Bændablaðið - 28.05.2015, Blaðsíða 33

33Bændablaðið | Fimmtudagur 28. maí 2015
Í hálfan mánuð samdi ég þannig eitt
lag á dag. Svo eiga þau bara eftir að
fara í textasmíði og frekari vinnslu.
Dóttir mín var því matsmaður á það
sem ég var að gera.
Svo snerist þetta líka um að
finna út með sjálfum sér hvernig lög
maður ætti að semja. Það sem ég var
að gera voru lög af ýmsum toga,
róleg og hress í bland. Ég reikna
með að það sem fer á diskinn í haust
verði frekar í stuðgírnum. Spurning
hvort Geirmundur fái þar samkeppni
og hvað um hann verður þegar ég er
kominn á kortið,“ segir Magnús og
skellir upp úr.
„Geirmundur er reyndar
þrælmagnaður. Þvælist um landið
til að spila samhliða því að vera með
búskap og sjá um peningana fyrir
Þórólf í Kaupfélagi Skagfirðinga.“
Það verður að nýta alla 24
tímana
– Þú hefur tíma til að gefa
út geisladisk svona mitt í
sauðburðinum?
„Maður verður bara að spýta í
lófana. Það þýðir ekkert að liggja
undir sæng, það eru nú 24 tímar í
sólarhringnum og um að gera að nýta
þá sem best.“ Annars segir Magnús
að kuldinn sé að gera þeim lífið leitt
í sauðburðinum. Ekki sé hægt að
setja fé út vegna þess. Enginn snjór
sé þó á láglendi.
„Það kemur sjaldan snjór hér, þó
það geti verið kafsnjór hér austar
í sýslunni og hundrað kílómetrum
fyrir norðan okkur. Það hefur
eiginlega ekki komið snjór hér að
neinu marki síðan 1995. Ég hef
því ekki þurft að vera með bílinn
á vetradekkjum síðustu sjö árin eða
svo og sleppi því bara að keyra þegar
hálka er á vegum.“
Sauðburður hefur gengið vel
Magnús segir að þrátt fyrir kulda,
þá hafi sauðburður gengið vel og
í byrjun síðustu viku var burður
hálfnaður á bænum.
„Það hefur ekkert lamb drepist
hjá okkur í burði, en þrjú drepist
eftir að þau voru komin á lappirnar.
Eitt var fatlað og eitt var líflítið eftir
burð. Þetta eru því ekki mikil afföll.“
Segir Magnús að frjósemin
hafi verið nokkuð góð og flestar
tvílembdar þó einar fimm eldri ær
hafi verið einlembdar.
Tók við búinu af foreldrunum
Magnús tók við búinu á Stóru-
Ásgeirsá af foreldrum sínum 2006
með hyrndu fé sem hann keypti
frá Halldóri á Bjarnastöðum í
Þingeyjarsýslu. Síðan bætti hann
stofninn ári seinna með um 80
kollóttum gimbrum frá Heiðadalsá,
Smáhömrum og Geststöðum á
Ströndum. Var hann með um 250
fjár á fóðrum í vetur. Auk þess er
Magnús og kona hans, Rannveig
Aðalbjörg Hjartardóttir, og börnin
þeirra þrjú, Arnaldur Finnbogi,
Erla Rán og Sigríður Emma, með
hrossarækt og hestaleigu sem opnuð
var 2013. Þá hófu þau í fyrrasumar
að reka þar húsdýragarð á bænum
sem krakkarnir taka stóran þátt í að
sinna.
Opnuðu húsdýragarð í
fyrrasumar
Magnús segir að það hafi gengið
vel hjá þeim í húsdýragarðinum í
fyrrasumar þó veðrið hafi mátt vera
betra.
„Við ætlum að reyna að opna nú í
vikunni. Ég hef sterka trúa á að þetta
verkefni gangi vel. Við verðum þá
komin með öll íslensku húsdýrin,
svín, kálfa, hænur, kindur, geitur,
folaldsmerar og kanínur að auki.
Fjölskyldan tekur öll þátt í þessu
verkefni sem er mjög gaman.“
Hann segir að fólk sé smám
saman að átta sig á hvaðan maturinn
kemur og sýni því aukinn áhuga á
að heimsækja sveitina og kynna sér
hvað þar er að gerast. Því sé tilvalið
að heimsækja bæ eins og Stóru-
Ásgeirsá þar sem hægt er að kynnast
öllum dýrunum á einum stað.
Þá taka þau á móti fólki sem
getur þá bæði skoðað dýrin og notið
náttúrunnar, en tveir fallegir fossar
eru á bæjarstæðinu. Lítil sjoppa er
í móttökunni og er verið að byggja
við hana smásal svo hægt sé að
setjast niður og drekka kaffi og fá
sér bakkelsi með því. Magnús segir
að þau hafi lagt áherslu á að gera allt snyrtilegt í kringum bæinn í
fyrra. Endurnýjað girðingar og
málað útihúsin. Nú sé komið að
íbúðarhúsinu sem verði málað í
sumar.
Hestaleiga og útreiðar
Hestaleigan býður upp á góðar
útreiðarleiðir í fallegu umhverfi með
skemmtilegu útsýni. Ekki sakar að
Stóra-Ásgeirsá er vel staðsett mitt
á milli Reykjavíkur og Akureyrar
og rétt ríflega tveggja tíma akstur
hvora leið.
Segir Magnús að þau hjón
séu líka með margar spennandi
hugmyndir um frekari uppbyggingu
í pokahorninu. Er ein hugmyndin
t.d. að setja upp fótboltagolfvöll.
– Má þá búast við að búskapurinn
verði aukabúgrein við hliðina á
spilamennskunni?
„ Það má nú segja að búskapurinn
sé bara aukabúgrein í dag. Það lifir
enginn á þessu einu og sér. Þetta er
bara ákveðinn lífsstíll sem maður
velur sér. Það verður samt gaman
að vita hvað úr þessu verður með
húsdýragarðinum og öðru. Ég hef
mjög gaman af að taka á móti
fólki og spjalla við það um lífið í
sveitinni. Síðasta sumar var ég líka
úti með kassagítarinn og spilaði
fyrir gestina.“
Magnús segir að þau
renni svolítið blint í sjóinn
varðandi markaðssetninguna
á húsdýragarðinum. Þau hafi
kynnt þetta fyrir nokkrum
ferðaskrifstofum, en í fyrra hafi
komið á milli 600 til 700 manns í
húsdýragarðinn og á hestaleiguna
sem hafi verið ágætt til að byrja
með. „Ég hefði ekki viljað fá allt
of marga svona til að byrja með
meðan maður er að átta sig á hvað
megi betur fara. Það gildir það sama
í þessu og í tamningum og öðru að
það borgar sig ekki að fara of geyst,
heldur skref fyrir skref. Númer eitt,
tvö og þrjú er að fólk fari svo frá
manni ánægt og brosandi.“
Þeir sem áhuga hafa á að eignast
þennan fyrsta hljómdisk Magnúsar
bónda geta sem hægast hringt
beint í hann í síma 866-4954, eða
sent honum skilaboð á netfangið
stóraasgeirsa@gmail.com. /HKr.
Stóra-Ásgeirsá í Víðidal.
Erla Rán, Shirly Ann og kiðlingurinn Perla.
Það eru greinilega allir vinir í Víðidal.
Það er líf og fjör í húsdýragerðinu á Stóru-Ásgeirsá.