Ársrit um starfsendurhæfingu - 2014, Qupperneq 25

25www.virk.is
VIÐTAL
fastan símafund í viku með sérfræðingi
VIRK, en nú getum við sem sagt fengið
daglegan stuðning ef þörf er á.
Mér finnst nálægðin við fólkið sem verið
er að aðstoða og starfið með því mjög
gefandi. Það eru í raun forréttindi að fá
að kynnast þessu fólki. Þetta er aðalatriði
hjá mér, sem og sú fjölbreytni og stöðuga
þróun sem á sér stað í starfsemi VIRK.“
Hvaða hindranir rekur þú þig helst
á í starfi þínu?
„Þetta er lítið samfélag hér fyrir vestan
og fámennur vinnumarkaður. Fjölbreytni
er því ekki mikil og stundum er erfitt
fyrir fólk með skerta starfsgetu að finna
sér nýjan starfsvettvang. Þess vegna er
ráðningarsamband mjög dýrmætt fyrir
einstaklinginn. Gott orðspor á vinnumark-
aði skiptir hér miklu máli.“
Ný úrræði búin til
Hvernig er samstarf við
vinnuveitendur?
„Vinnuveitendur hafa tekið mér og mín-
um samstarfsaðilum í starfsendurhæfingu
mjög vel. Þeir eru oft tilbúnir að hliðra til
og aðstoða sitt starfsfólk svo það geti snúið
aftur til fyrri starfa.“
En ef það er ekki hægt?
„Ég svo heppin að hér er til staðar
Starfsendurhæfing Vestfjarða, sem hefur
meðal annars komið rækilega til móts við
VIRK og þróað atvinnulínu sem gengur út á
að leita að starfsúrræðum á vinnumarkaði
fyrir þá einstaklinga sem ekki geta snúið
aftur í sitt fyrra starf og þurfa að fá að reyna
eitthvað nýtt. Þeir hafa þá tækifæri til að
prófa starfsgetu sína í öðru starfi, sem oft
er léttara en hið fyrra. Þetta leiðir gjarnan
til þess að viðkomandi er ráðinn í nýja
starfið. Í raun hefur Starfsendurhæfing
Vestfjarða þróað ýmis úrræði sem hafa
stutt við starfsemi VIRK.“
Hvað er það helst sem veldur því
að fólk á þínu svæði hverfur frá
vinnu?
„Ég vinn með fólki frá átján ára aldri og
fram yfir sextugt. Margt getur amað að,
bæði líkamlegir og andlegir kvillar. Það
er mjög einstaklingsbundið hvað hver og
einn glímir við. Stundum missir fólk vinnu
vegna stoðkerfisvanda, sem leiðir svo til
andlegrar vanlíðunar. Oft á tíðum þarf því
margskonar úrræði. Sníða þarf áætlun
hvers og eins í samræmi við þann vanda
sem viðkomandi glímir við. Ef inn kemur
hópur fólks sem á í svipuðum vanda, þá
reynum við að búa til ný úrræði.
Í haust hefur borið mikið á verkjavanda
hjá þeim sem til okkar hafa leitað.
Sjúkraþjálfarar hjá Sjúkraþjálfun Vestfjarða
tóku sig saman og settu upp þriggja vikna
„verkjaskóla“ til að koma til móts við þarfir
þessa fólks. Sá verkjaskóli er nú að taka til
starfa og verður þá hægt að grípa til þess
úrræðis áfram ef þörf krefur.“
Þú nefndir að vinnuveitendur væru
flestir samvinnufúsir — hvað með
aðra sem þú átt samstarf við vegna
þjónustunnar?
„Vestfirðingar standa saman og hér vilja
allir leggja sitt af mörkum ef þörf er á
aðstoð. Hvað snertir úrræðaaðila sem ég
leita eftir samstarfi við, má segja að mér
sé jafnan tekið opnum örmum. Sama
hvort það eru sjúkraþjálfarar, sálfræðingar,
forstöðumenn líkamsræktarstöðva eða
aðrir starfsendurhæfingaraðilar.“
Finnur leiðir
Hvernig bregstu við hindrunum?
