Bændablaðið - 28.05.2015, Síða 40

40 Bændablaðið | Fimmtudagur 28. maí 2015
Ráðstefna Matvælalandsins
Íslands um útflutning og
verðmætasköpun fór fram á
Hótel Sögu fimmtudaginn 21.
maí síðastliðinn. Fjölmenni kom
og hlýddi á áhugaverð erindi og
gæddi sér á ljúffengum veitingum
meistarakokka Grillsins.
Að samstarfinu um Matvælalandið
Ísland standa atvinnuvega- og
nýsköpunarráðuneytið, Bænda-
samtök Íslands, Íslandsstofa, Matís,
Samtök ferðaþjónustunnar, Samtök
fyrirtækja í sjávarútvegi og Samtök
iðnaðarins.
Eftir að ráðstefnustjóri, Alda
Gylfadóttir, framkvæmdastjóri
Einhamar Seafood, hafði boðið
ráðstefnugesti velkomna flutti
Guðný Káradóttir, forstöðumaður
sjávarútvegs- og matvælasviðs hjá
Íslandsstofu, erindið Nýtum tækifærin
– með skýra stefnu í farteskinu.
Guðný útskýrði hlutverk
Íslandsstofu sem stuðningsaðili við
þau fyrirtæki sem hyggja á útflutning.
Markmiðin eru að efla ímynd Íslands
sem matvælalands, auka áhuga á
íslenskum matvælum og stuðla að
gjaldeyrisöflun og verðmætasköpun.
Svo greindi hún frá nokkrum
hagnýtum atriðum sem geta
gagnast útflutningsaðilum í því
að ná betri árangri. Þar er skýr
stefna hvað mikilvægast, er varðar
markaðssetningu og sölu – og að allur
undirbúningur sé í samræmi við þá
stefnu.
Stöðug gæði og afhendingaröryggi
Jón Georg Aðalsteinsson, sem hefur
rekið umboðsskrifstofu fyrir íslenskar
matvörur í Sviss um árabil, flutti
erindið Hvernig mætum við kröfum
á erlendum markaði?
Í stuttu máli þá svaraði Jón þeirri
spurningu á einfaldan hátt; með
stöðugleika. Jón lagði til að mynda
mikla áherslu á stöðug gæði vörunnar
og afhendingaröryggi. Þetta væru
lykilatriði til að öðlast traust og halda
því.
Jón Georg sagði að Ísland hefði
sérstöðu að því leyti að vörumerkið
Ísland væri afar verðmætt. Því mætti
nota það – gætilega þó – til að keppa
efst í gæðapíramídanum. Það væri
vænlegasta leiðin í útflutningi fyrir
íslenskar matvörur.
Matvælaöryggi forsenda viðskipta
með matvæli
Þau Arnljótur Bjarki Bergsson
og Hrönn Ólína Jörundsdóttir frá
Matís, sögðu frá hlutverki Matís og
þeim þætti í útflutningi sem gerist í
bakgrunnsvinnunni.
Í máli Hrannar kom meðal
annars fram að framþróun íslenskrar
matvælaframleiðslu væri til lítils
ef matvælaöryggi væri ekki tryggt
– og Matís hefði það hlutverk
meðal annars að gæta að því.
Mætavælaöryggi væri forsenda
viðskipta með matvæli.
Vinna Matís í því að standa
vörð um matvælaöryggið, hefur
einkum helgast af sýnatökum og
rannsóknum á óæskilegum efnum
í sjávarafurðum. Sú vöktun og
niðurstöður úr rannsóknunum hafa
nýst útflytjendum sjávarfangs,
s j á v a r ú t v e g s f y r i r t æ k j u m ,
eftirlitsaðilum og fleirum til að sýna
kaupendum fram á öryggi þeirra
afurða.
Margir kannast við Kjötbókina,
sem Matís endurútgaf fyrir
fáeinum árum á veflægu formi.
Arnljótur upplýsti á ráðstefnunni að
sambærileg útgáfa, Fiskbókin, væri
nú aðgengileg á slóðinni fiskbokin.
is, þar sem margvíslegan fróðleik er
að finna um veiðar, afurðir, nýtingu,
vinnsluaðferðir og uppskriftir
fiskafurða.
Arnljótur greindi líka frá
rannsóknum Matís á mikilvægi
útflutnings sjávarafurða fyrir aukna
verðmætasköpun í sjávarútvegi.
Ríkisstjórnin styrkir verkefnið um
80 milljónir á ári næstu fimm ár
Sigurður Ingi Jóhannsson,
sjávarútvegs- og landbúnaðar-
ráðherra, kynnti nýlega samþykkt
ríkisstjórnar, um að verkefninu um
Matvælalandið Ísland yrði lagt til
80 milljónir króna árlega á næstu
fimm árum. Með þeirri fjárveitingu
er verkefninu ætlað að treysta
orðspor og móta ímynd Íslands sem
upprunalands hreinna og heilnæmra
matvæla og auka með því móti
gjaldeyristekjur þjóðarinnar.
Ráðstefnunni lauk með
samantekt Guðrúnar Hafsteins-
dóttur, formanns Samtaka
iðnaðarins. Þar kom fram að
nokkur lykilorð voru leiðarstef
ráðstefnunnar um velgengni í
útflutningi; ferskleiki, gæði,
sjálfbærni, þjónusta, upplifun,
sérstaða, stöðugleiki í gæðum,
stöðugt framboð, hönnun – og
svo lykilorðið sem stendur upp úr
umræðunni: samvinna.
Upptökur frá ráðstefnunni verða
aðgengilegar á allra næstu dögum á
vef Bændasamtaka Íslands, bondi.is.
Útflutningur – Verðmætasköpun og ný tækifæri
MATVÆLALANDIÐ ÍSLAND STÓÐ FYRIR RÁÐSTEFNU UM ÚTFLUTNING OG VERÐMÆTASKÖPUN:
Afhendingaröryggi
og samvinna
– eru meðal lykilhugtaka í útflutningsmálum að mati fyrirlesara ráðstefnunnar
Ráðstefnan var vel sótt og gestir skemmtu sér vel. Myndir / smh
Jón Georg Aðalsteinsson rakti sögu
sína og miðlaði af reynslu.
Arnljótur Bjarki og Hrönn Ólína
greindu frá bakgrunnsvinnu Matís.
Matreiðslumeistarar Grillsins buðu upp á íslenskar krásir.
Sigurður Ingi Jóhannsson kynnti
stuðning ríkisstjórnar við verkefnið.