Ljósmæðrablaðið - 01.12.2015, Blaðsíða 38

38 Ljósmæðrablaðið - desember 2015
ljósmóðir hér á Selfossi og niðurstaðan hefur alltaf verið sú sama.
Starfið er fjölbreytt og áhugavert eins og lífið sjálft. Það á vel við
mig að búa í litlu samfélagi og mér þykir gott að eiga stutt að fara til
að njóta útivistar í náttúrunni. Ég er líka svo heppin að eiga frábærar
samstarfskonur á ljósmæðravakt HSU. Það er mjög dýrmætt og í raun
ómetanleg lífsgæði ef starfið og starfsandinn er þannig að aldrei er
leiðinlegt að mæta í vinnuna.
Herborg Pálsdóttir
ljósmóðir við HSU.
SNÆFELLSNES
Haustið 2014 urðu breytingar hjá mér og minni fjölskyldu, við
ákváðum að flytja úr borginni, stefnan var tekin á Akranes. Ég vildi
að svo stöddu ekki gera frekari breytingar og því hélt ég áfram að
vinna á Landspítalanum. Ekki var ég búin að búa lengi á Akranesi
þegar haft var samband við mig frá Heilbrigðisstofnun Vesturlands
(HVE). Vegna veikinda vantaði afleysingarljósmóður í mæðravernd á
Snæfellsnesi, ég fékk ekki langan umhugsunartíma og ákvað að slá til
fram á vor.
Ég sinni mæðravernd í Stykkishólmi, Grundarfirði og Ólafsvík
hálfsmánaðarlega, ég fer á tvo staði á dag, annan daginn er ég í Stykk-
ishólmi og Ólafsvík og hinn daginn í Grundarfirði og Ólafsvík. Það
hafa verið flestar ófrískar konur í Ólafsvík af þessum stöðum, þess
vegna er ég í hvert sinn þar. Veturinn var erfiður, veðráttan leiðinleg en
alltaf komst ég vestur.
Gaman er að kynnast þessum konum á landsbyggðinni, þær eru
lang flestar hraustar og það sem mér finnst einkenna flestar þessara
kvenna eru rólegheit og æðruleysi. Stundum á ég erfitt með að vera
komin á réttum tíma milli staða, en aldrei hefur það verið neitt mál,
þær eru þakklátar fyrir að hafa þjónustuna á staðnum. En auðvitað eru
konurnar þverskurður af samfélaginu og þar eru sömu vandamálin inn
á milli eins og annars staðar. Gott aðgengi er að stoðþjónustu eins og
sálfræðingum fyrir vestan. Flestar konurnar fara í ómskoðun á Akra-
nesi og þar er gott aðgengi að læknum og ljósmæðrum ef á þarf að
halda. Hátt hlutfall eru erlendar konur, stundum er það erfitt þar sem
þær kunna oft litla íslensku og ensku, þær vinna oft erfiðisvinnu og fá
oft lítinn skilning hjá vinnuveitanda ef þær þurfa að minnka vinnuna
vegna meðgönguvandamála.
Tíminn hefur liðið og núna er ég búin að sinna þessu í rúmt ár sem
átti að vera nokkrir mánuðir, ég er búin að taka þetta að mér fram á vor
allavega. Þetta er mikil keyrsla og ég finn oft fyrir þreytu á leiðinni
heim, stundum hef ég þurft að stoppa bílinn og leggja mig aðeins til
að halda áfram. Ég hugsa oft til ljósmæðra sem unnu í héraði í gamla
daga, þær þurftu oft að ferðast í öllum veðrum til kvenna. Þær voru
ekki með neinn farsíma til að láta fjölskyldu sína vita af sér. Ég er þó á
ágætum hlýjum bíl með eitthvað til að hlusta á og síma til að láta vita
af mér.
Hrafnhildur Ólafsdóttir
ljósmóðir
NÝTT
STURTUSÁPA
ÁN OFNÆMISVALDANDI EFNA
ERTIR EKKI VIÐKVÆMA HÚÐ
MÝKIR OG NÆRIR HÚÐINA
Viðurkennt af dönsku astma-
og ofnæmissamtökunum
Þægileg pumpa á
brúsanum auðveldar
þér að skammta
hæfilegt magn.
Heilsugæslustöð Ólafsvíkur.