Hvað ef á svæðinu eru ekki til
staðar þau úrræði sem einhver
notandi þjónustu VIRK þarf á að
halda?
„Þá finn ég leiðir fyrir viðkomandi
einstakling. Séu til dæmis langir biðlistar
hjá sérfræðingum fjölga ég mínum
viðtölum svo einstaklingurinn fái stuðning.
Ef fólk býr langt í burtu frá úrræðum er
reynt að nýta þær ferðir sem gefast, til
dæmis til höfuðborgarsvæðisins. Einnig
hefur framboð á netúrræðum aukist,
svo sem svefnráðgjöf og stuðningur
við líkamsrækt. Netfræðsla í hugrænni
atferlismeðferð sem Reykjalundur hefur
þróað stendur meðal annars til boða. Ég
nýti allskonar netúrræði, svo sem fjarnám.
Einnig má nefna fjármálafræðslu. Hún fer
þannig fram að fjármálaráðgjafi hringir í
viðkomandi einstakling sem í framhaldinu
sendir pappíra og fær svo ráðgjöf í síma.
Það er svo margt til í dag sem ekki var
áður til staðar.“
Hvaða menntun hefur þú?
„Ég er menntaður sjúkraþjálfari frá Suður-
Þýskalandi og einnig er ég nuddfræðingur.
Ég hef og ágæta reynslu á sviði íþrótta,
kenndi til dæmis á skíði.“
Hefur þessi reynsla nýst þér vel í
starfi?
„Að mínu mati, já. Ég þekki eðlilega vel til
starfa sjúkraþjálfara. Vegna reynslu minnar
á því sviði skil ég hin ýmsu vandkvæði sem
fólk á við að stríða, sem eru sem betur fer
oftast tímabundin. Ég hef mikinn áhuga
á sjálfshjálp og heilbrigðu líferni, svo og
mismunandi leiðum sem hægt er að fara
í þeim efnum. Engir tveir einstaklingar
eru eins og mismunandi leiðir henta fólki.
Mikilvægt er að hver og einn velji sjálfur
sína leið og stuðli að eigin heilbrigði. Ég
nýti þessa hugsun mikið í starfi mínu og
auðvitað í einkalífinu líka.“
Ertu Ísfirðingur að ætt og uppruna?
„Já. Ég fæddist hér 1974, ólst hér upp
og lauk menntaskólanámi. Eftir nám
í Þýskalandi flutti ég hingað aftur árið
2001 og hef verið búsett hér síðan. Hér
eru aðstæður góðar að sumu leyti, en
hindranir geta skapast vegna nálægðar í
samfélaginu. Ég hitti kannski fólkið sem
er hjá mér í þjónustu hjá VIRK við ýmsar
kringumstæður, svo sem úti í búð eða á
mannamótum. Þannig aðstæður eru síður
fyrir hendi á fjölmennum stöðum. En á
móti kemur að ég þekki umhverfi og innviði
samfélagsins sem við búum hér í og hef
ágætis tengingar við atvinnurekendur og
úrræði á svæðinu.“
Þú telur það sem sagt kost fyrir
ráðgjafa á fámennum stöðum að
vera „innfæddir“?
„Já, ég tel að svo sé. Hér þekkja mig
margir og vita hvað ég stend fyrir, hvaða
manneskju ég hef að geyma. Vegna
nálægðarinnar í samfélaginu get ég verið
áfram til staðar sem samfélagsþegn, ef
fólk vill, þegar ráðgjöfinni hjá VIRK lýkur.
Ég brosi og býð góðan daginn. Ef fólk vill
tala meira við mig getur það gert það. Ef
maður verður þess hinsvegar áskynja að
einhverjum finnist nálægðin óþægileg, þá
lætur maður bara sem ekkert sé,“ segir
Fanney Pálsdóttir, ráðgjafi hjá VIRK.
Texti: Guðrún Guðlaugsdóttir