Skírnir - 01.09.2006, Blaðsíða 237

ANNA BJÖRK EINARSDÓTTIR
Fortíðarþrá í Argóarflís Sjóns
Sjón:
Argóarflísin. Goðsaga um Jason og Keneif.
Bjartur 2005.
I
ARGÓARFLÍSIN er hluti bókaflokks sem ber nafnið Goðsagnirnar og út-
gefendur víðsvegar um heim standa að. Markmið ritraðarinnar „er að fá
marga af fremstu rithöfundum samtímans til að endursegja sígildar
goðsagnir eftir eigin höfði“.1 Sjón hefur áður vísað í og unnið með
goðsagnir í verkum sínum en þar sem bókin tilheyrir ritröð fylgir henni
eftirmáli og heimildalisti í lokin. Slíkt hefur ekki fylgt sögum Sjóns áður.
Sjón tiltekur ekki einungis þekktar goðsagnir í heimildaskrá sinni, þar
kemur fram að bókin er einnig byggð á endurminningum Matthíasar
Þórðarsonar frá Móum og sjóferðasögum Hrafns Valdimarssonar. Hér
verða þræðir þeirra goðsagna sem koma fyrir í verkinu ekki raktir, held-
ur er sjónum beint að aðalsögupersónu bókarinnar, Valdimar Haraldssyni
og notkuninni á fyrirmynd hans, Matthíasi Þórðarsyni, eða öllu heldur
þeirri persónu sem Matthías skóp í endurminningum sínum.
Argóarflísin kom út fyrir jólin 2005 og hlaut einróma lof gagn-
rýnenda. Sjón þótti sýna einstaka snilli á ritvellinum bæði í stílbrögðum
og málfari svo og efnistökum. Þó kusu flestir ritdæmendur að fjalla um
bókina á almennum nótum, enda frekar um ritfregnir en eiginlega rit-
dóma að ræða í flestum tilfellum.2 Sá eini sem lagði til atlögu með hugtök
bókmenntafræðinnar að vopni var Gauti Kristmannsson bókmennta-
fræðingur. Í ritdómi Gauta um Argóarflísina, sem hann flutti í útvarps-
þættinum Víðsjá á Rás 1 Ríkisútvarpsins, lofaði hann bókina meðal ann-
ars með þeim orðum að Sjón væri „meistari hinnar mildu paródíu […]
Skírnir, 180. ár (haust 2006)
UMSAGNIR UM BÆKUR
1 Sjá umfjöllun um ritröðina á bókarkápu Argóarflísarinnar og á heimasíðu Bjarts,
íslenska útgefandans sem tekur þátt í verkefninu: „Útgáfubækur dagsins:
Goðsagnirnar.“ Sjá: http://www.bjartur.is/?i=2&f=2&o=890 [sótt 29.08.06].
2 Sjá t.d. dóma/umfjallanir Ástráðs Eysteinssonar (Morgunblaðinu), Halldórs
Guðmundssonar (Fréttablaðinu), Úlfhildar Dagsdóttur (Bókmenntavefnum) og
Kolbrúnar Bergþórsdóttur (Blaðinu).
Skírnir haust nota-1 13.11.2006 15:56 Page 483