dýrafirði og ein
úr Álftafirði
Kom í ljós að féð hafði gengið úti
í allan vetur. Var sú nýborna í eigu
Karls Bjarnasonar í Neðri-Hjarðardal
í Dýrafirði, og með henni var lamb frá
því í fyrra. Þriðja kindin reyndist svo
vera í eigu Guðmundar Halldórssonar
á Svarthamri við Álftafjörð.
Karl Bjarnason sagði í samtali við
Bændablaðið að þarna væri um að
ræða fé sem ekki hafi skilað sér af
fjalli í haust. Ljóst er að frjósemin
hefur ekki verið slæm þeirri nýbornu
og hraust er hún að lifa af harðan
vestfirskan vetur og skila af sér þrem
lömbum.
Hefur slegið sér upp með hrúti frá
Svarthamri
„Líklega hefur þessi nýborna verið
frammi á Korpudalnum í haust og
vetur og komist í kynni við hrút.“
Sagðist Karl vita að Guðmund á
Svarthamri hafi vantað tvo hrúta sem
ekki skiluðu sér af fjalli eftir síðasta
sumar, en þeirra hefur samt ekki orðið
vart.
„Það er ekkert ósennilegt að
þeir hafi verið að þvælast þarna í
Önundarfirðinum.“
Karl sagðist annars í samtali við
Bændablaðið að hann væri með um
370 til 380 fjár. Sú nýborna væri
fædd 2007 og hafi alltaf skilað þrem
lömbum nema í fyrsta burði. Nærri
30 ær voru bornar í Neðri-Hjarðardal
fyrir helgina og hefur sauðburður
gengið vel. Þrátt fyrir að lofthitinn hafi
ekki verið mikill það sem af er vori
sagðist Karl hafa féð í hólfi utan dyra
þar sem ærnar hafi borið. Sagði hann
engin vanhöld hafa verið á lömbum.
Ekkert sældarlíf að ganga úti í
Korpudal í vetur
Það hefur ekki verið neitt sældarlíf
hjá fénu að ganga úti í Korpudal í
vetur. Sagði Karl þar enn vera allt á
kafi í snjó og mun meiri snjór væri í
Öndunarfirði en í Dýrafirði. Eitthvað
hafi féð samt náð að éta, því það var
bærilega haldið. Einar Guðbjartsson
tók undir það og taldi líklegt að féð
hafi hafst við í Korpudalnum norðan
við Hestfjallið, en sunnan við fjallið
er Hestdalur. Það hafi þó örugglega
verið erfitt líf sökum snjóa og óveðurs.
Sagði hann að þótt snjór væri að mestu
horfinn af Flateyrinni, þá næði sólin
ekki að bræða neitt að gagni vegna
kulda.
/HKr.
Fréttir
Í vetur hefur verið unnið að
undirbúningi þess að veittir verði
dvalarstyrkir til staðnema á fyrsta
námsári við Háskólann á Hólum.
Og nú liggur fyrir að unnt verður
að veita slíka styrki, á vorönn 2016.
Þeir nemendur, sem uppfylla
eftirfarandi skilyrði, geta sótt um -
þegar þar að kemur:
• Að vera staðnemi á 1. ári í
grunnnámi við Háskólann á
Hólum.
• Að hafa lagt stund á fullt nám
við skólann og lokið 30 ECTS
á haustönn 2015.
• Að hafa hlotið hærri
meðaleinkunn en 8,0 á haustönn
2015.
Umsóknarfrestur vegna styrkjanna
verður auglýstur þegar nær dregur.
Upphæð hvers styrks vegna
skólaársins 2015–2016 verður kr.
300.000. Verði umsækjendur fleiri
en þeir styrkir sem unnt verður að
veita, mun rektor skólans draga
nöfn styrkþega úr umsóknarpotti,
að viðstöddum deildarstjórum,
forstöðumanni kennslusviðs og
fulltrúa Stúdentafélags Háskólans á
Hólum.
