Skírnir - 01.09.2006, Blaðsíða 86

Fortíð líkmannanna var ekki síður ótrúleg ef marka má frétta-
flutning blaðsins. Samkvæmt DV vildi Jónas Ingi Ragnarsson
framleiða efnavopn á Íslandi fyrir líbönsku skæruliðasamtökin
Hizbollah (DV, 25.2.), en þeirri frétt var þó ekki fylgt eftir í næstu
blöðum.31 Snemma tók að gæta á umræðum um hættuna sem sak-
borningum stafaði af rússnesk-lítháísku mafíunni og í yfirheyrsl-
um lýstu þeir því yfir að þeir væru ekki öruggir. Grétari var sér-
lega umhugað um örlög sín og aðstandenda sinna, en blaðamenn
DV voru duglegir við að taka undir orð hans og varpa fram spurn-
ingum um ítök erlendra glæpasamtaka hér á landi. Svo fór að blað-
ið birti frétt þar sem kærasta Grétars, Heiðveig Þráinsdóttir, fór
fram á „vitnavernd“ (DV, 3.3.). Í pistli sem ég skrifaði í Lesbók
Morgunblaðsins þremur dögum síðar spurði ég hvort nokkur
furða væri á því að stúlkan færi fram á slíkt. Málsatvikin, eins og
þau birtust lesendum í DV, hefðu „öll verið eins og í kvikmynd og
það kallar á ekkert minna en kvikmyndalausnir. Stúlkan tekur þá
eflaust upp nýtt nafn og hefur nýtt líf, kannski í Hveragerði eða á
Hellu.“32 En í stað þess að fara huldu höfði á Suðurnesjum eða
fyrir austan fjall ákvað Heiðveig að mæta í opnuviðtal í DV þrem-
ur vikum síðar þar sem hún tjáði sig um atburði síðustu mánaða
og lýsti yfir tryggð við Grétar. Sérstaklega athygliverðar eru til-
raunir Heiðveigar til að laga reynslu sína að fjölmiðlaumræðunni
og nýfenginni frægð á síðum DV. Jafnvel má ætla að hún bregðist
við fjölmiðlapistli mínum þegar hún játar að hafa liðið „eins og
aukaleikara í lélegri glæpamynd“ (DV, 27.3.). Sagan af ástum og
örlögum Heiðveigar Þráinsdóttur og Grétars Sigurðarsonar tók á
guðni elísson332 skírnir
31 Fyrirspurn minni um meinta efnavopnaframleiðslu Jónasar Inga svaraði Jón
H.B. Snorrason saksóknari svo í bréfi til mín: „Ef ég skil spurninguna rétt þá
ertu að velta fyrir þér hvernig við höfum tekið á því ef við höfum haft ástæðu
til þess að ætla að Jónas Ingi væri að framleiða eða að undirbúa framleiðslu
efnavopna. Í málinu kom ekkert fram sem benti til þessa. Ekkert fannst við
húsleitir sem benti til þessa og enginn var með upplýsingar í þessa veru. Ef svo
hefði verið hefðum við að sjálfsögðu rannsakað það.“ Ritstjórar DV sáu aldrei
ástæðu til að leiðrétta þessa forsíðufrétt blaðsins sem enginn fótur virðist hafa
verið fyrir.
32 Guðni Elísson: „Í faðmi súludansmeyja.“ Lesbók Morgunblaðsins, 6. mars
2004.
Skírnir haust nota-1 13.11.2006 15:55 Page 332