Breiðfirðingur - 01.04.1991, Qupperneq 21

f SNÓKSDAL
19
vopnuðu liði. Fyrir því fór Daði Guðmundsson í Snóksdal.
Varð Jón biskup Arason að snúa brott og reið til alþingis við
svo búið.34 Hefur þeim Hólafeðgum verið þungt í skapi,
enda koma þeir jafnan að þessu atviki í síðari skiptum sínum
við Daða, þótt ákæruatriðin væru fleiri.
Haustið 1548 fyrsta dag í október var Jón biskup Arason
í Hvammi í Hvammssveit og lét ganga tylftardóm klerka
norðan og sunnan um kærur á hendur Daða Guðmundssyni.
Er þar í fjórðu grein, að
biskupinn kærði til Daða að hann hefði verið flokksforingi
fyrir þeim hermannaflokki sem verið hafði í kirkjugarð-
inum í Skálholti í almennilegri prestastefnu og hindrað
hann biskupinn og hans kennimenn, svo hann mátti ekki
hafa liðugan gang að gjöra það guðs embætti þar í kirkj-
unni sem honum til heyrði, sem er kirkju að vígjá, börn að
ferma, bannsmenn að leysa, kristinn lýð að leiðrétta og
aðra biskuplega þjónustu að gjöra, og fyrir því væri nú
Skálholtskirkja saurguð og svívirt . . ,35
Daði lét ekki skipast við Hvammsdóm og hafði hann þá fellt
á sig bann kirkjunnar að dómi kaþólskra manna. A níunda
dag jóla um veturinn bannsöng Jón biskup Arason og
prestar hans Daða í dómkirkjunni á Hólum „með sálmasöng
og hringdum klukkum og steyptum logum.“ Segir biskup
Jón í bannfæringarbréfinu, að áður hafi hann forboðað
Daða eftir kirkjunnar lögum, gjört honum þrjár áminningar
að leiðréttast og látið lesa á hans lögheimili dóm og for-
boðsbréf um sagðar sakir, en þau bréf hafi heimamenn Daða
í sundur rifið og hrakið kennimenn og varnað þeim að lesa.36
Til er framburður Daða, þar sem hann greinir frá skiptum
sínum við Jón biskup Arason og sonu hans.37 Þar ber Daði
biskup og menn hans ýmsum sökum, og er sú ein að biskup
Jón hafi látið taka hesta og vöru og hrakið menn sína um
þingtímann sumarið 1548. Hefur þá biskupsmönnum verið
heitt í hamsi eftir fundinn í Skálholti, en Daði ekki á þingi.
Framburður Daða er allrar athygli verður og kemur að gagni
sé hann notaður með varúð. En hafa verður í huga að þar er