Háskólinn á Hólum:
Dvalarstyrkir veittir
fyrir fyrstaársnema
Nemar í HR vinna að hugmynd um lánamiðlun
Lánamiðlunin CreditHub er
hugmynd sem frumkvöðlar úr
Háskólanum í Reykjavík hafa
verið að vinna að seinustu vikur í
áfanganum Nýsköpun og stofnun
fyrirtækja.
Markmið áfangans er að
setja saman í hóp fólk úr
mismunandi deildum og vinna
að viðskiptahugmynd í þrjár
vikur. Margar þeirra hugmynda
eiga góðan möguleika á að
verða að veruleika og CreditHub
er þar engin undantekning.
Hópurinn samanstendur
af Guðmundi Ásgeirssyni
lögfræðinema, Guðríði Bjarteyju
Ófeigsdóttur verkfræðinema,
Guðrúnu Dagbjartsdóttur
viðskiptafræðinema, Hákoni
Aðalsteinssyni viðskiptafræðinema,
Helga Hrafni Björnssyni
verkfræðinema og Hilmu E. Z.
Valdimarsdóttur verkfræðinema.
Viðskiptahugmyndir skrásettar í
gagnagrunn
CreditHub er vefkerfi sem
gerir frumkvöðlum kleift að
skrásetja viðskiptahugmyndir
og nýsköpunarverkefni ásamt
kynningarefni um þær í gagnagrunn,
þar sem fjárfestar geta leitað að
athyglisverðum hugmyndum og
gert tilboð um að veita lán til þeirra
svo hægt verði að hrinda þeim í
framkvæmd. Kerfið gerir þessum
aðilum kleift að koma á tengslum
sínum á milli, skiptast á upplýsingum
um viðskiptahugmyndir og koma á
samningum um fjármögnun þeirra
með lánsfé.
Framtíðarsýn að útvíkka
starfsemina
Einnig yrði hægt að sameina
áhuga margra smærri fjárfesta til
að koma á hópfjármögnun. Kerfið
er þó frábrugðið öðrum lausnum á
borð við KickStarter að því leyti
að ekki er um að ræða styrki eða
forkaup á vörum heldur lán sem
endurgreiðast á umsömdum kjörum
með ágóðanum af þeim verkefnum
sem þannig eru fjármögnuð.
Hugmyndin miðast í byrjun
við íslenskan markað, en ef hún
reynist vera framkvæmanleg er
framtíðarsýn hópsins sú að hægt
verði að útvíkka starfsemina til
fleiri landa og stærri markaðssvæða.
/MÞÞ
Sumarbústaðaeigendur á Flateyri fundu þrjár útigangskindur í Önundarfirði:
Ær skilaði þrem lömbum
eftir útigöngu í vetur
Mynd /HKr.
Selen, E-, A og D-vítamín
á fljótandi formi, til inngjafar
fyrir lömb, kálfa og kiðlinga
-Mjög hátt hlutfall af
vítamínum og seleni
-Tilvalið í lömb sem hafa
verið lengi inni
-Gefið um munn - engar
nálastungur og minnkar
því líkur á liðabólgu
Sjá nánar:
www.kb.is
Hefur prjónað þúsund lopapeysur
og gefið til Hvíta-Rússlands
Eygló Jóna Gunnarsdóttir,
djákni á Selfossi, situr ekki
auðum höndum því hún situr
eitthvað við alla daga og prjónar
lopaleysur sem hún gefur til
Hvíta-Rússlands.
Verkefnið er unnið í gegnum
Rauða krossinn og heitir „Föt sem
framlag“. „Ég hef alltaf haft gaman
af prjónaskap og það gefur mér
mikið að geta látið gott af mér leiða
og gefa frá mér. Nú er ég búin að
prjóna um eitt þúsund lopapeysur
á nokkrum árum og ætla að halda
áfram af fullum krafti,“ segir Eygló
Jóna. Hún prjónar mest fyrir framan
sjónvarpið en notar líka tækifærið
til að prjóna ef hún fer á fundi og
einnig í bílnum á ferðalögum um
landið yfir sumartímann. /MHH